Naomi Ōsaka
|
C'l artìcul chè 'l è scrit in
Miranduléś |
.jpg)
La Naomi Ōsaka (Uśàka, 16 'd Utóbar dal 1997, scrit 大坂 なおみ in Giapunéś) l'è na tenìsta giapunéśa, fiōla 'd 'n óm ad culōr haitiàṅ e dna màdar dal Giapòṅ. L'è carsùda in Flòrida in du i sò genitōr i èṅ andâ a star quànd lē la gh'iva tri an.
Élta 1,80 métar par 69 chilo, la dróa 'l bras dèstr'r e la tira 'l arvèrs cun dū maṅ. In dla sò caréra l'à vins tri tìtui WTA, tut dimóndi impurtànt, Indian Wells in dal Mars dal 2018 (baténd la rusa Dar'ja Kasatkina par 6-3 6-2), gl'US Open in dal Setémbar dal 2018 vinsénd cóntar la padròna 'd cà Serena Williams par 6-2 6-4 e gl'Australian Open in finàł cóntar la céca Petra Kvitová. Cun c'l ùltim riśultâ chè la giapunéśa la gh l'à cavàda a dvintàr la nùm'r òṅ dal mónd tulénd al pòst dla Simona Halep. La Naomi l'à anc pardû tri finàli, in dal 2015 a Hua Hin (WTA 125) e in dal 2016 e 2018 a Tòkyo (Premier).
Caréra
La Naomi la taca a śugàr i sò prim turnèo ITF in dal 2012 e l'è bòna ad rivàr in semifinàl, a quatórd'ś an, a Amelia Island. 'L an dòp la bat la Belinda Bencic a Pelham par pò pèrd'r in di quàrt da la Mónica Puig. In Avrìl la śōga la sò prima finàl ITF a El Paśo pardénd-la da la Sanaz Marand par 4-6 4-6, pò 'l an dòp la fà àtar tant a Irapuàto in Mèsic cun la Indy De Vroome ch'la la bat par 3-6 6-4 6-1.
_(19957109051).jpg)
.jpg)
.jpg)
In Luj la gh la cava a qualificàr-as par 'l impurtànt turnèo Premier 'd Stanford e pò 'd bàt'r anc la nùmar daśnóṿ dal mónd, la Samantha Stosur, par 4-6 7-6 7-5. In Utóbar la ciàpa na carta salvàdga par tōr part a 'l turnèo dla sò sità, Uśàka, e lè la bat l'Erika Sema prima 'd céd'r a l'Elina Svitolina in tri set.
La giapunéśa la taca 'l sò 2015 faghénd i quàrt in dū ITF da sinquànta e da sènt-mila dòlar, pò in Primavéra la riva in finàl a Gifu pardénd da la cinéśa Saisai Zheng par 3-6 7-5 6-4. La sfilaràda dal finàli maladìdi la cuntìnua par lē anc a Surbiton (turnèo ITF su èrba ingléśa da sinquànta-mila dòlar) in du la céd a la rusa Vitalija D'jačenko dòp avér batû la Su-Wei Hsieh e l'Anett Kontaveit. In Nuvémbar la s férma incóra a 'l ùlt'm at in dal turnèo WTA 125 ad Hua Hin cóntar la Jaroslava Švedova srand pò 'l an a la puśisiòṅ 203 dal ranking.
In dal 2016 la Ōsaka la riva da qualificàda in di utàṿ a Hobart (6-7 2-6 da la Mona Barthel), pò la riva a 'l tèrs tùr'n a gl'Australian Open baténd la Donna Vekić 6-3 6-2 e l'Elina Svitolina 6-4 6-4 prima 'd èsar spasàda via par la Viktoryja Azaranka 1-6 1-6. In Favràr la riva par la prima vòlta in di quàrt 'd un turnèo WTA a Acapûlc baténd la Kiki Bertens e la Mariana Duque-Mariño e pardénd cun la Sloane Stephens. In Mars la sćiànca la Sara Errani par 6-1 6-3 a Miami mént'r a 'l Roland Garros la fà sudàr dimóndi la Simona Halep prima 'd lasàr-ag strada a 'l tèrs tùrnan c'n al puntéǵ ad 6-4 2-6 3-6. In Istâ la dà 'n daspiaśēr a gl'americàṅ baténd la Coco Vandeweghe a gl'US Open cedénd pò a 'l tèrs tùr'n a la Madison Keys par 5-7 6-4 6-7. In Setémbar, da carta salvàdga, la riva in finàl in d'l impurtànt Premier ad Tòkyo baténd la Misaki Doi par 6-4 6-4, la Dominika Cibulková par 6-2 6-1, l'Aljaksandra Sasnovič par 6-3 7-6 e l'Elina Svitolina par 1-6 6-3 6-2. Cun la Caroline Wozniacki la śōga la sò sèsta finàl in caréra ma incóra na vòlta l'armàgn c'n al bèc sut parchè a vins la danéśa par 7-5 6-3.
