Melanie South

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn


Un servìsi dla Melanie South


La Melanie Jayne South (Kingston, 3 ad Maǵ dal 1986) l'è na tenìsta ingléśa, prufesiunìsta da 'l 2004. L'è élta 170 cm e la stà a New Malden, in dal Régn Unî.

In dla sò caréra l'à vins siē turnèo ITF in singulàr e vint-a-dū in dópi, rivànd a èsar la nùmar nuanta-nóṿ dal mónd al 2 ad Favràr dal 2009.

La sò vìnsita più bèla la gh'è stada in dal turnèo ad Wimbledon dal 2006 quànd, dasfrutànd na carda salvàdga, l'à batû a 'l prim tùran la nùmar 14 dal mónd Francesca Schiavone dòp èsar stada sóta 'd un sét.

In dal 2008 la gh'à 'n cólp ad cûl a Los Angeles parchè, anc pardénd al sò incóntar dal qualificasiòṅ, la dasfrùta un buś ch'al s éra furmâ in dal tablòṅ quànd la nùmar 2 Serena Williams l'iva decìś 'd a n śugàr briśa. Par via dal sò bye, la riva diretamènt a 'l secónd tùran in dua la dà la paga a la Petra Kvitová ma pò la và a pèrdar da la cinéśa Yuan Meng.

L'à pò śugâ anc al turnèo di Australian Open dal 2009 sénsa avér biśógn ad qualificàr-as, cun sōl i sò punt in bisàca ch'i ér'n asè, ma l'à pò pardû subìt da la francéśa Marion Bartoli.

Culegamènt estéran