Johanna Konta

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn


La Johanna tòlta śò in dal 2015


La Johanna Konta (Sydney, 17 ad Maǵ dal 1991) l'è na tenìsta britànica nada in Austràglia ma dvintàda britànica in dal Maǵ 2012. L'è élta 180 cm e la péśa 70 chilo, la dróa al bras dèstar e la tira 'l arvèrs a dū maṅ. L'è bòna 'd dascórar in ingléś e in ungheréś.

L'è stada la nùmar quarànta-siē dal mónd al 19 'd Utóbar dal 2015 e in dla sò caréra l'à vins ùndas tìtui ITF.

Caréra

La Johanna la vins al sò prim tìtul ITF in dal 2008 pò la in vins 'n àtar da vintsinc-mila dòlar 'l an dòp. In dal 2010 la pasa a śugàr qvéi da sinquànta-mila in dua in Maǵ la vins a Releigh. In dal 2011 la pasa 'l qualificasiòṅ a Cupenàghen ma la pèrd a 'l prim tùran da la Lucie Šafářová par 6-4 5-7 3-6. In Luj la s mét in bisàca 'l ITF ad Woking (Régn Unî) baténd al śugadōri 'd cà, la Melanie South e la Laura Robson in finàl. La sèra 'l an a la puśisiòṅ 305 dal mónd.

In dal 2012 la s mét in bisàca 'l tìtul ITF ad Rancho Mirage, turnèo in dua la bat lung la via la Nastassja Burnett e la Lauren Davis. In Avrìl la vins al sò prim incóntar dal sircùit WTA a Cupenàghen ma pò la pèrd da la Petra Martić par 2-6 3-6. In Śugn, dvintàda na śugadōra britànica, la ciàpa na carta salvàdga par śugàr a Wimbledon ma la n la dasfrùta briśa pardénd par 7-6 2-6 8-10 da la Christina McHale. In Luj la riva in finàl in d'l ITF ad Lexington pardénd da la Julia Glushko. In Istâ la pasa 'n tùran a gl'US Open cun la Tímea Babos ma pò la céd in tri sét a la Ol'ga Govorcova. A la fiṅ d'l an la pèrd in dal qualificasiòṅ in Lussembûrgh da la Garbiñe Muguruza Blanco par 6-4 3-6 5-7 e da la Nastassja Burnett a Poitiers par 3-6 6-2 4-6.

Un servìsi dla Konta a Wimbledon 2012
'N arvèrs dla britànica

La Konta la taca la stagiòṅ 2013 a Brisbane ma la n pasa minga 'l qualificasiòṅ cun la Lesja Curenko. In cà sua, cun quàtar carti salvàdghi a sò favōr, la śōga in sl'èrba a Nottingham (ITF in dua la pèrd in semifinàl da la Karolína Plíšková dòp avér batû l'Alison Riske), a Birmingham (4-6 1-6 a 'l secónd tùran da la Kristina Mladenovic), a Eastbourne (prim tùran cun la Su-Wei Hsieh) e a Wimbledon (2-6 5-7 da la Jelena Janković in dal prim incóntar). In Luj e in Agóst la vins dū ITF e la sa davśìna acsè a 'l primi sènt dal mónd. In Setémbar a Cantòṅ la riva par la prima vòlta in di quàrt in un turnèo WTA ma la céd par 5-7 3-6 a la cinéśa Shuai Zhang. La fà cumpàgn anc a Ningbo ma la gh'à da bandunàr cun la Johanna Larsson quànd l'éra un sét para.

In di prim tri méś dal 2014 la fà 'n pas indrē e la mùcia sù pôc. In Avrìl la pèrd da la Gioia Barbieri in dal qualificasiòṅ ad Stucàrda ma la pasa listés da pardénta furtunàda par pò farmàr-as par 6-7 4-6 cun la Kaia Kanepi. In d'l ITF ad Saint-Gaudens la riva in semifinàl in dua la pèrd in tri sét da la Pauline Parmentier. In d'l ITF ad Nottingham, al nùmar dū, l'incróśa incóra la Karolína Plíšková e la céd sèg in semifinàl par 5-7 6-7. A Eastbourne l'è bòna 'd bàtar la Belinda Bencic ma minga la Camila Giorgi ch'la vins par 1-6 7-5 7-5. A Quebec City in Setémbar la pèrd subìt da l'Asia Muhammad. La stmana dòp la riva in semifinàl in d'l ITF 'd Albuquerque (Stat Unî) in dua la lasa strada a l'Anna Tatishvili. La tórna in Europa par śugàr al qualificasiòṅ p'r al turnèo dal Lussembûrgh ma la và a cà subìt cun la Gioia Barbieri.

La prima part dla stagiòṅ 2015 l'è da daśmindgàr par la Johanna che pò la s qualìfica p'r al Roland Garros pardénd a 'l prim tùran cun la Denisa Allertová par 6-7 6-4 2-6. In dal turnèo ad Nottingham, prumòs a WTA, la bat la Magdaléna Rybáriková par 6-3 6-3 e la Mónica Puig par 4-6 6-4 7-6 prima ad céd'r in tri sét a la Monica Niculescu in di quàrt. A Eastbourne la fà fóra dū Top Déś cuma l'Ekaterina Makarova e la Garbiñe Muguruza Blanco prima ad pèrd'r in di quàrt da la Belinda Bencic dòp avér purtâ a cà 'l prim sét. In Istâ la vins dū ITF in Cànada baténd la Stéphanie Foretz Gacon e la Kirsten Flipkens e acsè la gh la cava a insfilsàr-'s in dal primi sènt śugadōri a 'l mónd. A gl'US Open, pasànd p'r al qualificasiòṅ, la riva in di quàrt (5-7 3-6 da la Petra Kvitová) miténd in riga prima la Garbiñe Muguruza Blanco e pò l'Andrea Petković. In dal Premier Mandatory ad Wuhan la fà incóra méj parchè la dà incóra 'n daspiaśēr a l'Andrea Petković e pò anc a la Viktoryja Azaranka e a la Simona Halep. La pèrd sōl in di quàrt cun la Venus Williams faghénd-la però sudàr dimóndi (4-6 6-3 5-7 al puntéǵ).

Culegamènt estéran