Alison Van Uytvanck

Da Wikipedia.
Jump to navigation Jump to search
C'l artìcul chè 'l è scrit in Miranduléś Emiliàn


Nürnberger Versicherungscup 2014


L’Alison Van Uytvanck (Vilvoorde, 26 ad Mars dal 1994) l'è na tenìsta bélga prufesiunìsta da 'l 2010. Al sò ranking più bèl l'è al nùmar sènt, tucâ 'l 11 ad Nuvémbar dal 2013. La tenìsta, rósa ad cavìi, la dróa al bras dèstar e la tira 'l arvèrs a dū maṅ. L'è élta 173 cm e la péśa 63 chilo.

L'è bòna ad dascórar in Ulandéś, Ingléś, Francéś e 'n pôc in Tedèsch. A gh piàś pasàr-'s al tèmp a 'l computer e scultànd dla mùśica.

In dla sò caréra l'à purtâ a cà un tìtul WTA 125 (a Taipèi in dal 2013 cóntar la Yanina Wickmayer) e nóṿ ad qvéi ITF.

Caréra

La Uytvanck la śōga al sò prim turnèo ITF in dal 2009. In dal 2011 la riva in finàl in quàtar turnèo ad fila, vinsénd-an tri da déś-mila dòlar. In Maǵ, baténd la Su-Wei Hsieh 6-4 2-6 6-4, la s qualìfica p'r al sò prim turnèo WTA a Bruxelles in dua la riva a 'l secónd tùran pardénd pò par 6-7 4-6 cun la Yanina Wickmayer. In Nuvémbar la s mét in bisàca anc al tìtul ITF ad Sunderland e la finìs 'l an a 'l 297śum pòst.

In dal Śnar dal 2012 la vins 'l ITF ad Glasgow e la riva in finàl in qvél ad Kaarst (Germâgna). In Maǵ la tōś part a 'l turnèo ad Bruxelles par via dna carta salvàdga. Chè la bat la rusa Ksenija Pervak par 6-3 5-7 6-4 e la Chanelle Scheepers par 4-6 6-4 6-2. In di quàrt la céd a la nùmar tri dal mónd, l'Agnieszka Radwańska, par 2-6 1-6.

In dal 2013 la fà suo al turnèo ITF francéś ad vintsìnc-mila dòlar 'd Andrézieux-Bouthéon sénsa lasàr par strada gnanc un sét. La gh tōś gust e l'ardópia anc in qvél śvìsar ad Ciàs in Avrìl. A Bruxelles però la vèṅ sćiancàda 1-6 0-6 da la Julija Putinceva. A Birmingham la pasa 'l qualificasiòṅ par pò bàtar anc l'Ayumi Morita. A 'l secónd incóntar però la và a cà cun un 6-7 3-6 in sal cupét p'r òpra dl'americàna Maria Sanchez. In Luj la tōś part a 'l turnèo WTA ad Bùdapest ma anca chè la vèṅ spasàda via fàcil da l'Yvonne Meusburger par 0-6 2-6. Dòp dū finàli ITF in Setémbar (una vinsa, una pardùda), in Nuvémbar la gh la cava a mét'r-as in bisàca al tìtul WTA 125 ad Taipèi baténd via via l'Ol'ga Alekseevna Pučkova 6-1 6-3, l'Alla Kudrjavceva 6-2 6-4, l'Ekaterina Bychkova 6-3 6-7 7-5, la Dinah Pfizenmaier 7-6 6-3 e la Yanina Wickmayer 6-4 6-2.

Culegamènt estéran