Karolína Plíšková
|
C'l artìcul chè 'l è scrit in
Miranduléś |
La Karolína Plíšková (Louny, 21 ad Mars dal 1992) l'è na tenìsta céca.
Prufesiunìsta da 'l 2009, l'è élta 186 cm e la péśa 72 chilo. I gh piàś'n i lìbar ad Paulo Coelho e la và mata par la pasta.
In dla sò caréra 'l à vins tri turnèo WTA e déś ad qvéi ITF e l'è stada bòna ad rivàr a 'l 20śum pòst in clasìfica in dal Śnar dal 2014.
Caréra
In dal Luj dal 2009 la śōga 'l turnèo ad Praga, prufitànd dna carta salvàdga, ma la pèrd a 'l prim tùran da l'Iveta Benešová par 7-6 1-6 3-6, stés quèl anc 'l an dòp ma 'sta vòlta la céd a la Johanna Larsson.
In dal 2011 la pèrd a 'l prim tùran a Cupenàghen da l'Angelique Kerber 2-6 2-6. La próa al qualificasiòṅ a gl'US Open ma la pèrd subìt da la Mandy Minella. In Setémbar la i pasa invéci a Tokyo ma incóra na vòlta la và fóra a 'l prim tùran (6-1 3-6 4-6 da l'Irina-Camelia Begu).
In dal 2012 la pèrd a Auckland 3-6 4-6 da la Yanina Wickmayer dòp avér pasâ 'l qualificasiòṅ cóntar la Monica Puig. Finalmènt la vins al sò prim incóntar WTA a Kuala Lumpur baténd la Kai-Chen Chang 6-3 6-2 ma pò la céd in dū sét a l'Agnieszka Radwańska. A 'l Roland Garros la s fà strada in dal qualificasiòṅ dand la paga a la Laura Robson ma pò la tasta al pugnét alvâ dla Marion Bartoli ch'la la manda a cà 6-3 6-3. A Wimbledon invéci la pèrd subìt da la Sloane Stephens. In Utóbar la n gh la cava briśa a śugàr in dal tablòṅ prinsìpal ad Linz par cólpa dla Bethanie Mattek-Sands ch'la la bat 6-3 7-6. La finìs 'l an a 'l 102śum pòst.
In dal 2013 la fà sù tri scunfìti ad fila a 'l prim tùran a Brisbane (6-7 6-7 da l'Ol'ga Alekseevna Pučkova), a Sydney (1-6 3-6 da la Sara Errani) e a gl'Australian Open (5-7 7-5 4-6 da l'Eleni Daniilidou). Da nùmar 127 dal mónd la và a śugàr al turnèo ad Kuala Lumpur e la 'l vins, dand la paga prima a l'Ayumi Morita in semifinàl e pò a la Bethanie Mattek-Sands, crudàda śò in cal méntar a 'l 197śum pòst, par 1-6 7-5 6-3. A Indian Wells la pèrd a 'l secónd tùran da la Caroline Wozniacki par 7-5 3-6 3-6 e pò la s férma in di quàrt a Katowice par maṅ dla Roberta Vinci, pò vinsidōra dal tìtul, ch'la gh'à la méj par 6-1 6-0. Dòp ès'r andàda fóra a 'l prim tùr'n a 'l Roland Garros (6-4 5-7 3-6 da la Garbiñe Muguruza Blanco), la riva in finàł in d'l ITF ad Nottingham in dua la pèrd in dū set da la Petra Martić e pò la gh pèrd incóra anc a Wimbledon. In Agóst la và fóra subìt a gl'US Open cun l'Eugenie Bouchard par 6-4 4-6 5-7 ma in Setémbar la s mét in bisàca 'l ITF da sinquànta-mila dòlar ad Sanya. In Utóbar la i ciàpa da la Francesca Schiavone a Linz par pò saràr 'l an a la puśisiòṅ ssanta-sèt dal mónd.
La vèra 'l 2015 cun dū secónd tur'n a Auckland (4-6 3-6 da la Kirsten Flipkens) e a Melbourne (3-6 6-3 10-12 da la Daniela Hantuchová). A Pattaya City la riva invéci drita in finàl mandànd a cà la Bethanie Mattek-Sands 6-2 6-4, l'Alla Kudrjavceva 4-6 6-3 6-4, la Sorana Cîrstea 1-6 7-6 6-0 e la Julia Görges 6-3 4-6 6-3. In d'l ùlt'm at la céd però a la rusa Ekaterina Makarova par 3-6 6-7. A Indian Wells la riva a 'l tèrs tùran cun la Na Li, pò la fà i quàrt a Monterrey (7-6 3-6 3-6 da la Caroline Wozniacki) e semifinàł a Kuala Lumpur (7-6 3-6 3-6 da la Dominika Cibulková). In Maǵ la śōga pardénd-la la finàł dal turnèo internasiunàł ad Nurimbèrga cun l'Eugenie Bouchard ch'la vins sèg al sò prim tìtul in caréra. A Wimbledon la suda dimóndi par bàtar la Karin Knap 6-7 6-4 10-8 ma a 'l secónd tùran la n pōl far gnint cun la finalìsta d'l an prima, la Sabine Lisicki, ch'la la manda a cà in dū set. A gl'US Open la bat l'Ana Ivanović ma minga la Casey Dellacqua ch'la vins al sò incónt'r ad tèrs tùran. In Setémbar la śōga dū finàł, pardénd la prima a Hong Kong da la Sabine Lisicki ma vinsénd la secónda a Seùl cun la Varvara Lepchenko. In Utóbar la s mét in bisàca anc al tìtul ad Linz vinsénd 6-7 6-3 7-6 cun la Camila Giorgi ch'la buta in dal rusc un match point. La céca la finìs 'l an a 'l 24śum pòst.
In dal 2015 la Plíšková la bat la Viktoryja Azaranka a Brisbane e pò la riva in finàł a Sydney, baténd lung la via la Polona Hercog, la Nicole Gibbs, la Carla Suárez Navarro e l'Angelique Kerber, ma pò la perd da la Petra Kvitová ch'la gh'à la méj cun dū tie-break tirâ.