Sharon Stone

Da Wikipedia.
C'l artìcul chè 'l è scrit in Miranduléś Emiliàn
La Sharon Stone tòlta śò in dal 2005


La Sharon Vonne Stone, cgnusùda méj cuma Sharon Stone (Meadville, 10 ad Mars dal 1958), l'è n'atōra, n'èx mudèla e prudutōra 'd film americàna, candidàda a i Prèmi Òscar cuma atōra prutagunìsta par la pelìcula Casinò dal 1995.

In dla sò caréra, in du l'à laurâ par di regìsta impurtànt a Hollywood cuma Martin Scorsese, Woody Allen, Sidney Lumet e Sam Raimi, la s è fata cgnós'r in dal 1992 recitànd da prutagunìsta in dal film scàndal Basic Instinct ad Paul Verhoeven in du l'à fat védar la pasra, méntar l'éra sintàda durànt n'interugatòri 'd pulisìa, spustànd na gamba da na banda a cl'atra faghénd véndar ch'la n gh'iva briśa 'l mudàndi adòs.

In dal 2001 l'è stada vitma 'd 'n aneurìśma che par pôc al n la masàva dabòṅ, pò la gh'à abû 'n infàrt in dal 2004.

Biugrafìa

Fiōla dna famìja 'd uperàj dla Pennsylvania cun di urìgini irlandéśi, la Stone la và a star da śōvna prima a New York e pò in dal New Jersey par far la mudèla. Nutàda in Európa da Woody Allen, la fà 'l sò debùt da cumpàrsa in dal film Stardust Memories dal 1980, pò la gira 'l film ad scarésa Benedizione mortale scrit e dirèt par Wes Craven.

A 'l inìsi di an Nuànta la taca a lauràr c'n al regìsta ulandéś Paul Verhoeven prima faghénd la mujér 'd Arnold Schwarzenegger in Atto di forza e pò faghénd na bisesuàla purcùsa e sénsa lìmit in Basic Instinct ch'la gh vèra 'l pòrti dal sucès e ch'la gh fruta na nomination a i Golden Globe.

In dal 1993 la gira 'n àtar thriller eròtic insém a William Baldwin, Sliver, mént'r in dal 1995 l'è la prutagunìsta dal western ad Sam Raimi Pronti a morire cun Gene Hackman, Russell Crowe e Leonardo DiCaprio. Sèmp'r in c'l an lè la fà la Ginger McKenna in dla pelìcula biugràfica 'd Martin Scorsese Casinò, film girâ insém a Robert De Niro e a James Woods. Par cla part chè la finìs in dla lista dal candidàdi prutagunìsti a vìns'r al Prèmi Òscar che però al và a la Susan Sarandon par Dead Man Walking - Condannato a morte.

In dla 1996 la gira al thriller Diabolique, arfacimènt dna pelìcula francéśa dal 1955 'd Henri-Georges Clouzot, I Diabolici. In di an Dumìla la tōś part a dū flòp, Catwoman dal francéś Pitof, e Basic Instinct 2 in du la và a far la malnéta sasìna a Lóndra.

La Stone a 'l Fèstival ad Cannes dal 2005
La Sharon la fà ciào in dal 2007
L'atōra americàna pigàda da 'l rìdar
Na Stone patìda tòlta śò in dal 2004

In dal 2013 la gira la pelìcula biugràfica Lovelace, ch'la cònta la vita dla prutagunìsta dla pelìcula pòran La vera gola profonda, e pò la cumèdia 'd John Turturro Gigolò per caso cun Woody Allen e la Vanessa Paradis. La Stone la lavóra pò par la prima vòlta in Itàglia c'n al bulgnéś Pupi Avati in dal sò Un ragazzo d'oro, film cun Riccardo Scamarcio e la Cristiana Capotondi.

Filmugrafìa

Culegamènt estéran