James Franco

Da Wikipedia.

C'l artìcul chè 'l è scrit in Miranduléś Emiliàn

James Franco tòlt śò in dal 2011


James Edward Franco, cgnusû méj cuma James Franco (Pâl Élt, 19 'd Avrìl dal 1978) 'l è 'n atōr e regìsta americàṅ.

In dla sò caréra 'l è stâ candidâ a i Prèmi Òscar par la part 'd Aron Ralston in 127 ore (2010) e 'l à vins dū Golden Globe p'r avēr fat James Dean in dal film televiśìṿ James Dean - La storia vera (2001) e par la pelìcula The Disaster Artist. Da 'l 2013 al gh'à na stéla su la Hollywood Walk of Fame.

Biugrafìa

Carsû in Califòrgna, Franco al s diplòma in dal 1996 e al s làurea in dal 2008 in létri. Al gh'à dū fradèi, Dave e Tom.

James al taca la sò caréra 'd atōr in dal 1997 tulénd part a 'l telefìlm Pacific Blue. In dal 1999 al gira la sò prima cumèdia a 'l cìnema, Mai stata baciata, insém a la Drew Barrymore e a David Arquette. 'L an dòp l'è la vòlta 'd Costi quel che costi, àtra pelìcula alśēra.

In dal 2001 al pòrta a cà 'n Golden Globe par James Dean - La storia vera, film biugràfic par la televiśiòṅ su James Dean, méntar 'l an dòp al fà la part dal fiōl dal Gòblin Vérd, Harry Osborn, in dla pelìcula Spider-Man ad Sam Raimi. 'L atōr califurgnàṅ al farà cla part chè anc in di séguit Spider-Man 2 (2004) e Spider-Man 3 (2007).

Franco al dascór dla pelìcula Milk

In dal 2002 al lavóra cun Robert De Niro in dal thriller Colpevole d'omicidio, pò al vîṅ sarnî da Robert Altman p'r al sò The Company.

In dal 2006, par far la part ad Tristàṅ in Tristano e Isotta, al và a lesiòṅ p'r andàr a cavàl, druàr la spada e tiràr di pugn faghénd dla boxe. In dal 2007 al tōś part a la cumèdia Molto incinta e subìt dòp a Strafumati, in du la rivìsta High Times 'l al batéśa „drugâ d'l an“ par la sò performance.

In dal 2008 al fà Scott Smith, al muróś dal persunàǵ 'd Sean Penn, in dal film biugràfic ad Gus Van Sant Milk, vinsidōr ad dū Prèmi Òscar. Dū an dòp al gira Mangia prega ama insém a la Julia Roberts e 127 ore ch'al gh fruta na candidadùra a i Òscar. In chi an lè al tōś part anc a 'l telefìlm General Hospital.

In dal 2013 'l è in dal cast ad Lovelace, film su l'atōra pòran Linda Lovelace, dla cumèdia Facciamola finita e dal film Palo Alto trat da 'n sò lìbar dedicâ a la sità in du 'l è nâ. Sèmp'r in c'l an lè al gira 'l ducumentàri Interior. Leather Bar. in du al próa a far luś su i 40 minùt ad pelìcula tajàda via dal film Cruising e 'l rècita in Third Person insém a Liam Neeson e a Adrien Brody.

In dal 2015 al gira n'atra cumèdia cun Seth Rogen, Sballati per le feste!, mént'r in dal 2017 al tōś part a 'l film fantàstic ad Ridley Scott Alien: Covenant.

Filmugrafìa

James a la prima 'd Spider-Man 3
Franco a 'l Fèstival ad Venèsia dal 2013

Culegamènt estéran

Àtar prugèt