Pepi, Luci, Bom e le altre ragazze del mucchio
|
C'l artìcul chè 'l è scrit in
Miranduléś |
 Pepi, Luci, Bomy otras chicas del montón | ||
| Pepi, Luci, Bom e le altre ragazze del mucchio | ||
 La Carmen Maura in na figùra dal film | ||
| Pepi, Luci, Bom e gl'atri ragàsi dal muć 1980 | ||
|---|---|---|
| Regìa: Pedro Almodóvar | ||
| Scritōr: Pedro Almodóvar | ||
| Atōr: Carmen Maura • Félix Rotaeta • Eva Siva Cecilia Roth • Alaska • Cristina Sánchez Pascual Assumpta Serna • Olvido Gara • Julieta Serrano Concha Grégori • Kiti Mánver • Fabio McNamara | ||
| Müsica: Monna Bell • Maleni Castro | ||
| Léngua: Spagnōl | ||
| Dürä dal film: 82 minüt | ||
| Nasiōṅ: Spaggna | ||
Pepi, Luci, Bom e le altre ragazze del mucchio (Pepi, Luci, Bom e gl'atri ragàsi dal muć) l'è na cumèdia dal 1980 ad Pedro Almodóvar, chè a 'l sò debùt, sìmbul dla movida ad Madrid di an Utànta. Al regìsta manciàṅ al l'à scrita quàt'r an prima quànd al lavuràva incóra par la cumpagnìa di telèfun Telefónica cuma impiegâ.
Al film 'l è stâ girâ in 16 mm e pò ślungâ a 35 par vgnir fóra in di cinéma.
Sunt
La Pepi (Carmen Maura) l'è na śuvnòta ad Madrid ch'la sà al fat suo e ch'la viṿ da par lē. Na sira, méntar l'è drē a tacàr dal figurìni ad Superman in sal sò àlbum, la sènt sunàr al campanèl. 'L è 'n pulisiòt ch'l è vgnû a cà sua parchè da fóra 'l iva duciâ dal piànti ad marijuana in dal sò bśól. Chi lē la próa a far-al star bòṅ e sito śibénd-ag ad far-'g un buchèṅ in cambi, ma lò al n s cunténta minga e al la viulénta.
Arliàda par n avér piò la manéra ad véndar la sò prima vòlta, la Pepi la ciàma la sò amìga punk Bom (Olvido Gara) e al sò grup ad sunadōr (i Los Bomitonis) par dar-ag śò par bèṅ e tōr-'s acsè la sò vindéta. Cla nòt lè 'l óm al i ciàpa ma a gh'è 'n śbali parchè a s trata dal fratèl śmèl dal pulisiòt.
Minga cunténta, la Pepi la trapèla quèl àtar: la dvénta amìga cun sò mujér, la timda e maśuchìsta Luci (Eva Siva), cun la scuśa 'd imparàr a far la maja, par pò purtàr-la via da sò marè ch'al la pìcia. Durànt la prima lesiòṅ a riva lè la Bom ch'la gh pisa adòs e lē la pèrd la tèsta par la viràgo, dvintànd la sò amànta e scapànd via sèg, par stablìr-'s a cà sua.
Pepi, Luci e Bom i s la gòdan pasànd al nòt a divertìr-'s in di lucài dla muvida. Durànt un cuncèrt, in dua la Bom la canta Murciana La Marrana (Mursiàna La Rója), a gh'è 'n śōg a prèmi par 'l óm ch'al gh'à 'l uśèl più grôs ciamâ "Eresiòṅ generàli". Al vinsidōr al pōl pò far quél ch'al vōl e a sucéd ch'al furtunâ, Moncho, al sarnìs pròpria la Luci par far-as far na pómpa.
In cal méntar la Pepi l'è custréta a catàr-'s un lavōr e la dvénta na scritōra ad reclàm par la televiśiòṅ, cuma qvéla dal bàmbuli ch'i gh'aṅ al marchéś o qvéla dal mudàndi “Ponte”, bòni par cambiàr 'l udōr dal scuréśi in parfùm e, se anvlupàdi par bèṅ, prònti par far divertìr cal dóni quànd i èṅ da par lōr.