Anna Čakvetadze

Da Wikipedia.

C'l artìcul chè 'l è scrit in Miranduléś Emiliàn


La Čakvetadze tòlta śò a 'S-Hertogenbosch in dal 2007
La trésa dla rusa la sa squàsa dòp un servìsi


L’Anna Džambulilovna Čakvetadze (Mósca, 5 ad Mars dal 1987, ciamàda in Rus Анна Джамбулиевна Чакветадзе) l'è stada na tenìsta rusa prufesiunìsta da 'l 2003. L'à śmis ad śugàr in dal Setémbar dal 2012. L'è stada la nùmar sinc dal mónd al 10 ad Setémbar dal 2007.

L'è élta 171 cm e la péśa 63 chilo. La dróa al bras dèstar e la tira 'l arvèrs a dū maṅ. Al film ch'a gh piàś da piò 'l è Qualcuno volò sul nido del cuculo. La dascór in Rus e in Ingléś.

In dla sò caréra la s è misa in bisàca quàtar migliòṅ ad dòlar a 'l incìrca e l'à purtâ a cà òt tìtui WTA e dū ad qvéi d'l ITF.

Caréra

La rusa la taca la sò caréra da prufesiunìsta in dal 2003. In Nuvémbar la pèrd in semifinàl in d'l ITF ad Nottingham da la Kirsten Flipkens par 5-7 6-4 2-6.

In dal Favràr dal 2004 la śōga dū finàli ITF in dal gir dna stmana, pardénd a Sunderland (al nùmar òṅ) da la Kaia Kanepi 6-7 0-6 e vinsénd a Redbridge cun la Virginie Pichet 6-2 6-2. Sèmp'r in dal Régn Unî la sèntra n'atra finàl ITF in Avrìl a Surbiton ma la la pèrd cun l'Akiko Morigami cun al puntéǵ ad 4-6 6-1 1-6. La s qualìfica pò par la prima vòlta in un turnèo WTA in Agóst a Stucólma ma la pèrd subìt cun l'itagliàna Silvia Farina Elia par 6-7 6-3 3-6. La pasa al qualificasiòṅ anc a gl'US Open e pò la dà la paga a la Barbara Schett 1-6 6-4 6-3 e a la nùmar tri dal mónd, l'Anastasija Myskina, par 7-6 6-3 prima 'd andàr a cà cun l'Eleni Daniilidou par 4-6 2-6. In Setémbar la tōś part a 'l ITF da sinquànta-mila dòlar ad Batumi e lè lē la riva in finàl vinsénd cun l'Elena Vesnina in di quàrt e cun la Nastas'sja Jakimava in semifinàl ma pò la gh'à da lasàr al tìtul a la sèrba Ana Ivanović par 3-6 3-6. La finìs 'l an cun un prim tùran in dal turnèo ad cà ad Mósca, 4-6 6-1 3-6 cun la Dinara Safina.

In dal 2005 la partìs cun un secónd tùran a gl'Australian Open (2-6 1-6 da l'Elena Dement'eva) e gl'utàṿ a Antwerp (6-4 1-6 6-7 da la Katarina Srebotnik), mancànd invéci al qualificasiòṅ a Sydney e a Parì a 'l quèrt. In Mars a Indian Wells la bat la Martina Suchá 6-0 6-1 e la Jelena Janković 2-6 6-2 6-4 prima ad pigàr-as a la Kim Clijsters 1-6 6-7 e pò la cata sù sōl tri prim tùran, a Miami la ciàpa un 5-7 3-6 da la Marija Kirilenko, a Varsàvia un 6-7 1-6 da la Julia Vakulenko e a Berlîṅ un 4-6 3-6 da la Mary Pierce. In Maǵ, dòp un secónd tùr'n a Róma, la riva in di quàrt a Ìstanbul, in dua la pèrd fàcil da la Venus Williams 2-6 1-6, e a 'l tèrs tùran a 'l Roland Garros in dua la patìs un 1-6 4-6 da la Marija Šarapova. In sl'èrba ingléśa la riva in di quàrt a Birmingham (4-6 6-7 da la francéśa Tatiana Golovin) e in di utàṿ a Eastbourne (6-1 4-6 6-7 da la Svetlana Kuznecova) ma pò la fà 'l valìś subìt a Wimbledon (4-6 2-6 da la Jelena Janković). In sal cimènt americàṅ la śōga bèṅ faghénd i quàrt a San Diego (3-6 4-6 da l'Akiko Morigami), gl'utàṿ a Los Angeles (baténd la Na Li e l'Iveta Benešová prima ad cédar in tri sét a la Marija Šarapova) e la semifinàl a New Haven (3-6 3-6 da la Lindsay Davenport). A gl'US Open invéci la riva a 'l tèrs tùran in dua la pèrd da l'Elena Dement'eva 1-6 6-4 6-7. La finìs pò 'l an mâl cun quàtar prim tùr'n ad fila, sfilaràda ch'la taca cun al 3-6 3-6 patî a Filderstadt da la Francesca Schiavone, ma almànc la ś mét a la puśisiòṅ trénta-tri dal ranking dal fémni.