In dal 2017 la giapunéśa la riva in di quàrt a Auckland e a 'l tèrs tùr'n a Indian Wells in du la pèrd da la Madison Keys par 1-6 4-6. Su la tèra rósa la patìs tri scunfìti a 'l prim tùr'n a Stucàrda (6-7 6-3 1-6 da la Johanna Konta), a Róma (2-6 4-6 da la Laura Siegemund) e a Straśbûrg (3-6 2-6 da la Carla Suárez Navarro) mént'r a 'l Roland Garros la n gh la cava gnanc a qualificàr-as. A Wimbledon la pèrd da la Venus Williams a 'l tèrs tùran dòp avēr mandâ a cà la Barbora Strýcová. In Agóst, pasànd da 'l qualificasiòṅ, la riva in di utàṿ a Turònt in du la gh'à da bandunàr cóntar la Karolína Plíšková (i ér'n un set para). A gl'US Open la sćiànca subìt par 6-3 6-1 la nùmar siē dal mónd, l'Angelique Kerber, pò la bat anc la Denisa Allertová ma a 'l tèrs tùran la finìs par pèrd'r in tri set tirâ cun la qualificàda Kaia Kanepi.
La Ōsaka la vèra bèṅ la stagiòṅ 2018 rivànd in di utàṿ a gl'Australian Open baténd prima l'Elena Vesnina e pò l'Ashleigh Barty par pò lasàr strada a la Simona Halep. A Dubài la pèrd in di quàrt da l'Elina Svitolina ma pò l'è bòna 'd vìns'r al turnèo Premier Mandatory 'd Indian Wells baténd la Marija Šarapova 6-4 6-4, l'Agnieszka Radwańska 6-3 6-2, la Sachia Vickery 6-3 6-3, la Maria Sakkarī 6-1 5-7 6-1, la Karolína Plíšková 6-2 6-3, la Simona Halep 6-3 6-0 e la Dar'ja Kasatkina 6-3 6-2. A Miami la sò cursa la finìs invéci a 'l secónd tùran cun l'Elina Svitolina dòp avēr però dâ la paga a la Serena Williams par 6-3 6-2. A Róma la lasa sōl tri śōg a la èx nùmar òṅ dal mónd Viktoryja Azaranka ma pò la vîṅ asfaltàda a sò vòlta da la Simona Halep par 1-6 0-6. A 'l Roland Garros la riva a 'l tèrs tùran (1-6 6-7 da la Madison Keys) méntar su l'èrba 'd Nottingham l'è farmàda in semifinàl da l'Ashleigh Barty par 3-6 4-6. A Wimbledon la pèrd a tèrs tùran cun l'Angelique Kerber (pò vinsidōra dal turnèo) méntar su 'l cimènt la mùcia sù pôc pardénd prima cun la Magda Linette a Washington (secónd tùran) e subìt a Montreal (6-7 2-6 da la Carla Suárez Navarro) e a Cincinnati (3-6 6-7 da la Maria Sakkarī). In Setémbar (da tèsta 'd série nùmar vint) la giapunéśa la vins al sò prim Slam baténd in d'l órdan la Laura Siegemund 6-3 6-2, la Julia Glushko 6-2 6-0, l'Aljaksandra Sasnovič 6-0 6-0, l'Aryna Sabalenka 6-3 2-6 6-4, la Lesja Curenko 6-1 6-1, la Madison Keys 6-2 6-4 e la Serena Williams 6-2 6-4. Sèmp'r in cal méś lè la śōga la finàl dal turnèo ad cà ad Tòkyo ma la la pèrd cóntar la Karolína Plíšková par 4-6 4-6 mént'r a Pechîṅ la và fóra in semifinàl da l'Anastasija Sevastova. La sèra 'l an da nùmar sinc dal mónd.
In dal 2019, dòp na semifinàł a Brisbane (2-6 4-6 da la Lesja Curenko), la giapunéśa l'è bòna 'd métar-'s in bisàca 'l sò secónd Slam cunsicutìṿ vinsénd gl'Australian Open. La 'l fà baténd in d'l órdan la Magda Linette par 6-4 6-2, la Tamara Zidanšek par 6-2 6-4, la Hsieh Su-wei par 5-7 6-4 6-1 (ma l'éra sóta 1-4 in dal secónd set), l'Anastasija Sevastova par 4-6 6-3 6-4, l'Elina Svitolina par 6-4 6-1, la Karolína Plíšková par 6-2 4-6 6-4 e la Petra Kvitová par 7-6 5-7 6-4. Cun cal riśultâ chè la Naomi la dvènta la 26śma tenìsta nùm'r òṅ dal mónd in dl'Éra Open e anc la prima aśiàtica a far-al.
Finàli in di Gran Slam
| Turnéo | An | Vins/Pardû | Aversàri in finàl | Puntéǵ |
|---|---|---|---|---|
| US Open | 2018 | V | Serena Williams | 6-2 6-4 |
| Australian Open | 2019 | V | Petra Kvitová | 7-6 5-7 6-4 |