Laura Siegemund

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn


La Laura tòlta śò in dal 2015


La Laura Siegemund (Filderstadt, 4 ad Mars dal 1988) l'è na tenìsta tedésca. L'è élta 168 cm e la péśa 62 chilo, la dróa 'l bras dèstar e la tira 'l arvèrs a dū maṅ. L'è prufesiunìsta da 'l 2006 e l'è bòna ad dascórar in tedésc, ingléś e francéś.

In dla sò caréra l'à vins tri tìtui WTA in dópi (cun l'Asia Muhammad, cun l'Annika Beck e cun la Mona Barthel) e ùndas tìtui ITF in singulàr. In dal Śnar dal 2016 l'è rivàda a èsar la nùmar utànt'òt dal mónd.

Caréra

La tedésca la śōga i sò prim turnèo in dal 2002 pardénd tut i sò quàt'r incóntar fat. In dal Setémbar dal 2003 la próa a qualificàr-as p'r al turnèo ad Lìpsia ma la pèrd subìt cun la Mara Santangelo. La stmana dòp però la riva in di quàrt d'l ITF ad vintsìnc-mila dòlar ad Pòrto (Purtugàl).

Un drit dla tedésca
Cal grintèṅ dla Siegemund
La Laura a Wimbledon in dal 2015
La Laura la sa ślunga cun 'l arvèrs

La taca 'l 2005 faghénd quàtar quàrt ITF in Śnar e in Favràr, pò dū semifinài in ITF da déś-mila dòlar tedésc. In Agóst la bat na śèrba Carla Suárez Navarro in dal qualificasiòṅ a Hechingen ma pò la pèrd a 'l prim tùran da la Kirsten Flipkens. In Setémbar la riva in di quàrt in d'l ITF libanéś ad Jounieh (stantasìnc-mila dòlar) in dua la pèrd par 2-6 3-6 da la Lourdes Domínguez Lino. La finìs 'l an a la puśisiòṅ 353 dal mónd.

In dal 2006 la pèrd da la Kirsten Flipkens, par dū vòlti da la Sara Errani e da l'Agnieszka Radwańska in di sò prim quàtar turnèo ITF śugâ. In Agóst la céd in semifinàl a la Julia Görges in d'l ITF cic ad Wahlstedt. In Nuvémbar la vins al sò prim tìtul in d'l ITF ad Majòrca (al nùmar 3).

In dal 2007 la fà la semifinàl a Lecce e a Réś ad Calàbria e pò la finàl a Jounieh, tut turnèo ITF da vintsìnc-mila dòlar. In dal 2008 la cumbìna pôc, giùst gl'utàṿ in d'l ITF da stantasìnc-mila dòlar ad Dubài (al nùmar 2).

In dal Mars dal 2009 La riva in semifinàl e pò in finàl in dū ITF da vintsìnc-mila dòlar pò in Mars la bat l'Alison Riske a Indian Harbour Beach prima 'd pèrd'r in finàl da la Melanie Oudin par 5-7 7-5 2-6. Da Luj a la fiṅ d'l an però la pèrd déś partìdi su ùndas śugàdi. La finìs in tut al manéri la stagiòṅ a la 227śma puśisiòṅ dal ranking.

In dal 2010 pèrd da la Michaella Krajicek in finàl a Charlottesville dòp avér fat fóra la Madison Brengle e la Nastas'sja Jakimava. In Luj la śōga finalmènt la sò prima partìda in un turnèo WTA a Båstad ma la la pèrd par 2-6 3-6 cun l'Arantxa Rus.

In dal Śnar dal 2011 la s mét in bisàca 'n ITF su la tèra a Lutz baténd la Jessica Pegula par 6-7 6-1 6-2. In Maǵ la tōś part a 'l ITF ad Réś ma la và fóra subìt cun la Marina Eraković. In dal 2012 la vins 'l ITF ad Darmstadt in Luj cóntar l'Anna Karolína Schmiedlová in finàl. La tedésca la gh cata gust e la fà àtar tant in di dū ITF tedésc a vgnir più cic. Cun chi tri tìtui chè la Laura la pasa da la puśisiòṅ 446 a la puśisiòṅ 374.

