Dar'ja Kasatkina

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn


La rusa tòlta śò in dal 2013


La Dar'ja Kasatkina, (Togliatti, 7 ad Maǵ dal 1997, Дарья Сергеевна Касаткина in Rus) l'è na tenìsta rusa ch'l'è stada la nùmar trénta-sinc dal mónd al 4 'd Avrìl dal 2016. L'è élta 170 cm par 62 chilo e la dróa 'l bras dèstar tirànd 'l arvèrs cun dū maṅ. L'è bòna 'd dascórar in rus e in ingléś. Al drit 'l è 'l cōlp ch'a gh piàś da piò śugàr.

In dla sò caréra l'à vins un tìtul WTA in dópi, insém a l'Elena Vesnina, e sèt ad qvéi dal sircùit ITF.

Caréra

La rusa la tira i sò prim cōlp in dal sircùit ITF in dal 2013 in dua la riva in di quàrt a Antàglia a séd'ś an.

I pàsan pôchi stmani e la Kasatkina la in vins òṅ a 'l inìsi dal 2014 a Sharm el-Sheikh in dua la fà anc na semifinàl. Dòp un sucès in 'n ITF geurgiàṅ da vintsìnc-mila dòlar in Setémbar, al méś dòp la và a śugàr la Kremlin Cup a Mósca cun na carta salvàdga in bisàca ma la và fóra subìt cun l'Alison Riske par 1-6 2-6.

'N arvèrs tirâ cun la cóa di cavìi in sal grugn

In dal 2015 la taca la stagiòṅ in Flòrida a Plantation in dua, pasànd al qualificasiòṅ, la riva in semifinàl pardénd da la Sachia Vickery par 6-7 6-7. Subit dòp però la rusa la vins al tìtul a Daytona Beach e pò la mùcia sù na semifinàl e 'n quàrt sèmp'r in ITF da vintsìnc-mila dòlar su di camp in tèra batùda. Chi turnèo lè i gh piàśan dimóndi e difàti in Maǵ e in Śugn la in vins àtar tri a Caśèrta e a Minsk. In Istâ la śōga dū international a Bùcarest e a Bad Gastein pardénd a 'l prim tùr'n in Rumanìa (6-7 4-6 da la Julia Görges) e in di quàrt in Àustria (3-6 6-3 2-6 da la Sara Errani). In Setémbar la tōś part a gl'US Open cuma pardènta furtunàda dòp che la Marija Šarapova la s éra scanślàda a 'l ùtim minùt. Chè la bat la Dar'ja Gavrilova par 6-2 4-6 7-5 e l'Ana Konjuh par 6-4 6-4 prima 'd lasàr strada a la Kristina Mladenovic par 2-6 3-6. In Setémbar la vins invéci 'l impurtànt turnèo ITF da sinquànta-mila dòlar ad Saint-Malo baténd la Kaia Kanepi, la Lourdes Domínguez Lino e la Laura Siegemund. La sèra 'l an a 'l 72śum pòst in clasìfica faghénd na semifinàl a Mósca (6-2 2-6 4-6 da l'Anastasija Pavljučenkova) dòp avér batû la nùmar quatórdas dal mónd, la Carla Suárez Navarro, in di quàrt.

La tenìsta 'd Togliatti la vèra la stagiòṅ 2016 a la granda baténd subìt la nùmar sèt dal mónd Venus Williams a Auckland ma pò la ciàpa la paga da sò surèla Serena a 'l tèrs tùran di Australian Open pardénd sèg par 1-6 1-6. A San Pirenbûrg la riva in semifinàl in dua la céd a la Belinda Bencic par 4-6 3-6. A Doha la fà sudàr dimóndi la Roberta Vinci, pardénd sèg par 6-2 4-6 6-7, pò la riva in di quàrt a Indian Wells (6-3 6-2 al puntéǵ par la Karolína Plíšková). A Miami invéci la và fóra a 'l secónd tùran cun la Simona Halep.

Culegamènt estéran