In dal 2006 la rusa la pòrta a cà quèl sōl in Mars quànd la riva in di utàṿ in di turnèo americàṅ 'd Indian Wells e ad Miami, pardénd da l'Ana Ivanović 3-6 3-6 e da l'Anastasija Myskina 3-6 2-6. In sla tèra rósa ad Varsàvia la bat la Jelena Janković 7-5 6-3, la Daniela Hantuchová 6-4 6-3 e l'Ana Ivanović 4-6 6-2 6-4 ma in semifinàl la vèṅ sćiancàda sénsa dascùtar da la Svetlana Kuznecova par 1-6 1-6. In séguit la riva a 'l tèrs tùr'n a Berlîṅ (4-6 2-6 da l'Amélie Mauresmo), a Birmingham (4-6 3-6 da la Vera Zvonarëva) e a Wimbledon (2-6 3-6 da la Justine Henin) mént'r a 'l Roland Garros la pèrd a 'l secónd tùran da la cinéśa Na Li par 5-7 3-6. In sal cimènt americàṅ la fà i quàrt a San Diego e gl'utàṿ a gl'US Open mént'r a Montreal la gh'à da bandunàr in semifinàl cun la Martina Hingis ch'l'éra avànti sèg 6-3 3-1. In Aṿtòṅ la vins dū tìtui in dū stmani, prima a Cantòn (6-1 6-4 a l'Anabel Medina Garrigues) e pò 'l impurtànt Tier I ad Mósca cun la Čakvetadze la mét in riga la Francesca Schiavone par 7-6 6-4 e anc al rusi Dinara Safina par 6-1 6-2, Marija Šarapova par bandòṅ, Elena Dement'eva par 7-5 3-6 6-0 e pò Nadia Petrova par 6-4 6-4. Cun i tarśènt punt mis in bisàca (e cun i vint-sinc dal secónd tùr'n ad Linz), l’Anna la dvénta la nùmar trédas dal mónd.

