Grace Min

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn


La Grace Min a 'l sarvìsi


La Grace Min (Atlànta, 6 ad Maǵ dal 1994) l'è na tenìsta americàna nada da di genitōr uriginàri dla Curèa dal Sud.

L'è élta 163 cm e la péśa 64 chilo. La dróa al bras dèstar e la tira 'l arvèrs a dū maṅ. La stà a Boca Raton (Flòrida).

In dla sò caréra l'è rivàda a èsar la nùmar sènt-òṅ dal mónd al 10 ad Nuvémbar dal 2014 e l'à vins sinc turnèo ITF in singulàr e òṅ in dópi.

Caréra

La Grace Min la taca a pistàr i camp ITF in dal 2008 e in Maǵ la gh la cava a bàtar l'Eugenie Bouchard par 6-0 6-3. 'L an dòp, tacànd da 'l qualificasiòṅ, la riva in di utàṿ in d'l ITF ad Rock Hill ma la pèrd da la Sharon Fichman. In dal 2010 la gh la cava a rivàr na vòlta in semifinàł e dū vòlti in di quàrt śugànd soquànt ITF.

In dal 2011 la riva in di utàṿ in d'l ITF ad Lexington par pò pèrdar da la Lauren Davis par 6-1 3-6 2-6. In Utóbar la fà incóra méj a Troy (quàrt baténd la Madison Keys e la Camila Giorgi) e a Rock Hill in dua la riva in finàł dand incóra la paga a la Madison Keys e la Camila Giorgi ma lasànd strada in d'l ùlt'm incónt'r a la Romina Oprandi. In Nuvémbar però la Madison Keys la s tōś l'arvìnsida sèg mandànd-la a cà in di quàrt a Phoenix.

In dal 2012 la Min la s mét in bisàca 'l tìtul ITF 'd Innisbrook pò in Mars la śōga n'atra finàla a Clearwater ma la la pèrd cun la Garbiñe Muguruza Blanco par 0-6 1-6. In Maǵ la fà suo 'l tìtul ITF 'd Indian Harbour Beach da sinquànta-mila dòlar e pò anc qvél ad Raleigh soquànt dè dòp. In Śugn la tōś part a 'l turnèo WTA ad Birmingham ma la pèrd subìt cun la Laura Robson par 4-6 1-6. La fà cumpàgn anc a Stanford (4-6 4-6 da la Chanelle Scheepers) e a Quebec City (4-6 3-6 da l'Eugenie Bouchard, carta salvàdga). La sèra 'l an a 'l 177śum pòst dal mónd.

'N arvèrs dl'americàna

In dal 2013 la pasa 'l qualificasiòṅ a Auckland, Acapûlc e a Indian Wells ma la pèrd sèmp'r a 'l prim tùran cun la Mona Barthel, cun la Francesca Schiavone e cun la Lourdes Domínguez Lino. A Charleston la fà méj ma la pèrd a 'l secónd tùran cun la Madison Keys par 6-4 6-3. A 'l Roland Garros la pasa 'l qualificasiòṅ ma pò la bèca la Galina e la Voskoboeva la la manda a cà in tri set c'n al puntéǵ ad 4-6 6-4 7-5. Anc a gl'US Open la và a cà subìt ciapànd un 3-6 1-6 da la Karin Knapp.

In dal 2014 la vins incóra a Innisbrook baténd la Gioia Barbieri in semifinàł par 7-6 6-2 e la Nicole Gibbs in finàł par 7-5 6-0. A Charleston la fà secónd tùran lasànd strada a la Daniela Hantuchová. In Avrìl la vins al tìtul ITF ad Dothan cóntar la Victoria Duval. A 'l Roland Garros incóra na vòlta la pasa 'l qualificasiòṅ par pò pèrdar subìt cun la Garbiñe Muguruza Blanco. In Luj la riva in semifinàł in dal turnèo internasiunàł ad Bad Gastein ma la céd a l'Andrea Petković par 6-4 2-6 4-6. A Båstad la fà fóra l'Anastasija Pavljučenkova par pò pèrdar subìt dòp da l'Aleksandra Panova. In Utóbar la mét in bisàca n'atra finàł ITF ma a Macon cun la Kateryna Bondarenko la céd par 4-6 5-7.

Culegamènt estéran