Beatrice Capra

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn


'N arvèrs dla Capra


La Beatrice Capra (Baltimòra, 6 'd Avrìl dal 1992) l'è na tenìsta americàna fiōla dla Laurie e 'd 'n itagliàṅ ad Mónśa ch'l è andâ a vìvar in di Stat Unî par lavōr, Giovanni. Adès la stà in Flòrida.

L'è élta 175 cm e la péśa 62 chilo. La dróa al bras dèstar e la tira 'l arvèrs a dū maṅ. In dla sò caréra l'è rivàda a èsar la nùmar 201 dal mónd al 20 ad Setémbar dal 2010 ma adès la n gh'à minga clasìfica parchè l'à sarnî ad studiàr a l'università ad Duke.

Caréra

L'à tacâ a śugàr a tènis a nóṿ an. In dal 2007, par dū an, la tōś part a soquànt turnèo ITF rivànd in semifinàł a Houston in dal 2008. 'L an dòp la vins, sénsa pèrdar gnanc un sét, 'l ITF ad Williamsburg baténd lung la via anc la Shelby Rogers.

In dal 2010 a Midland, 'n ITF da sènt-mila dòlar, la pasa 'l qualificasiòṅ e pò la bat l'Heather Watson a 'l prim tùran par pò céd'r a l'Arantxa Rus par 0-6 0-6. In Avrìl a Osprey la riva in semifinàł baténd la Nastas'sja Jakimava e anc l'Eugenie Bouchard. In Luj la fà fóra la Shelby Rogers a Lexington ma minga l'Alison Riske ch'la la bat par 6-2 6-1. In Istâ i gh dànan na carta salvàdga par śugàr a gl'US Open e lē la gh dà dèntar baténd la Karolina Šprem par 6-1 6-3 e pò la nùmar vint dal mónd, la francéśa Aravane Rezaï, par 7-5 2-6 6-3. A 'l tèrs tùran però la Marija Šarapova la gh dà na lesiòṅ baténd-la par 6-0 6-0. Praticamènt la sò caréra a i livèi élt la finìs lè parchè in dal 2011 la n gh la cava mai a vìnsar dū partìdi ad fila e in dal 2012 la riva sōl na vòlta in di quàrt a Raleigh (4-6 4-6 da l'Heidi El Tabakh).

In dal 2013 la śōga cun na carta salvàdga in bisàca al turnèo ad Washington ma la pèrd subìt cun la Paula Ormaechea par 1-6 1-6. In Setémbar la tōś part a 'l ITF ad vintsìnc-mila dòlar ad Redding in dua la riva in di utàṿ par pò lasàr strada a la Chanel Simmonds par 6-7 4-6.

Culegamènt estéran