Anna-Lena Friedsam

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn


La tedésca in dal 2009
La Friedsam tòlta śò in dal 2014
'N arvèrs tirâ a Lussembûrgh in dal 2015


L’Anna-Lena Friedsam (Neuwied, 1 ad Favràr dal 1994) l'è na tenìsta tedésca. L'è élta 174 cm e la péśa 68 chilo, la dróa 'l bras dèstar e la tira 'l arvèrs a dū maṅ. L'è prufesiunìsta da 'l 2011.

In dla sò caréra, in dal sircùit ITF, l'à vins tri tìtui in dópi e dódas in singulàr. In dal Śnar dal 2016 l'è rivàda a èsar la nùmar sinquànta-dū dal mónd.

Caréra

La tedésca la śōga 'l sò prim turnèo ITF in dal 2011 a Ból. In dal sò prim incóntar la fà vgnir al magòṅ a la Bovina baténd-la par 2-6 6-1 6-4, pò la riva anc in finàl ma la la pèrd cun l'itagliàna Evelyn Mayr par 6-7 2-6. La Friedsam la fà cumpàgn anc a Antàglia in Utóbar e a Équerdreville in Nuvémbar baténd l'Alison Van Uytvanck.

A 'l quàrt tintatìṿ, in dal Mars dal 2012, la tedésca la fà sènt'r e 'l turnèo ITF 'd Astàna 'l è suo mént'r a Antàglia, ITF nùmar 12 e 13, l'è l'Anna Karolína Schmiedlová a farmàr-la par dū vòlti in finàl. L’Anna-Lena la fà védar ch'la fà dabòṅ vinsénd quàt'r ITF ad fila a Velenje (6-1 6-3 a l'Agnese Zucchini), a Màribor (2-6 7-6 6-2 a la Teliana Pereira dòp avér batû anc l'Eugenie Bouchard lung la via) e a Padva (6-2 6-2 a la Corinna Dentoni). In Luj e Agóst la fà filòt cun àtar dū tìtui da vintsìnc-mila dòlar. La sèra 'l an a la puśisiòṅ 189 dal mónd.

In dal 2013 la vins 'l ITF ad Sunderland (6-2 7-6 a l'Alison Van Uytvanck) pò la próa a qualificàr-as p'r al Premier ad Stucàrda. Dòp avér batû la Shuai Peng la céd a 'l ùltim a la Bethanie Mattek-Sands par 3-6 4-6. In Maǵ la pasa 'l qualificasiòṅ a Saint-Gaudens (ITF da sinquànta-mila dòlar) pò la bat la Kurumi Nara e la Polona Hercog prima 'd lasàr strada in di quàrt a la Dinah Pfizenmaier. In Istâ la fà suo 'l ITF ad Kazàn, al nùmar 2, dand un 6-2 6-3 a la rusa Marta Sirotkina, pò la vins àtar dū tìtui in Setémbar. La finìs la stagiòṅ cuma 126 dal mónd.

In dal 2014 la taca a pistàr i camp dal sircùit prinsipàł. A Shenzhen la riva a 'l secónd tùran baténd la Bojana Jovanovski par 6-1 7-5 e pardénd pò cun la Jana Čepelová. In Setémbar la fà sènt'r a Suzhou vinsénd un WTA ad qvéi cic baténd la Duan Yingying par 6-1 6-3. In Utóbar a Linz la fà fóra la Dominika Cibulková, la Jana Čepelová e la Stefanie Vögele prima 'd pèrdar in tri set cun la Karolína Plíšková in semifinàl.

In dal 2015 la n và minga tant bèṅ in dla prima part dla stagiòṅ. In Śugn però la s mét in bisàca 'n ITF da sinquànta-mila dòlar a Ilkey (èrba), pò la fà i quàrt a Tashkent (6-3 3-6 5-7 da la Donna Vekić) e finàl a Linz, la sò prima, in dua la bèca 'n 4-6 3-6 da l'Anastasija Pavljučenkova. In Lussembûrgh la bat l'Annika Beck par 4-6 6-3 6-4 ma minga la Stefanie Vögele a 'l secónd tùran. A la fiṅ d'l an la riva a èsar la nùmar 87 dal ranking dal fémni.

La Friedsam la vèra la stagiòṅ 2016 in Cina a Shenzhen. Chè la bat la Bojana Jovanovski par 6-0 6-3, l'Irina-Camelia Begu par 7-5 3-2 bandòṅ e la Kateřina Siniaková par 6-4 2-6 6-1 par pò céd'r a l'Agnieszka Radwańska par 2-6 4-6. A gl'Australian Open la bat la Lourdes Domínguez Lino par 7-6 2-6 6-1, la Qiang Wang par 6-3 6-4 e la Roberta Vinci par 0-6 6-4 6-4. In di Utàṿ la s pòrta avànti 5-2 in dal tèrs set cun l'Agnieszka Radwańska ma la gh'à da céd'r a la fiṅ in làgarmi par 7-6 1-6 5-7 quànd la n in psiva piò da 'l mâł ch'la gh'iva a na gamba par di granfi.

Culegamènt estéran