La Čakvetadze tòlta śò in dal 2007
L'Anna a 'l servìsi a Carlsbad

La rusa la partìs in quàrta in dal 2007 vinsénd al tìtul 'd Hobart baténd in finàl la Vasilisa Bardina 6-3 7-6 e pò rivànd in di quàrt a gl'Australian Open in dua però la pèrd da la Marija Šarapova par 6-7 5-7. In séguit la patìs dū scunfìti da la nùmar tri dal mónd Amélie Mauresmo a Parì a 'l quèrt in di quàrt par 6-7 5-7 e a Antwerp in semifinàl par 3-6 6-3 2-6. In di Stat Unî la riva in di quàrt a Indian Wells (4-6 6-7 da la Shahar Peer, dòp avér mandâ a cà la carta salvàdga Marija Kirilenko) e in semifinàl a Miami in dua la dà la paga a la Mara Santangelo par 6-1 7-5 e a la Na Li par 4-6 7-5 6-2, prima ad cédar a la nùmar òṅ dal mónd, la Justine Henin, par 2-6 3-6. In sla tèra rósa la gh'à 'n inìsi ad stagiòṅ difìcila parchè prima la gh'à da bandunàr in dal tèrs sét cun la Jelena Janković in dal sò incóntar di quàrt a Varsàvia e pò la vèṅ mandàda a cà a 'l secónd tùr'n ad Róma par la Lucie Šafářová 4-6 4-6 dòp avér batû la Samantha Stosur 3-6 7-6 7-6. Cun i trénta-sinc punt tedésc però l’Anna la gh la cava a dvintàr una dal primi déś śugadōri dal mónd. La rusa la cata incóra la Šafářová in di utàṿ dal Gran Slam pariśèṅ e 'sta vòlta la la bat par 6-4 0-6 6-2 par pò andàr fóra in di quàrt śugànd cun la Marija Šarapova. In Śugn a 'S-Hertogenbosch la i fà fóra tuti, tacànd cun un 5-7 6-2 6-2 mulâ a na śóvna Viktoryja Azaranka e cuntinuànd cun al 6-4 7-6 dâ a la Francesca Schiavone. In di quàrt la rusa la bat l'Angelique Kerber 6-2 6-2 e pò anc la Daniela Hantuchová par 6-3 6-4. In finàl la śōga cun la nùmar tri dal mónd, la Jelena Janković. Avénd-ag la méj sèg cun al puntéǵ ad 7-6 3-6 6-3, la Čakvetadze la s mét in bisàca al sò quàrt tìtul WTA, al prim in sl'èrba. Dòp avér fat al valìś a 'l tèrs tùr'n ad Wimbledon, la rusa la vins al turnèo ad Cincinnati (6-1 6-3 a l'Akiko Morigami) e anc qvél ad Stanford, baténd fàcil la Sania Mirza par 6-3 6-2. A San Diego la s cava la vója ad dar śò a 'l péni a la Venus Williams par 6-7 7-6 6-2 prima ad cédar in semifinàl a la Marija Šarapova, la sò bistiàsa négra, par 3-6 2-6. Cun la semifinàla śugàda in Setémbar a gl'US Open cun la Svetlana Kuznecova (e pardùda par 6-3 1-6 1-6) l’Anna la tóca al sò best ranking, al nùmar sinc. Da 'd lè in avànti, in di turnèo WTA ad Lussembûrgh, Stucàrda e Mósca, la rusa la vins sōl 'n incóntar, pôc da piò a Linz in dua la bat dòp un bye la Francesca Schiavone 6-0 6-2 prima ad vgnir sćiancàda dal tut in di quàrt da la Patty Schnyder 1-6 0-6.

