Shelby Rogers

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn


La Shelby Rogers (Mount Pleasant, 13 'd Utóbar dal 1992) l'è na tenìsta americàna. La stà a Charleston.

L'è élta 175 cm e la péśa 70 chilo. La dróa al bras dèstar e la tira 'l arvèrs a dū maṅ. In dla sò caréra l'è rivàda a èsar la nùmar 70 dal mónd al 15 ad Setémbar dal 2014.

Caréra

'N arvèrs dla Shelby Rogers tirâ durànt gl'US Open dal 2010

La śōga al sò prim turnèo ITF in dal Luj dal 2009 a darsèt an rivànd in di quàrt a a St. Joseph (Missouri). In Luj la ciàpa la paga da la Beatrice Capra a Williamsburg ma in Dicémbar la gh la cava a rivàr in semifinàł in 'n ITF mesicàṅ. 'L an dòp la próa a qualificàr-as p'r al turnèo WTA ad Charleston ma la và fóra subìt ad òpra dla Christina McHale par 4-6 6-3 1-6. In Maǵ la pèrd in tri sét la finàł in d'l ITF da sinquànta-mila dòlar 'd Indian Harbour Beach da l'Edina Gallovits. In Luj l'è ancóra la Capra ch'la s mét in mèś a Lexington dòp ch'l'iva pasa 'l qualificasiòṅ. Dòp i quàrt a Vancouver (in dua però l'è stada bòna ad bàtar la Sania Mirza) la śōga gl'US Open par via dna carta salvàdga e la fà sudàr dimóndi la cinéśa Shuai Peng ch'la vins sèg 6-7 7-6 6-3. La sèra 'l an a 'l 341śum pòst.

In dal 2011 la ciàpa na carta salvàdga p'r al turnèo ad cà ad Charleston ma la và fóra subìt par maṅ dla Jill Craybas. In Maǵ la dà vita a 'n incóntar tirâ cun la Taylor Townsend in d'l ITF ad Carson ma la céd 7-5 5-7 6-7. In séguit la n pasa minga 'l qualificasiòṅ in dal Bronx (4-6 6-7 da la Casey Dellacqua) e a Albuquerque in dua la bat la Mashona Washington ma minga l'Alexandra Stevenson. A Troy la bat l'Eugenie Bouchard in dal qualificasiòṅ e pò la Sharon Fichman in di utàṿ par pò cédar a la Romina Oprandi in di quàrt. A Rock Hill invéci l'è la Camila Giorgi a far-la fóra in di utàṿ par 6-3 6-4.

La Rogers tòlta śò in dal 2014

In dal 2012 la fà fadìga a mét'r in fila soquànt riśultâ bòṅ. La pasa 'l prim tùran sōl in d'l ITF ad Pelham ma pò la Coco Vandeweghe la la bat par 6-4 6-4. In Avrìl la bat la Madison Keys a Charlottesville ma la gh'à da lasàr strada a l'Irina Falconi. A Indian Harbour Beach la gh la cava a bàtar la Mónica Puig ma pò la và fóra in di utàṿ cun la Grace Min. In Luj la s mét in bisàca 'l ITF ad Yakima pò in Setémbar la riva in finàł in qvél ad Las Vegas ma la pèrd da la Lauren Davis par 7-6 2-6 2-6.

In dal 2013 la pèrd siē incónt'r ad fila prima ad pasàr al qualificasiòṅ a Pelham e andàr fóra subìt a 'l prim tùran. A gh và méj in d'l ITF ad Dothan in dua la bat la Belinda Bencic par 6-4 3-6 6-0 par pò lasàr strada in di quàrt a l'Ajla Tomljanović par 2-6 6-7. In Agóst la vins al sò prim tìtul ITF a Charlottesville baténd lung la via l'Alison Riske, la Patricia Mayr-Achleitner e l'Allie Kiick in finàł. In Maǵ la riva in di utàṿ a Straśbûrg (6-2 3-6 4-6 da la Chanelle Scheepers) e a 'l secónd tùr'n a 'l Roland Garros (6-3 4-6 4-6 da la Carla Suárez Navarro). In sl'èrba ingléśa la fà pôc e gnint, dimóndi méj in sal cimènt americàṅ dal sircùit ITF in dua la vins a Lexington e la riva in semifinàł a Yakima. Dòp dū prim tùr'n a Cincinnati (3-6 6-4 2-6 da l'Annika Beck) e a gl'US Open (3-6 2-6 da la Caroline Garcia) la vins 'n àt'r ITF a Albuquerque (Mèsic) baténd in finàł l'Anna Tatishvili par 6-2 6-3.

In dal 2014, cun na carta salvàdga in dal bisachèṅ, la tōś part a 'l turnèo 'd Indian Wells e lè la dà la paga a la Petra Cetkovská par 6-0 6-4 prima ad ciapàr-i lē da la Magdaléna Rybáriková. La tenìsta dla Carulìna dal Sud la s piga incóra p'r òt vòlti ad fila. La s déśd' incóra in d'l ITF ad Contrexeville in dua la riva in di quàrt batùda par Kaia Kanepi. In Luj la śōga dimóndi bèṅ in dal muntàgni ad Bad Gastein parchè, dòp èsar pasàda p'r al qualificasiòṅ, la bat la Kristýna Plíšková, la Carla Suárez Navarro, la Camila Giorgi e la Sara Errani par pò pèrdar sōl in finàł da l'Andrea Petković par 3-6 3-6. La Rogers adès l'è 'n trên in córsa: a Washington la bat l'Alizé Cornet mént'r a Montreal la Shuai Peng, l'Ajla Tomljanović e l'Eugenie Bouchard (dand-ag un 6-0 2-6 6-0). In séguit la pèrd a 'l secónd tùr'n a gl'US Open cun la Flavia Pennetta e in semifinàł a Quebec City cun la Venus Williams. La sèra 'l an pardénd anc da la Belinda Bencic e da l'Elina Svitolina.

Culegamènt estéran