Susan Sarandon

Da Wikipedia.

C'l artìcul chè 'l è scrit in Miranduléś Emiliàn

La Sarandon tòlta śò in dal 2012


La Susan Abigail Tomalin, cgnusùda méj c'n al nóm 'd art ad Susan Sarandon (New York, 4 'd Utóbar dal 1946) l'è n'atōra e prudutōra 'd film americàna.

L'è stada bòna 'd vìnsar 'l Prèmi Òscar dal 1996 cuma atōra prutagunìsta in dal film Dead Man Walking - Condannato a morte dòp quàtar candidadùri p'r Atlantic City, USA, Thelma & Louise, L'olio di Lorenzo e Il cliente. In dla sò caréra la s è misa in bisàca dimóndi àtar prèmi cuma 'n BAFTA, un SAG Award e dū Dàvid ad Dunatèl.

L'è stada spuśàda da 'l 1967 a 'l 1979 cun 'l atōr Chris Sarandon, pò la s è ligàda a soquànt àt'r óm cuma Louis Malle, Sean Penn, Franco Amurri, ch'al gh'à dâ na fiōla, l'Eva Amurri, Jonathan Bricklin e Tim Robbins, pàdar di sò dū fiōi masć, Jack Henry e Miles. Cun 'l atōr califurgnàṅ l'à da spés spuśâ 'l càuśi dla paś e dal Partî Demucràtic, dand adòs a 'l presidènt George W. Bush par la guèra in Iràq.

Biugrafìa

Fiōla 'd Phillip Leslie Tomalin e dla Leonora Marie Criscione, americàna cun di urìgini itagliàni, la Sarandon la stùdia in na scōla catòlica ma da śōvna l'è piutòst arvèrsa e anti-cunfurmìsta tant ch'la và in piàsa par prutestàr cóntar la guèra in Vietnam e a favōr di dirìt sivìl.

Dòp ès'r-as misa in bisàca 'l diplòma a Washington la s iscrìv a la Catholic University of America in du la taca a pasiunàr-'s a 'l cìnema, dvintànd anc la muróśa d'l atōr Chris Sarandon, e a la pulìtica miténd-as da la banda di demucràtic. La sò prima part impurtànta l'è in dal film cult britànic The Rocky Horror Picture Show ad Jim Sharman, pò in dal 1978 la rècita in Pretty Baby ad Louis Malle insém a la Brooke Shields, in alóra ragasìna, ch'la fà la putàna.

In di an Utànta la gira 'n àtar film cult, Miriam si sveglia a mezzanotte, in du la fà l'amànta dla Catherine Deneuve, e pò Le streghe di Eastwick cun Jack Nicholson, la Cher e la Michelle Pfeiffer. In dal 1991 la tōś part a Thelma & Louise ad Ridley Scott, pelìcula ch'la gh fruta 'n Dàvid ad Dunatèl e na nomination a i Prèmi Òscar, la sò secónda dòp Atlantic City, USA. 'L an dòp la lavóra in L'olio di Lorenzo ad George Miller, in I protagonisti ad Robert Altman e in Bob Roberts dal sò muróś Tim Robbins. Sèg la vins 'l Òscar in dal 1996 par Dead Man Walking - Condannato a morte in du la fà na sōra ch'la và a catàr in parśòṅ al cundanâ a mòrt Sean Penn. In séguit la gira dū pelìculi cun John Turturro (Illuminata dal 1998 e Romance & Cigarettes dal 2005).

Fra i sò ùltim film a 'rcurdém Wall Street: il denaro non dorme mai 'd Oliver Stone (2010) e La frode girâ insém a Richard Gere (2012).

Filmugrafìa

La Sarandon in dal 2007
La Sarandon insém a Robbins e a 'l candidâ demucràtic Edwards
La Susan tòlta śò in dal 2008
L'atōra a Turònt in dal 2015
La Sarandon premiàda in dal 2016
La Susan a Cannes dal 2016

Culegamènt estéran