La rusa la n taca minga tant bèṅ al 2008 parchè a Sydney la và fóra subìt cun la Katarina Srebotnik par 5-7 1-6 e a gl'Australian Open la bat sōl l'Alisa Klejbanova parchè la daśgrasiàda Andrea Petković la n s fà gnanc védar par 'n infurtùni e la Marija Kirilenko la gh dà la paga a 'l tèrs tùran par 7-6 1-6 2-6. If Favràr però al ròbi i càmbian e dimóndi par lē parchè la pòrta a cà al tìtul ad Parì a 'l quèrt. In Frància la rusa prima la fà arbasàr al crésti a 'l francéśi Nathalie Dechy, Amélie Mauresmo e Marion Bartoli e pò la règla l'ungheréśa Ágnes Szávay in finàl par 6-3 2-6 6-2. Dòp dū scunfìti a gl'inìsi di turnèo ad Antwerp (3-6 5-7 da la śvedéśa Sofia Arvidsson) e ad Doha (6-7 4-6 da la Na Li), la rusa la tōś part in Favràr a 'l turnèo ad Dubai. Dòp avér batû dū top vint cuma l'Agnieszka Radwańska 6-2 2-6 6-4 e la Dinara Safina 6-7 6-4 6-3, la śōga i quàrt cun la Jelena Janković ma in sal 6-1 par la sèrba l'è custréta a bandunàr e pò la s férm' anc p'r al méś a vgnir. A Miami e a Amelia Island la bat la Tamira Paszek e l'Ayumi Morita par pò andàr fóra cun la Sabine Lisicki 5-7 1-6 e la Dominika Cibulková 2-6 6-3 1-6. A Charleston e a Berlîṅ invéci la và a cà subìt cun la Sorana Cîrstea e la Viktoryja Azaranka. A Róma la s armét a pòst e la riva in semifinàl baténd la Kateryna Bondarenko 3-6 7-6 6-0, l'Agnieszka Radwańska 6-4 1-6 6-1 e la Cvetana Pironkova 6-2 3-6 6-1 ma pò la céd a la qualificàda Alizé Cornet dòp avér purtâ a cà sèg al prim sét. A 'l Roland Garros la fà secónd tùran (4-6 6-7 da la Kaia Kanepi) mént'r a Wimbledon la và fóra in di utàṿ cun la Nicole Vaidišová. Dòp dū scòpli cun la Marion Bartoli a Stanford e a Montreal, la rusa la pèrd la finàl ad New Haven, 6-3 4-6 1-6 da la Caroline Wozniacki. L'è al sò ùltim cólp ad sćiòp parchè in di àtar siē turnèo d'l an la vins sōl dū partìdi (cun l'Iveta Benešová a Pechîn e cun la Mathilde Johansson in Lussembûrgh), tacànd da 'l 6-1 2-6 3-6 patî da l'Ekaterina Makarova a gl'US Open, e acsè la finìs 'l an śliciànd a 'l 18śum pòst.

Dòp 'n inìsi dal 2009 da daśmindgàr, la rusa la riva in di utàṿ a Róma, Madrid, Eastbourne e Los Angeles pardénd da Venus Williams, Al'ona Bondarenko, Marion Bartoli e Agnieszka Radwańska. A New Haven la pèrd in di quàrt da l'Elena Vesnina par 1-6 5-7 mént'r a gl'US Open la bat a 'l prim tùran la giapunéśa Yurika Sema 4-6 6-1 6-2 prima ad lasàr strada a la Vera Zvonarëva par 6-3 1-6 1-6. Da lè a la fiṅ d'l an la śōga sōl a Mósca in dua la pèrd subìt da l'Al'ona Bondarenko par 4-6 3-6 e acsè la cróda śò a la puśisiòṅ stanta.

La rusa la tira 'n drit a Róma in dal 2009

Anc in dal 2010 la taca mâl la stagiòṅ, faghénd prim tùr'n a Auckland (1-6 2-6 da la Kimiko Date-Krumm), a gl'Australian Open (3-6 6-3 2-6 da la Flavia Pennetta), a Miami (5-7 6-3 4-6 incóra da la Date-Krumm), a 'l Roland Garros (7-5 6-7 4-6 da l'Angelique Kerber) e a Praga (2-6 3-6 da la Ksenija Pervak), mént'r a Hobart, Varsàvia e Eastbourne la n è bòna gnanc ad pasàr al qualificasiòṅ. La taca a vìnsar dimóndi invéci da Luj in avànti, parténd da 'l tìtul ad Pòrtrōś (da nùmar sènt-tri dal mónd) in dua la mét in riga l'Ekaterina Makarova 6-4 6-1, la Sara Errani 6-1 6-2, la Vera Duševina 2-6 6-3 7-5, la Polona Hercog 0-6 6-2 6-2 e la Johanna Larsson 6-1 6-2. In Agóst la pasa 'l qualificasiòṅ a Cupenàghen e la riva in semifinàl batùda par 6-1 2-6 6-4 da la Caroline Wozniacki. Sèmp'r in Istâ la vins 'l ITF dal Bronx dand la paga, fra gl'atri, a la Lucie Šafářová, a l'Ekaterina Makarova e a la Sofia Arvidsson in finàl. La sèra 'l an baténd la Na Li a Mósca 6-4 6-2 par pò andàr fóra anca lē in di quàrt ad òpra dla Vera Duševina par 3-6 6-7.

