Salò o le 120 giornate di Sodoma

Da Wikipedia.

C'l artìcul chè 'l è scrit in Miranduléś Emiliàn

Salò o le 120 giornate di Sodoma

L'Hélène Surgère in na figùra dal film
Salò o 'l 120 giurnàdi 'd Sòdoma
1975
Regìa: Pier Paolo Pasolini
Scritōr: Pier Paolo PasoliniSergio Citti
Pupi AvatiMarchese de Sade
Atōr: Paolo BonacelliUberto Paolo Quintavalle
Hélène SurgèreAldo VallettiGiorgio Cataldi
Caterina BorattoElsa De GiorgiFranco Merli
Sonia SaviangeBruno MussoLamberto Book
Müsica: Pier Paolo Pasolini • Ennio Morricone
Léngua: ItagliàṅFrancéśTedésc
Dürä dal film: 117 minüt
Nasiōṅ: ItàgliaFrància


«
Un film ch'al squàsa la mènt p'r un pùblic madūr preparâ a véd'r-al.»
(Tagline dal film)


Salò o le 120 giornate di Sodoma (Salò o 'l 120 giurnàdi 'd Sòdoma) 'l è 'n film dramàtic dal 1975 ad Pier Paolo Pasolini ispirâ a 'l lìbar Al sènt-vint giurnàdi 'd Sòdoma dal marchéś Donatien Alphonse François De Sade. 'L è 'l ùltim lavōr dal regìsta bulgnéś, vgnû fóra dòp la sò mòrt, e l'è l'òpra ch'in di sò piàṅ la gh'iva da vèrar la “Trilugìa dla mòrt” dòp la “Trilugìa dla vita” di film Il Decameron, I racconti di Canterbury e Il fiore delle Mille e una notte. Al film 'l è divìś in quàtar capìtui ch'i arcòrdan 'l „Infèr'n“ ad Dante Alighieri: „'l Antinfèran“, „al Giròṅ dal Manìi“, „al Giròṅ dla Mèrda“ e „al Giròṅ dal Sangṿ“.

Soquànt estéran i èṅ stâ girâ a Villa Aldini[1], 'n edifìsi neuclàsic in si còi ad Bulógna. Gl'intér'n invéci i èṅ stâ fat a Villa Sorra a Castelfrànch[2].

La pelìcula l'è stada cinsuràda e sequestràda soquànti vòlti da i giùdas par purcarìi e 'l prudutōr, diféś par 'l avucàt Luigi Di Majo, 'l è anc stâ cundanâ a dū méś ad parśòṅ in prim grâd.

Sunt

Durànt la Secónda guèra mundiàla, in dla Repùblica 'd Salò, sédas śōvan (òt masć e òt fémni) i vènan purtâ via par finìr in na vila a i órdan ad quàtar rapreśentànt dal putēr e di sò visi: al Presidènt (Aldo Valletti), al Duca (Paolo Bonacelli), al Munsgnōr (Giorgio Cataldi) e al Giùdas (Uberto Paolo Quintavalle), presidènt ad Cōrt 'd Apèl.

Scultànd al nòti dna dóna (Sonia Saviange) ch'la sòna 'l piàṅ, tri strìi èx putàni in là c'n i an, la sgnōra Castelli (Caterina Boratto), la sgnōra Maggi (Elsa De Giorgi) e la sgnōra Vaccari (Hélène Surgère), i còntan dal purcarìi eròtichi mént'r i ragàs cavâ śò nûd i patìsan da tut in fin tant ch'i sò padròṅ i decìd'n ad masàr-i tut in giardèṅ dòp avér-i turturâ.

Culegamènt estéran

Nòti

  1. La Vila 'd “Salò” a Bulógna Centro studi Pierpaolo Pasolini casarsa della delizia, 11 ad Mars dal 2015
  2. Villa Sorra, na fotoinstalasiòṅ p'r arcurdàr Pasolini Il nuovo giornale di Modena, 1 ad Setémbar dal 2015