Carina Witthöft

Da Wikipedia.

C'l artìcul chè 'l è scrit in Miranduléś Emiliàn


Un prim piàṅ dla tenìsta Carina


La Carina Witthöft (Ambûrg, 16 ad Favràr dal 1995) l'è na tenìsta tedésca. L'è élta 176 cm e la péśa 68 chilo, la dróa al bras dèstar e la tira 'l arvèrs a dū maṅ. L'è nada 'l stés dè dl'Annika Beck, sōl 'n an dòp.

L'è stada la nùmar sinquànta dal mónd al 13 ad Luj dal 2015 e in dla sò caréra l'à vins ùndas tìtui ITF.

Caréra

La tedésca la taca a pistàr i camp dal sircùit ITF a quatór's an in dal 2009 e la riva subìt in semifinàl in un turnèo ad déś-mila dòlar. In dal 2010 la próa a qualificàr-as p'r al Premier ad Stucàrda incruśànd subìt la Barthel ma la Carina la pèrd da la Mona par 4-6 5-7. 'L an dòp la fà àtar tant in dal Premier Mandatory ad Miami ma la Christina McHale la la manda a cà par 6-2 6-2. In Avrìl la vins al sò prim tìtul ITF in Germâgna pò a la fiṅ d'l an la bat la Patricia Mayr-Achleitner a Ismaning par pò céd'r a la Tatjana Maria in di utàṿ srand la stagiòṅ a 'l 405śum pòst.

La s fà nutàr in dal 2012 quànd a Stucàrda la bat in dal qualificasiòṅ la nùmar quarànta-dū dal mónd, la Cvetana Pironkova. In Śugn la s mét in bisàca 'n ITF da vintsìnc-mila dòlar pò in Luj da qualificàda la tōś part a 'l sò prim evènt WTA a Båstad ma la pèrd a 'l prim tùran da la Kateryna Bondarenko. In sal cimènt ad Wrexham (Régn Unî) la vins 'n àt'r ITF baténd in finàl la Donna Vekić par 6-2 6-7 6-2. La sèra 'l an pardénd cun l'Annika Beck la semifinàl 'd Ismaning (ITF da stantasìnc-mila dòlar) baténd però la Patricia Mayr-Achleitner, la Barbora Strýcová e l'Anastasija Rodionova.

La Witthöft in alenamènt

In dal 2013, cóntar l'Erika Sema e la Casey Dellacqua, la s qualìfica par la prima vòlta p'r un turnèo dal Gran Ślam a Wimbledon ma l'èrba l'è catìva sèg parchè la Kimiko Date-Krumm, ch'la prév èsar sò màdar avénd vint-sinc an da piò, la gh dà na lesiòṅ d'arcuràr dimóndi, 6-0 6-2 al puntéǵ par la giapunéśa. A Bad Gastein la tōś na carta salvàdga ma la n la dasfrùta minga bèṅ esénd ch'la và a cà subìt par 3-6 3-6 cun l'Irina-Camelia Begu. In Agóst la vins 'n ITF da vint-sinc mila dòlar in Germâgna pò la in pèrd 'n àt'r in Ulànda cóntar l'Arantxa Rus in finàl. A Sòfia in Setémbar la gh'à da bandunàr cun la qualificàda Gioia Barbieri ch'l'éra in tut al manéri avànti sèg par 6-3 3-0. In dal qualificasiòṅ in Lussembûrgh la bat la Camila Giorgi par 7-6 6-2 ma minga la Katarzyna Piter. La tedésca la s piàsa a 'l 210śum pòst dal ranking.

In dal 2014 la s qualìfica par gl'Australian Open ma la n pasa minga 'l prim tùran cun la Mandy Minella. In Agóst la vins 'n àt'r ITF a Hechingen (paiśèṅ dal Baden-Württemberg), pò àtar dū ad fila in Setémbar (a Saint Malo la sćiànca par 6-0 6-1 l'Alberta Brianti). La stmana dòp par pôc la n in mét in bisàca 'n àt'r a Shrewsbury ma la francéśa Océane Dodin la la bat in sal più bèl. In tut al manéra ch'al filòt lè al la cùcia fra 'l primi sènt-vint śugadōri dal mónd. La tedésca la gh cata gust e la riva in finàl anc in d'l ITF da sinquànta-mila dòlar ad Joué-lès-Tours ma l'Urszula Radwańska la gh'à la méj sèg par 6-3 7-6.

La Carina impgnàda a 'l Roland Garros dal 2015

In dal 2015 la gh dà dèntar dimóndi. Dòp avér mancâ la qualificasiòṅ a Hobart cun cla ciciòna dla Taylor Townsend, a gl'Australian Open la fà fóra la Carla Suárez Navarro par 6-3 6-1 e pò la Christina McHale par 6-3 6-0 ma a 'l tèrs tùran la fà 'l valìś cun l'Irina-Camelia Begu (la céd 4-6 4-6). In Favràr la bat l'Antonia Lottner par 6-3 6-4 e la vins 'n ITF tedésc da vintsìnc-mila dòlar. A Kuala Lumpur la riva par la prima vòlta in di quàrt 'd un turnèo WTA ma la Caroline Wozniacki l'è 'n òs tròp dûr par lē da ruśgàr. A Stucàrda la vins cun la Mona Barthel 7-5 6-3 e pò la cumbàt cun la Caroline Garcia ma l'è la francéśa a vìnsar par 7-6 6-2. In Maǵ la s mét in bisàca 'l impurtànt ITF ad Cagnes-sur-Mer (sènt-mila dòlar) dand la paga a la Tatjana Maria, atra tedésca. A Nurimbèrga la fà incóra i quàrt (0-6 4-6 da la Lara Arruabarrena Vecino) pò la và a śugàr a 'l Roland Garros in dua la và fóra a 'l secónd tùran in tri sét cun la rumagnōla Sara Errani. In sl'èrba ad 'S-Hertogenbosch, ad Birmingham e ad Wimbledon la n vins gnanc 'n incóntar, specialmènt in dal Ślam ingléś la ciàpa na patnàda minga da rìdar da l'Angelique Kerber ch'la la spasa via par 6-0 6-0. La Witthöft la s fà sù 'l mandghi e la vins subìt 'n àt'r ITF da sinquànta-mila dòlar a Versmold, in finàl cóntar la śvedéśa Johanna Larsson par 6-3 6-3. Par la Carina a riva un bèl nùmar sinquànta in clasìfica.

Culegamènt estéran