Sliver
|
C'l artìcul chè 'l è scrit in
Miranduléś |
 Sliver
| ||
| Sliver | ||
 La Stone e Baldwin in na figùra dal film | ||
| Sćéśa 1993 | ||
|---|---|---|
| Regìa: Phillip Noyce | ||
| Scritōr: Ira Levin • Joe Eszterhas | ||
| Atōr: Sharon Stone • William Baldwin • Tony Peck Polly Walker • Tom Berenger • Colleen Camp Amanda Foreman • Martin Landau • Jim Beaver Nicholas Pryor • CCH Pounder • Nina Foch | ||
| Müsica: Howard Shore | ||
| Léngua: Inglés | ||
| Dürä dal film: 108 minüt | ||
| Nasiōṅ: Stat Unî | ||
Sliver (Sćéśa) 'l è 'n thriller eròtic dal 1993 ad Phillip Noyce ch'al tōś ispirasiòṅ da 'l rumànś Sćéśa 'd Ira Levin, adatâ p'r al cìnema da Joe Eszterhas, qvél ad Basic Instinct d'l an prima, sèmpar cun la Sharon Stone.
Da 'l punt ad vista cumersiàł, al film 'l è stâ 'n sucès parchè 'l à purtâ a cà da piò ad sènt-sédas migliòṅ ad dòlar a frónt 'd un cóst ad quarànta.
Sunt
La Carla Norris (Sharon Stone), a cap dna redasiòṅ dn'aśiénda ch'la fà vgnir fóra di lìbar, dòp ch'al sò matrimòni 'l è andâ a ròtui, la decìd 'd arfàr-as na vita spatinànd in 'n àt'r apartamènt. La in sarnìs òṅ ch'al s cata in un gratacēl in dal sènt'r ad Manhattan, ciamâ “Sliver”. Rivàda là, in dal gir dna stmana, la fà na fèsta cun i sò vśèṅ par cgnós'r-i méj.
La dóna la vèṅ a savér che qvéla ch'la gh stava prima 'd lē l'éra mòrta cascànd śò da 'l balcòṅ e anc al vèć prufesōr ch'al gh'iva cuntâ incòsa al mōr in dal gir ad pôc dè śbaténd la tèsta cónt'r al spìgul dla sò vasca da bagn. La Carla la n fà mia in tèmp a turbàr-as tròp parchè la taca subìt na relasiòṅ cun Zeke Hawkins (William Baldwin), pruprietàri dal palàs, un śōvan dimóndi spurcaciòṅ a lèt sèg.
Quànd a mōr anc la Vida (Polly Walker), na mudèla ch'la s éra misa insém cun Zeke e anc cun 'n àt'r abitànt dal pòst, al scritōr Jack Landsford (Tom Berenger), la pulisìa al taca a suspetàr ad lò ch'al finìs in parśòṅ. Vgnû fóra pagànd la causiòṅ, chi lò al dà cónt'r invéci pròpria a Zeke ch'l iva mis sù 'n impiànt vìddeo lugâ in di mur ch'al druàva par tgnir 'd òć tut gl'apartamènt dal palàs.