Parla con lei
|
C'l artìcul chè 'l è scrit in
Miranduléś |
 Hable con ella
| ||
| Parla con lei | ||
 Cámara e la Leonor Watling in na figùra dal film | ||
| Dascór sèg 2002 | ||
|---|---|---|
| Regìa: Pedro Almodóvar | ||
| Scritōr: Pedro Almodóvar | ||
| Atōr: Javier Cámara • Darío Grandinetti Leonor Watling • Rosario Flores • Lola Dueñas Geraldine Chaplin • Pina Bausch • Loles León Elena Anaya • Fele Martínez • Chus Lampreave Adolfo Fernández • Roberto Álvarez • Paz Vega Mariola Fuentes • Marisa Paredes • Cecilia Roth | ||
| Müsica: Alberto Iglesias | ||
| Léngua: Spagnōl | ||
| Dürä dal film: 112 minüt | ||
| Nasiōṅ: Spaggna | ||
Parla con lei (Dascór sèg) 'l è 'n film dramàtic dal 2002 scrit e dirèt par Pedro Almodóvar, vinsidōr dal Prèmi Òscar par la senegiadùra uriginàla e 'd un Golden Globe p'r al film furastēr più bèl.
La pelìcula la gh'à di camèo dla Marisa Paredes, dla Cecilia Roth e dla Paola Dominguín, fiōla dla Lucia Bosè, tuti cuma invidàdi a na fèsta 'd matrimòni, ólt'r ad Caetano Veloso ch'al canta Cucurrucucú paloma e dla Pina Bausch ch'la fà 'n balét a 'l inìsi.
In tut 'l à fat sù dagnóra ssanta-sinc migliòṅ ad dòlar.
Sunt
Durànt un spetàcul dal Café Müller a teàtar, 'l infarmēr Benigno Martín (Javier Cámara) al gh'armàgn quànd al fà a mènt ch'al sò vśèṅ fra 'l pùblic, al scritōr e giurnalìsta Marco Zuluaga (Darío Grandinetti), al taca a piànśar parchè cumòs da l'eśibisiòṅ dla balarìna (Pina Bausch).
Turnâ a cà Marco al buta 'l òć su na turéra ciamàda Lydia González (Rosario Flores) ch'al véd in televiśiòṅ intervistàda. Al decìd acsè ad far un servìsi su 'd lē vgnénd a savēr ch'la s è péna mulàda cun 'n àtar “matador” famóś cgnusû cuma 'l Niño de Valencia (Adolfo Fernández). C'n al pasàr dal tèmp i dū i s mét'n insém ma pò la dóna la decìd ad dar un taj a la relasiòṅ parchè la vōl turnàr c'n al sò èx muróś. La Lydia però la n fà minga in tèmp a dir-'g-al parchè, durànt na curìda, la finìs in còma dòp èsar stada frida da n'incurnàda dal tôr.
Marco al la và a catàr da spés in clìnica in du a lavóra Benigno ch'al gh'à da tgnir adrē a n'atra pasiènta in còma ciamàda Alicia (Leonor Watling), fiōla śōvna dal psicòlug dutōr Roncero (Helio Pedregal) e studènta balarìna in dla scōla dla Katerina Bilova (Geraldine Chaplin) ch'la s cata 'd frònt a 'l palàs in du a viṿ anc Benigno.
Marco e Benigno i dvènt'n amìg e 'l infarmēr al sugerìs a 'l scritōr, quànd al s cata da par lò cun la Lydia, ad cuntinuàr sèmpar a dascórar sèg, pò al gh diś anc ch'al vrév spuśàr l’Alicia parchè al gh vōl tròp bèṅ. Marco al gh dà cóntar parchè a n gh'è gnanc da pinsàr a di lavōr cumpàgn, pò al partìs par la Giurdàgna ch'al gh'à da far un servìsi 'd viàś. Quànd 'l è là al ricév na telefunàta in du i gh dìśan ch'la Lydia l'è mòrta e 'l giurnalìsta al tórna subìt in Spaggna. In cal mént'r in clìnica n'infarméra la fà a mènt ch'l’Alicia la n gh'à piò al mestruasiòṅ e a gh'è anc un mutìṿ: la gh'à d'avēr fiōl.