L'uccello dalle piume di cristallo

Da Wikipedia.
C'l artìcul chè 'l è scrit in Miranduléś Emiliàn
Video-x-generic.svg L'uccello dalle piume di cristallo
Uccello piume.png
L'Eva Renzi in na figùra dal film
'L uśèl da 'l plumi ad cristàl
1970
Regia: Dario Argento
Scritùr: Dario Argento
Atùr: Tony MusanteEnrico Maria Salerno
Suzy KendallUmberto RahoEva Renzi
Raf ValentiMario AdorfGiuseppe Castellano
Müsica: Ennio Morricone
Lengua: Itagliàn
Dürä dal film: 93 minüt
Nasiòṅ: ItàgliaGermàgna


«
Tut i sîg ad cal mónd chè i n t jutaràṅ briśa»
(Tagline dal film)


L'uccello dalle piume di cristallo (’L uśèl da 'l plumi ad cristàl) 'l è 'n film śal dal 1970 ad Dario Argento ch'al vèra al perìud thriller dal regìsta rumàṅ, quél di tri film cun dal bèsti in di tìtui, prima 'd Il gatto a nove code e ad Quattro mosche di velluto grigio.

Quànd 'l è gnû fóra in dal sali, al film 'l à muciâ sù 2 migliàrd e 400 migliòṅ ad Franc.

L'òpra l'è la prima giràda par Dario e la tōś ispirasiòṅ da 'l lìbar La statṿa ch'la siga (The Screaming Mimi) ad Fredric Brown. Gl'estéran i èṅ stâ fat dagnóra tut in dal quartér Flamìni ad Róma.

Sunt

Sam Dalmas (Tony Musante) 'l è 'n americàṅ uriginàri dl'Itâglia ch'al lavóra a Róma in 'n istitùt ad siénsi naturàli dòp èsar stâ jutâ a catàr-al da 'n sò amìg ch'al stùddia gl'uśèi, al prufesōr Carlo Dover (Raf Valenti). Sam al s divertìs però anc a scrìvar di lìbar e al gh'à na muróśa itagliàna, la Giulia (Suzy Kendall).

Na sira, méntar 'l è drē a turnàr a cà, al véd un tintatìṿ 'd umicìdi in na galerìa 'd art mudérna. Par strada al tîn 'd òć a na litgàda fra 'n óm e na dóna rósa ad cavìi, ch'la stramàsa par tèra frida da na scurtlàda. Quànd a riva lè la pulisìa, a s vèṅ a savér ch'a s trata dla mujér dal diretōr dal musèo Alberto Ranieri (Umberto Raho), la Monica (Eva Renzi).

A próa a cavàr-ag fóra quèl al cumisàri Morosini (Enrico Maria Salerno) ch'al s è anc mis in tèsta che qvél ch'l à tirâ 'l cōlp al sia un manìac ch'l iva in cal méntar cupâ tri dóni in dal gir 'd un méś.

Dalmas al gh'à da réndar cònt a la pulisìa cuma testimòni e al cònta incòsa ma a gh par ad daśmindgàr quèl 'd impurtànt. In cal méntar al masadōr al cópa na śuvnòta ad vint-i-òt an ch'la viṿ da par lē, tirànd-ag na scurtlàda dòp avér-ag cavâ via al mudandìni. Quànd la Monica la vèṅ fóra da 'l uśdàl, Sam al la và a catàr a cà sua par far-ag dal dmandi ma sò marè al gh diś ch'la n è minga bòna ad dascórar parchè la tōś di sedatìṿ.

'L americàṅ, dòp ch'i gh'aṅ purtâ via al pasapòrt parchè indagâ anca lò, al và in dal negòsi 'd antiquariâ in dua la lauràva la prima vitma par pascàr dal nutìsi. Al titulàr al gh cònta ch'al dè dal masamènt 'l iva vindû un quàtar naif particulàr, in dua na ragasōla la patìva na viulénsa. Dalmas al s fà dar na foto dal dipìnt e al s la pòrta a cà, miténd-la atàc a 'l mur par tgnir-la sèmpar sót a i òć.

Cla nòt lè però a mōr cupàda 'n atra dóna, in 'n asinsōr a cólp ad raśōr.

Culegamènt estéran