In dal 2013 la vins anc a Jackson tulénd-as la sudisfasiòṅ ad bàtar na śōvna Belinda Bencic in dal qualificasiòṅ. In Śugn la Siegemund l'incróśa incóra la śvisra in semifinàl a Lenzerheide e la la bat par 6-2 6-4 pò la règhla anc la Beatriz Haddad Maia par 6-2 6-3 e acsè la pòrta a cà 'l tìtul faghénd àtar tant anc la stmana dòp in 'n àt'r ITF da vintsìnc-mila dòlar. La sèra 'l an in sla tèra 'd Caśablànca in dua la riva in semifinàl, muciànd acsè di punt par rivàr a 'l 235śum pòst.

Anc al 2014 al s vèra bèṅ par lē ch'la vins un tìtul e la fà dū semifinài in di prim tri ITF da vintsìnc-mila dòlar śugâ. In Avrìl la bat la Julija Putinceva in finàl a Pelham vinsénd 'n àtar turnèo. La próa a qualificàr-as p'r al turnèo Premier ad Stucàrda ma la ciàpa na scòpla da la Gioia Barbieri ch'la gh mòla 'n 6-0 6-1. In Maǵ la và davśèṅ a la qualificasiòṅ a 'l Roland Garros ma a 'l ùltim la gh'à da pigàr-as a la Timea Bacsinszky in tri set. A Bad Gastein la fà sudàr dimóndi la Carla Suárez Navarro prima 'd pèrdar sèg par 6-7 6-1 4-6. Ma la prima vìnsida in dal sircùit prinsipàł la n tarda minga dimóndi a vgnir parchè la riva a Båstad: 7-5 6-3 a la Jaroslava Švedova. In Agóst la lasa 'l tìtul ITF 'd Hechingen a cl'atra tedésca, la Carina Witthöft, par 6-4 4-6 3-6. La finìs 'l an a Sharm el-Sheikh in dua la pèrd àtar dū finàli, sèmpar cun l'Evgenija Rodina.

In dal 2015 la s qualìfica in dal turnèo ad Charleston baténd la Françoise Abanda e pò sćiancànd la Kimiko Date-Krumm par 6-0 6-1 ma a 'l prim tùran la céd a l'Irina-Camelia Begu par 2-6 6-7. In Avrìl la i pasa anc a Marrakech in dua la fà sudàr la Flavia Pennetta in dal sò incóntar dal secónd tùran. A Wimbledon la s cava la sudisfasiòṅ ad śugàr cun la Svetlana Kuznecova la sò prima partìda in un Major. In Luj la riva in di quàrt in dal turnèo WTA ad Flurianòpulis (Braśìl) ma la céd a la padròna 'd cà, la Teliana Pereira, par 3-6 5-7. In Setémbar la śōga dū finàli ITF in Frància vinsénd cun la Romina Oprandi a Biarritz e pardénd da la Dar'ja Kasatkina a Saint-Malo. In dal turnèo dal Lussembûrgh la bat la Timea Bacsinszky e pò la Kirsten Flipkens prima ad lasàr strada a la Stefanie Vögele in di quàrt par 4-6 6-2 1-6. La tedésca la gh la cava finalmènt a rivàr a èsar una dal primi sènt śugadōri dal mónd, la nùmar 90.

A gl'Australian Open dal 2016 la Siegemund la bat dū òs dûr cuma la Kiki Bertens par 6-4 7-5 e la Jelena Janković par 3-6 7-6 6-4 ma pò la n pōl far gnint cun l'Annika Beck ch'la pasa 'l tùran sèg par 6-0 6-4. A San Pirenbûrg, dòp avér pasâ 'l qualificasiòṅ, la vins anc cun la Kristina Mladenovic par 1-6 7-5 6-1 ma pò la céd a la padròna 'd cà, la Dar'ja Kasatkina. Dòp èsar stada batùda subìt a Kuala Lumpur par la turca Çağla Büyükakçay, la teutóniga la fà secónd tùr'n anc a Indian Wells (2-6 1-6 da la Serena Williams) ma pò la và a bàtar la Madison Keys a Charleston, 6-7 6-4 6-4 al puntéǵ.

Culegamènt estéran