In dal Śnar dal 2011 la śōga in Austràglia a Brisbane, Hobart e Melbourne paténd dū scòpli a 'l prim tùran da la Ksenija Pervak e da la Sara Errani e una a 'l secónd tùran di Australian Open ad òpra dla Petra Kvitová par 3-6 4-6. In Favràr la bat fàcil la Daniela Hantuchová in Dubai par pò śugàr cun la nùmar dū dal mónd, la Caroline Wozniacki. Dòp avér patî un 1-6 a 'l inìsi, la rusa la mét sóta la danéśa in dal secónd sét. In sal 5-3 par lē, la Čakvetadze la fà 'n stramàs par tèra dòp avér pardû i sèns. Quànd pò a riva lè un dutōr-dóna par far-ag tgnir 'd òć un dî in muimènt par védar s'la fus in bóla, lē la n gh la cava minga e l'è custréta a bandunàr. La rusa la s férma p'r un méś pinsànd ch'al mâl al fus un virus in dal budèli e la tórna in si camp in Mars a Indian Wells. Al giōran 13 'l arbgàt al s fà però viṿ incóra durànt 'l incóntar dal secónd tùran cun la Marija Kirilenko. In sal puntéǵ ad 6-1 3-5 par ch'l'atra, l’Anna la stà mâl incóra. Purtàda a 'l uśdàl, i dutōr i gh càtan na sincope neurocardiogena, un mâl ch'al pōl purtàr stufìśia, urt dal gòmit, debulésa, presiòṅ basa e prilamènt ad tèsta. In Avrìl la rusa la próa a turnàr a śugàr in sla tèra rósa quèrta ad Stucàrda. Dòp avér pasâ bèṅ al qualificasiòṅ dal turnèo tedésc però al sò distùrub al s fa viṿ incóra méntar lē l'éra in sal 6-1 5-7 4-4 cun la Zuzana Kučová. Dòp dū prim tùran in sl'èrba ad 'S-Hertogenbosch (4-6 1-6 da la Lourdes Domínguez Lino) e ad Wimbledon (2-6 1-6 da la Marija Šarapova), la Čakvetadze la gh dà a muć, pruànd a far caréra, sénsa però cavàr-'g-la, in pulìtica.

La rusa la próa a turnàr in si camp ad tènis in dal 2012 ma la fà fadìga parchè in cal méntar l'éra śliciàda da 'd là da la puśisiòṅ 200. A Hobart la riva in di quàrt, pò la pasa 'l qualificasiòṅ a Cupenàghen, Stucàrda e Róma ma pò la céd subìt a 'l prim tùran. Al sò ùltim turnèo dla caréra, śugâ da nùmar 261 dal ranking, 'l è qvél ad Taškent. La partìda pardùda in di utàṿ cun la Galina Voskoboeva par 1-6 3-6 'l è al sò cant dal sign.

Fat curiōś

'N arvèrs tirâ cun dal lansōr da la rusa a gl'US Open dal 2009
  • Durànt la partìda ad Fed Cup śugàda in Iśraēl cóntar la Tzipora Obziler la s è misa a rispóndar in na mala manéra a 'l pùblic ch'la la saplìva 'd fisć, faghénd anc fésta cun di at ad śgarbarìa quànd la fava punt;
  • Durànt la finàl dal turnèo ad Stanford dal 2007 la n è minga stada bòna ad rispóndar a 'n servìsi dla Sania Mirza, pardénd acsè al punt, parchè la sò trésa 'd cavìi l'éra 'rmàśa in dal mént'r atàc a la rachéta;
  • Al 19 ad Dicémbar dal 2007 un grup ad bandî armâ i èṅ andâ ad bòṅóra dènt'r a cà sua a Mósca par purtàr-ag via cun la fòrsa i sò òr e di bèsi. Lē l'éra là insém a la sò famìja e al sò fradèl pìcul;
  • A gh piàś sunàr al piàṅ;
  • In dal Dicémbar dal 2011 la Čakvetadze la s è candidàda p'r un partî ad dèstra p'r andàr a far part di parlamentàr dla Duma ma la n gh l'à minga cavàda.

Culegamènt estéran