Stéphanie Foretz Gacon
|
C'l artìcul chè 'l è scrit in
Miranduléś |
La Stéphanie Foretz Gacon (Issy-les-Moulineaux, 3 ad Maǵ dal 1981) l'è na tenìsta francéśa prufesiunìsta da 'l 1997 ch'l'è stada la nùmar ssanta-dū dal mónd in singulàr (al 24 ad Favràr dal 2003).
L'è élta 166 cm e la péśa 60 chilo. La dróa al bras dèstar e la tira 'l arvèrs a dū maṅ. La preferìs śugàr in sal dûr.
In dla sò caréra l'à vins sèt tìtui ITF e śugâ dū finàli ad dópi in di turèo WTA (in dal 2006 e in dal 2009) ma la i à pardùdi tuti.
Caréra
In dal Mars dal 2002, dòp avér pasâ al qualificasiòṅ, la śōga al turnèo ad Miami in dua la bat a 'l prim tùran la mudnéśa Adriana Serra Zanetti par 6-4 6-3 ma pò la pèrd da la Kim Clijsters 2-6 3-6. A Charleston la s fà nutàr dimóndi dand la paga a na śōvna Jelena Janković in dal qualificasiòṅ e pò a la Conchita Martínez 6-1 6-2 e anc a la Monica Seles 6-4 7-6. In sal più bèl, la céd in di quàrt a la Sandrine Testud par 7-6 3-6 3-6. La pasa dū tùran anc in di US Open ma pò la pèrd da la rusa Elena Bovina 2-6 7-5 5-7.
In dal 2003 la riva in di quàrt a Memphis (5-7 4-6 da l'Amanda Coetzer) e a Birmingham (7-6 2-6 3-6 da la Magdalena Maleeva). A gl'US Open invéci la và fóra subìt par maṅ dl'Antonella Serra Zanetti cun al puntéǵ da 6-3 5-7 4-6. In dal Maǵ dal 2004 la vins 'l ITF ad Catàgna e la pèrd la finàl ad qvél ad Saint Gaudens p'r òpra dla Marija Kirilenko. In Luj la pasa 'l prim tùran a Wimbledon (6-1 6-3 a la Stéphanie Cohen-Aloro) ma pò la pèrd da la Serena Williams 0-6 4-6. Vinsénd cóntar la Sybille Bammer, la pasa 'l qualificasiòṅ di US Open in dua la riva a 'l secónd tùran ma lè la céd a la Francesca Schiavone 2-6 3-6.
In dal 2005 la taca 'l an pardénd sinc di prim siē incóntar śugâ. In Maǵ qvéi dal Roland Garros i gh dànan na carta salvàdga ma lē la la buta in mèś a gl'urtìghi pardénd subìt da l'Ana Ivanović par 3-6 3-6. A Birmingham la riva a 'l tèrs tùran baténd l'Akiko Morigami ma pò la céd a la Tamarine Tanasugarn 6-2 3-6 3-6. In Utóbar la riva in di quàrt a Bangkok ma la gh'à da lasàr strada a la rusa Nadia Petrova par 4-6 0-6.
In dal 2006 la pòrta a cà pôc parchè 'l è 'n an da daśmindgàr (a par gl'ITF ad Bièla e Saint Raphael, vins 7-5 3-1 e bandòṅ su la Tathiana Garbin e 7-6 6-7 6-1 su la Yulia Fedossova), ma lē la n pōl minga far-al sicuramènt cun al sò arbgàt Kaia Kanepi ch'la gh dà la paga par quàtar vòlti.
In dal 2007 a Memphis la tasta na śōvra Caroline Wozniacki che, cun na carta salvàdga in bisàca, la la manda a cà subìt cun un 2-6 7-6 6-3 in sal cupét. In Utóbar la próa incóra a vìnsar 'l ITF ad Saint Raphael ma 'sta vòlta la n gh la cava mia parchè la parmśàna Alberta Brianti la la bat in finàl 6-4 6-4. Dū stmani dòp la cata la Lindsay Davenport in di quàrt ad Quebec City e la gh pèrd 4-6 0-6. A 'l inìsi dal 2008 la śōga sèt turnèo WTA ma la pèrd e basta, a part un tùran ad qualificasiòṅ a Antwerp. Dòp avér śugâ praticamènt sōl di ITF, e gnanc tant bèṅ a part na finàl a Marsìglia pardùda da la Kirsten Flipkens, la pasa 'l qualificasiòṅ a Wimbledon ma pò la pèrd a 'l prim tùran p'r òpra dla Marija Šarapova (nùmar dū dal mónd) 1-6 4-6. La sa spòsta alóra in sla tèra ad Contrexeville (Frància) par śugàr 'n ITF ad sinquànta-mila dòlar. Chè la bat a fadìga la Camila Giorgi 5-7 6-2 7-5 e in di semifinàl la Mandy Minella ma pò la céd al tìtul a la ruména Ioana Raluca Olaru 4-6 2-6. In Nuvémbar la gh próa anc a Udéns ma la Caroline Wozniacki la la manda a cà in semifinàl 7-6 7-5.
In dal 2009 la pèrd a 'l secónd tùr'n a Memphis da la Sabine Lisicki e a 'l prim tùran di French Open da la Kirsten Flipkens. A la fiṅ d'l an la śōga 'l IFT ad Nantes ma la céd a 'l secónd tùran a la qualificàda Camila Giorgi par 4-6 7-5 1-6. In dal 2010 la pasa 'l qualificasiòṅ a Quebec City ma la Marion Bartoli la la saplìs a 'l prim tùran 6-1 6-1. La finìs 'l an a 'l 171śum pòst in clasìfica, al sò più brut riśultâ da 'l 1999.
In dal 2011 la riva in finàl in tri ITF ma la i pèrd tut. In Maǵ la riva a 'l secónd tùran a Straśbûrg e pò la pèrd da la Lucie Hradecká par 2-6 4-6. La pasa 'l qualificasiòṅ a Wimbledon ma a 'l prim tùran la cata 'l us sarâ da l'Andrea Petković, in alóra nùmar trédas dal mónd. La finìs 'l an śuntànd àtar dū ITF mandâ in dal rusc in finàl.
Al 2012 al s vèra par lē cun al qualificasiòṅ andàdi mâl a Sydney e cun al secónd tùran di Australian Open in dua la Kim Clijsters la la spapèla 6-0 6-1. A Memphis la riva in di quàrt baténd la Camila Giorgi 7-5 6-4 ma pò la pèrd da la rusa Vera Duševina 6-3 3-6 1-6. A Acapûlc invéci la céd a 'l secónd tùran p'r òpra dla Roberta Vinci. A 'l Roland Garros la cata la cinéśa Na Li ch'la vins al sò incóntar dal secónd tùran sèg 6-0 6-2. In dal 2013 la mét in fila dū secónd tùran, a gl'Australian Open (3-6 3-6 da l'Ekaterina Makarova) e a Acapûlc (1-6 2-6 da la Carla Suárez Navarro, pò finalìsta).