Robert De Niro

Da Wikipedia.

C'l artìcul chè 'l è scrit in Miranduléś Emiliàn

De Niro tòlt śò in dal 2008


Robert Anthony De Niro Jr. (New York, 17 'd Agóst dal 1943, a s lèś [ˈrɒbərt dəˈnɪroʊ] in ingléś), cgnusû méj cuma Robert De Niro, 'l è 'n atōr, prudutōr e regìsta americàṅ, fiōl 'd 'n itagliàṅ uriginàri dla pruìnsa 'd Campbàs, e dn'irlandéśa.

'L è stâ candidâ par sèt vòlti a 'l Prèmi Òscar vinsénd-an dū, in dal 1975 p'r Il padrino - Parte II e in dal 1981 par Toro scatenato.

In dla sò caréra 'l à laurâ c'n i più grand regìsta 'd Hollywood cuma Francis Ford Coppola, Martin Scorsese (òt film), Quentin Tarantino, Elia Kazan, Michael Cimino, Terry Gilliam, Roger Corman e Brian De Palma. In Itàglia 'l à laurâ par Sergio Leone (C'era una volta in America), Bernardo Bertolucci (Novecento) e Giovanni Veronesi (Manuale d'amore 3).

Da 'l 2006 al gh'à la sitadinànsa itagliàna.

Biugrafìa

Robert al crés a Little Italy insém a sò màdar Virginia Admiral dòp che sò pàdar Robert De Niro Sr. al s 'n éra andâ quànd lò al gh'iva dū an (i gh piàśiv'n i óm). Dòp ès'r-as laureâ a la Little Red School House, al taca a giràr i sò prim film a la fiṅ di an Utànta laurànd par tri vòlti cun Brian De Palma in Ciao America!, Oggi sposi e Hi, Mom!. In dal 1973 al taca la sò culaburasiòṅ cun Martin Scorsese faghénd Mean Streets, pò 'l an dòp al vins al Prèmi Òscar cuma atōr minga prutagunìsta p'r Il padrino - Parte II ad Francis Ford Coppola. In dal 1976 'l è la vòlta ad Taxi Driver e a riva par lò n'atra nomination ma a vìnsar 'l è Peter Finch p'r al sò rōl in Quinto potere. In dal stés an al gira anc Novecento, un film ambintâ in dla campàgna emigliàna durànt i an dla prima e dla secónda guèra mundiàla. In dal 1978 'l è prutagunìsta 'd Il cacciatore ad Michael Cimino.

De Niro al vins pò al Prèmi Òscar cuma atōr prutagunìsta in dal 1980 par Toro scatenato girâ par Martin Scorsese. In dal 1984 al fà 'l persunàǵ ad David "Noodles" Aaronson in dal kolossal ad Sergio Leone C'era una volta in America. Tri an dòp al gira Angel Heart - Ascensore per l'inferno, in dua 'l fà 'l Diàvul, e The Untouchables - Gli intoccabili par Brian De Palma.

A 'l inìsi di an Nuànta al gira i thriller Indiziato di reato, Fuoco assassino e Cape Fear - Il promontorio della paura pò 'l è 'l pàd'r adutìṿ canàja 'd Leonardo DiCaprio in Voglia di ricominciare. Sèmp'r in dal 1993 al gira 'l sò prim film da regìsta, Bronx. Dū an dòp al tórna a lauràr cun Martin Scorsese in Casinò insém a la Sharon Stone. In dal 1996 'l è 'l tùran dal thriller The Fan - Il mito ad Tony Scott e dal film dramàtic Sleepers ad Barry Levinson. In di an a vgnir al gira anc al cumèdi Sesso & potere, Terapia e pallottole e Flawless - Senza difetti.

In di an Dumìla al taca a giràr dal pelìculi più ad caséta e cumersiàli cuma Ti presento i miei, Un boss sotto stress, Mi presenti i tuoi?, Vi presento i nostri, Lo stagista inaspettato e Nonno scatenato, un film ch'a 'l inìsi a gh'iva da ciamàr-as Nonno Zozzone (Nunòṅ Purcùs), al sò persunàǵ.

Filmugrafìa

De Niro in dal 1988

Culegamènt estéran

Àtar prugèt