Giornata nera per l'ariete

Da Wikipedia.

C'l artìcul chè 'l è scrit in Miranduléś Emiliàn

Giornata nera per l'ariete

La Rossella Falk in na figùra dal film
Giurnàda négra p'r al bric
1971
Regìa: Luigi Bazzoni
Scritōr: David McDonald Devine • Luigi Bazzoni
Mario di Nardo • Mario Fanelli
Atōr: Franco NeroSilvia MontiRossella Falk
Ira von FürstenbergPamela TiffinAgostina Belli
Edmund PurdomWolfgang PreissAndrea Scotti
Renato RomanoCorrado GaipaGuido Alberti
Müsica: Ennio Morricone
Léngua: Itagliàṅ
Dürä dal film: 90 minüt
Nasiōṅ: Itàglia


«
Prima ch'a sòna la meśanòt ch'l'anùnsia un dè sénsa alba, méntar da drē da 'l us ch'at vèr na maṅ ch'la strica na lasa, ch'la ména 'n pugnàł, ch'la tira sù 'n raśōr, tè ta n sarà àtar ch'un cadàvar ch'al pusa e 'l marsìs in cantìna, ch'al stà a gala in pisìna, ch'l è in spicajòṅ su 'n àlbar 'd póm parchè 'l al diś 'l uròscup, 'l è 'n dè négar, dè négar, dè négar p'r al bric.»
(Tagline dal film)


Giornata nera per l'ariete (Giurnàda négra p'r al bric) 'l è 'n film śal dal 1971 ad Luigi Bazzoni trat da 'l rumànś The Fifth Cord ad David McDonald Devine.

Sunt

Andrea Bild (Franco Nero), giurnalìsta c'n al visi dal bévar e cun un matrimòni cun l’Helene (Silvia Monti) andâ mâl, al s mét a indagàr su dū fat criminóś: l'agresiòṅ patìda da 'n śóvan insgnànt 'd ingléś, al prufesōr John Lubbock (Maurizio Bonuglia) e 'l umisìdi dna dóna ardùta a vìvar in sna scrana a rudèli, la Sophia Binni (Rossella Falk), butàda śò da 'l scali. Sò marè Richard (Renato Romano), ch'al fà al dutōr e ch'l è anc pruprietàri dal giurnàl in du al lavóra Andrea, al n vōl briśa ch'a s dascóra ad cal caś lè e al gh fà tiràr via 'l incàrag ma Bild al decìd 'd andàr avànti listés par sò cònt. In cal méntar a mōr anc al sò cap redatōr Traversi (Guido Alberti), ad paùra in un parc mént'r al killer al gh curìva adrē cun un curtèl in maṅ, e la pulisìa la taca a pinsàr ch'al pòs'èsar lò al manìac.

Andrea al ricév na telefunàda da l’Isabelle Lancia (Ira von Fürstenberg), fiōla pîna ad bèsi 'd un armadōr, ch'la gh diś ch'la gh'à dal nutìsi impurtànti da dar-ag. Chi lē l'è spuśàda cun al pruf. Edouard Valmont (Edmund Purdom), culéga ad Lubbock e sò rivàl in amōr p'r al sò cōr. Quànd al giurnalìsta al và a cà sua però al la cata mòrta in dla sò vasca da bagn acsè cuma n'atra dóna ch'la gh'iva dâ na maṅ durànt al sò indàśin. Al cumisàri ad pulisìa (Wolfgang Preiss) al al vrév mét'r in parśòn ma Andrea al gh dmanda incóra vint-quàt'r óri ad tèmp par catàr lò 'l sasèṅ.

Fra 'l àtar, tut i masamènt i èṅ stâ fat ad Martedè, un dè favurévul a quéi dal ségn dal bric, al ségn anc ad Lubbock che, a dir dabòṅ, piutòst che a l’Isabella 'l iva invéci butâ i òć adòs a Edouard, fiṅ da i tèmp dl'università.

Culegamènt estéran