Patricia Mayr-Achleitner

Da Wikipedia.
C'l artìcul chè 'l è scrit in Miranduléś Emiliàn


La Mayr-Achleitner tòlta śò in dal 2009


La Patricia Mayr-Achleitner (Rum, 8 ad Nuvémbar dal 1986) l'è na tenìsta austrìaca. La s è stablìda a Innsbruck. L'è élta 169 cm e la péśa 60 chilo. La dróa al bras dèstar e la tira 'l arvèrs a dū maṅ.

A gh piàś al magnàr itagliàṅ e la dascór in Tedèsch e in Ingléś.

L'è stada la nùmar stanta dal mónd al 4 ad Maǵ dal 2009. In dla sò caréra l'è rivàda in finàl par na vòlta in un turnèo WTA in dal 2011, qvél ad cà ad Bad Gastein, ma l'à pardû par 0-6 5-7 cun la María José Martínez Sánchez. Par cóntar l'è stada bòna ad mét'r-as in bisàca quatórdas tìtui ITF.

Caréra

La Patricia la taca a śugàr in dal sircùit ITF in dal 2003 in Nigèria ma la gh'à da spétar al 2005 par vìnsar-'n òṅ in Grécia e pò 'n àtar in Spaggna. 'L an dòp la in pòrta a cà 'n àt'r incóra a Innsbruck baténd in finàl l'Yvonne Meusburger.

In dal 2008 la śóga al sò prim turnèo WTA a Bad Gastein par via dna carta salvàdga ch'i gh'ìvan dâ. La pasa dū tùran ma pò la pèrd da la Lucie Hradecká par 3-6 1-6.

In dal 2009 la taca a śugàr in dal sircùit WTA parchè la gh'à di punt asè. Da nùmar 111 dal mónd la tōś part a gl'Australian Open vgnénd batùda a 'l secónd tùran par la Kaia Kanepi. In Favràr la riva in semifinàl a Bugutà ma lè la cata la María José Martínez Sánchez ch'la gh'à la méj sèg par 7-5 7-5. In Avrìl la mùcia sù dū secónd tùran a Ponte Vedra Beach (6-1 3-6 2-6 da l'Elena Vesnina) e a Charleston (1-6 6-2 2-6 da la Nadia Petrova). In Maǵ la gh lasa subìt al péni cun la Galina Voskoboeva a Varsàvia e la fà cumpàgn anc a 'l Roland Garros cun la Marija Korytceva. A Wimbledon invéci l'è la Sabine Lisicki a srar-ag 'l us a 'l secónd tùran (2-6 4-6 al puntéǵ par la tedésca). In Luj la śóga tri turnèo in sla tèra rósa (Bùdapest, Palèrum e Bad Gastein) muciànd sù tri secónd tùr'n ad fila, pardénd 6-0 3-6 4-6 cun la Timea Bacsinszky, 6-7 1-6 cun la Sara Errani e 6-3 4-6 1-6 cun l'Alizé Cornet. La sèra 'l an a 'l 86śum pòst.

La Patricia la tira 'n arvèrs a gl'US Open 2013

'L inìsi dal 2010 'l è negatìṿ ma pò in Śugn la vins dū ITF ad fila. In Luj la bat la Tathiana Garbin a Bad Gastein ma pò la và fóra in di quàrt incóra cun l'Alizé Cornet.

In dal 2011 la fà sudàr la Carla Suárez Navarro a 'l secónd tùran ad Bugutà ma pò la céd 6-1 4-6 2-6. A Acapûlc invéci la pèrd subìt da la Sorana Cîrstea 2-6 4-6. In Avrìl la gh'à da pigàr-as a 'l secónd tùran a Charleston cun la Samantha Stosur dòp avér batû par 6-1 6-4 la cinéśa Shuai Zhang. La fà méj in Luj cun na finàl ITF da sènt-mila dòlar a Biarritz (6-1 4-6 4-6 da la Pauline Parmentier) e una WTA a Bad Gastein (0-6 5-7 da la María José Martínez Sánchez). In c'l àtar tùrneo ad cà ad Linz invéci la và fóra a 'l secónd tùran cun la Petra Kvitová dòp avér mandâ a cà la Stéphanie Foretz Gacon.

Dòp un brut inìsi dal 2012 (la cumbìna quèl sōl a Monterrey in dua la riva in di quàrt) in Maǵ la riva in finàl in d'l ITF da sènt-mila dòlar ad Cagnes-sur-Mer ma lè la vèṅ sćiancàda par 2-6 1-6 da la Julija Putinceva. A la fiṅ ad Śugn la s davśìna a far al cólp cun la Jelena Janković a 'l Roland Garros ma la céd a la sèrba a 'l ùltim par 6-1 1-6 5-7. In Luj la tōś part a 'l turnèo ad Palèrum e chè la fà fóra la Nastassja Burnett par 6-3 6-4 prima ad cédar a la rumagnóla Sara Errani par 3-6 2-6. In chi àtar tri turnèo WTA śugâ in dal méś la mùcia sù tri prim tùran. A Linz la dà la paga a la Sabine Lisicki, spasàda via literalmènt par 6-1 6-3, ma pò la pèrd cun la cruàta Petra Martić par 2-6 6-3 0-6. La finìs 'l an da nùmar 164 dal mónd.

In dal 2013, in dal sò prim WTA d'l an, la riva in di quàrt in dua però la céd 5-7 1-6 a la Karolína Plíšková. In Luj la patìs un brut 0-6 1-6 a 'l prim tùran dal turnèo ad Bùdapest da la ruména Alexandra Cadanțu. A Bad Gastein l'è invéci l'Elina Svitolina a dar-ag la paga par 6-3 6-0 in di quàrt, dòp al vìnsidi cun la Tereza Mrdeža e cun la Petra Martić. L'austrìaca la pasa pò al qualificasiòṅ di US Open e l'è anc bòna ad casàr fóra la nùmar trént'òṅ dal mónd, la Magdaléna Rybáriková, par 7-6 6-3 prima ad cédar a la Jaroslava Švedova par 2-6 3-6. In Setémbar la s mét in bisàca dū ITF bùlgar da vintsìnc-mila dòlar. In Utóbar la śóga (da carta salvàdga) al turnèo ad cà ad Linz e la gh la cava ad bàtar par 1-6 6-3 6-4 la nùmar vint-i-òṅ dal mónd, la Sorana Cîrstea, e pò anc la Maryna Zanevs'ka par 7-5 2-6 6-2 par pò farmàr-as in di quàrt cun l'Angelique Kerber cun al puntéǵ ad 3-6 1-6.

Culegamènt estéran