Taylor Townsend

Da Wikipedia.
C'l artìcul chè 'l è scrit in Miranduléś Emiliàn


La Townsend tòlta śò in dal 2011


La Taylor Townsend (Chicago, 16 'd Avrìl dal 1996) l'è na tenìsta americàna vinsidōra dal tìtul di Australian Open di śōvan dal 2012. La dróa al bras sinìstar e la tira 'l arvèrs a dū maṅ. La stà a Boca Raton (Flòrida).

In dla sò caréra l'è rivàda a èsar la nùmar 274 dal mónd al 9 ad Setémbar dal 2013 e l'à vins un tìtul ITF.

Caréra

Dòp avér vins 'n incóntar in dal qualificasiòṅ dal turnèo ITF 'd Amelia Island in dal 2010, in dal Maǵ dal 2011 la Townsend la riva subìt in semifinàl in 'n ITF americàṅ da sinquànta-mila dòlar. In Luj la fà cumpàgn in 'n àtar ITF da déś-mila, prima ad śugàr al qualificasiòṅ a gl'US Open in dua la bat l'Arantxa Parra Santonja e la fà sudàr dimóndi la Laura Robson ch'la gh'à la méj sèg sōl c'n al puntéǵ ad 6-3 4-6 7-6.

La Taylor a 'l Roland Garros dal 2015

In dal 2012 la śōga quàtar turnèo ITF rivànd dū vòlti in di quàrt e na vòlta in di utàṿ. In dal 2013 la ciàpa dū carti salvàdghi par śugàr a Indian Wells e a Charleston. In sal cimènt califurgnàṅ l'è bòna ad bàtar la nùmar 57 dal mónd, la Lucie Hradecká, par 3-6 7-6 6-3 ma la n pōl far gnint cun l'Ana Ivanović. In sla tèra vérda dla Carulìna dal Sud invéci la cata sù tri śōg e basta cun l'Andrea Petković. P'r al rèst pòca ròba, dimóndi prim tùran in di turnèo ITF e qualificasiòṅ mancàdi, e na pulèmica cun la federasiòṅ di Stat Unî ch'la n gh dà minga 'n cuntribùt ecunòmic par śugàr gl'US Open di śōvan p'r al fat 'd èsar na budlòna e 'n catìṿ eśèmpi p'r i baghét[1]. Tut qvést anc se lē l'éra la nùmar òṅ dal tenìsti śōvni.

In dal 2014 la pasa 'l qualificasiòṅ par 'l ITF ad Daytona Beach e pò la mét in riga la Françoise Abanda e l'Aleksandra Wozniak prima ad cédar a l'Anna Tatišvili in di quàrt. A Indian Wells, incóra na vòlta, la dasfrùta bèṅ la carta salvàdga ch'i gh'ìvan dâ par far fóra la Karin Knapp par 7-6 6-1 e pò la pòrta via 'n sét a la Flavia Pennetta, vinsidōra pò dal turnèo. Al 27 'd Avrìl la vins al sò prim tìtul ITF a Charlottesville baténd in finàl la Montserrat González par 6-2 6-3.

Culegamènt estéran

Nòti

  1. Tròp grasa, ch'la ristìs a cà stampa.it, 15 ad Setémbar dal 2012