Lauren Davis

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn


La Davis tòlta śò durànt gl'Australian Open dal 2011


La Lauren Davis (Gates Mills, 9 'd Utóbar dal 1993) l'è na tenìsta americàna, prufesiunìsta da 'l Śnar dal 2011. L'è élta 157 cm e la péśa 55 chilo. La dróa al bras dèstar e la tira 'l arvèrs a dū maṅ.

La stà a Boca Raton (Flòrida). Sò pàdar 'l è 'n cardiòlug, sò màdar n'infarméra. La gh'à 'n caṅ ch'al s ciàma Pierre.

In dla sò caréra l'è rivàda a èsar la nùmar ssanta-tri dal mónd 'l 8 'd Avrìl dal 2013 e l'à vins sèt tìtui ITF, dū di quài cóntar la Madison Keys e l'Ajla Tomljanović.

Caréra

La tenìsta d'l Ohio la taca a śugàr in dal sircùit ITF in dal 2009. In dal 2010 la śóga 'l qualificasiòṅ p'r al Premier Mandatory ad Miami purtànd via al prim sét a la Pauline Parmentier par pò ciapàr un dópi 0-6. In Śugn la śóga la sò prima finàl ITF ma la la pèrd. In Utóbar però la in vins dū ad fila, òṅ da déś-mila e òṅ da vintsìnc-mila a Bayamón, chè baténd l'Ajla Tomljanović, la Sloane Stephens e la Madison Keys.

In dal 2011 la tōś part da nùmar 443 dal mónd a gl'Australian Open par via dna carta salvàdga ma la pèrd subìt da la padròna ad cà, la nùmar siē Samantha Stosur, par 1-6 1-6. In Istâ la s mét in bisàca àtar dū ITF da déś-mila dòlar par pò pèrdar a 'l prim tùran di US Open, atra carta salvàdga, da l'Angelique Kerber par 6-7 3-6.

In dal 2012 la mùcia sù di punt cun quàtar ITF ad fila in dua la in vins òṅ e faghénd finàl, semifinàl e quàrt in chi àtar. A Memphis e a Indian Wells i gh daṅ da gl'atri carti salvàdghi e lè la pèrd subìt da la Varvara Lepchenko par 5-7 3-6 ma pò l'è bòna ad bàtar la Petra Martić 6-2 7-6 prima ad cédar a la Nadia Petrova par 3-6 2-6. In Avrìl, in d'l ITF ad Dothan, la pèrd in semifinàl da la Camila Giorgi par 5-7 5-7 ma pò la la bat in qvél 'd Indian Harbour Beach prima ad lasàr strada in semifinàl a la Maria Sanchez. In Frància la pasa 'l qualificasiòṅ a Straśbûrg (2-6 6-3 6-4 a la Mandy Minella) e a 'l Roland Garros (1-6 6-4 6-2 a la Julia Cohen). In Alsàzia la pèrd subìt da la Johanna Larsson par 6-3 6-7 6-7 mént'r a Parì la sćiànca la Mona Barthel par 6-1 6-1 prima 'd alvàr la bandéra biànca cun la Christina McHale par 1-6 3-6. In Setémbar, baténd la Yanina Wickmayer, la riva par la prima vòlta in di quàrt 'd un turnèo WTA a Quebec City ma lè la pèrd 4-6 2-6 da la Lucie Hradecká. La finìs 'l an cun dū finàli ITF, la prima pardùda cun la Maria Sanchez, la secónda vinsa cun la Shelby Rogers, e cun na puśisiòṅ in dal primi sènt.

Un drit dl'americàna a gl'US Open dal 2011

In dal 2013 la Davis la riva in di quàrt a Hobart pasànd p'r al qualificasiòṅ e la cumbàt dimóndi cun la Sloane Stephens prima ad cédar sèg par 3-6 6-4 5-7. In Favràr la s mét in bisàca un tìtul ITF da sènt-mila dòlar cóntar l'Ajla Tomljanović e pò la taca la stagiòṅ americàna WTA. A Memphis la pèrd a 'l secónd tùran da la Magdaléna Rybáriková par 6-7 2-6, incóra pèś a Indian Wells in dua la ciàpa la paga subìt da la Simona Halep par 2-6 0-6. A Miami la fà al sò ingrès in dal tablòṅ prinsipàl cuma pardènta furtunàda e cun un bye in bisàca. Dòp avér batû la carta salvàdga Madison Keys par 6-1 5-7 7-6 però la céd a l'Alizé Cornet in tri sét. Durànt 'l incóntar cun la francéśa la patìs 'l atàc dna béga in dal cûl ch'la gh fà dimóndi mâł[1]. A Monterrey la riva in di quàrt pardénd da l'Anastasija Pavljučenkova che pò la vins'rà 'l turnèo mesicàṅ. In sla tèra batùda e in sl'èrba la mùcia sù sōl di prim e di secónd tùran. A Turònt la pasa 'l qualificasiòṅ baténd la Svetlana Kuznecova par 5-7 6-4 6-4. La Lauren la la cata pò incóra anc a 'l prim tùran cuma pardènta furtunàda e la la bat incóra in tri sét par 3-6 7-5 7-5 ma pò a 'l secónd tùran la ciàpa la paga da la Marion Bartoli, frésca vinsidōra ad Wimbledon, par 0-6 3-6. A Cincinnati, US Open e a Quebec City la fà secónd tùran (6-4 1-6 1-6 da la Na Li), prim tùran (asfaltàda par 0-6 0-6 da la Carla Suárez Navarro) e quàrt (2-6 4-6 da la Lucie Šafářová). La Navarro la la bat anc a Pechîn par 6-4 6-2 dòp che l'americàna l'iva mandâ a cà la Mona Barthel par 6-0 5-7 6-4. La Davis la finìs 'l an a 'l 72śum pòst.

Al sò 2014 al s vèra cun i quàrt a Auckland (2-6 6-4 4-6 da la Jamie Hampton) e cun gl'utàṿ a Sydney (5-7 2-6 da la Sara Errani). A Melbourne la bat la Julia Görges ma pò la và fóra a 'l tèrs tùran cun l'Eugenie Bouchard. In Mars la riva in di utàṿ a Indian Wells baténd prima la Viktoryja Azaranka e pò la Varvara Lepchenko ma pò la n è minga bòna ad śugàr cun la Casey Dellacqua e la n và gnanc in camp. A Miami e a Charleston la pèrd a 'l secónd tùran c'n al sèrbi Ana Ivanović e Jelena Janković. In sl'èrba 'd Eastbourne la manda subìt a cà la Sara Errani e la Daniela Hantuchová par pò farmàr-as cun la Madison Keys in di quàrt. A Wimbledon l'è bòna ad bàtar la Flavia Pennetta, minga la Shuai Peng a 'l tèrs tùr'n anc s'l'éra pardìda c'n un 6-0 par lē. In Luj la Davis la gh'à l'arvìnsida sèg a Washington, la la bat 1-6 6-4 6-2, ma a 'l secónd tùran la và fóra ad òpra dl'Ekaterina Makarova. Da lè in avànti la mét in fila siē prim tùr'n ad fila. La sèra 'l an faghénd i quàrt a Uśàka (2-6 4-6 da l'Elina Svitolina).

Culegamènt estéran

Nòti