Sara Errani

Da Wikipedia.
C'l artìcul chè 'l è scrit in Miranduléś Emiliàn
L'Errani in dal Roland Garros dal 2012


La Sara Errani (Bulógna, 20 'd Avrìl dal 1987, a s lèś [ˈsara erˈrani] in Itagliàn) l'è na tenìsta rumagnōla prufesiunìsta da 'l 2002.

L'è élta 164 cm e la péśa 60 chilo. La dróa al bras dèstar e la tira 'l arvèrs a dū maṅ. L'è alenàda par Pablo Lozano e David Andres e la stà a Bulógna, dòp èsar carsùda a La Màcia, in Rumàgna. I la ciàman anc Sarita.

L'è bòna ad dascórar in Itagliàn, in Spagnōl e in Ingléś. A gh piàś dimóndi lèśar, guardàr di film, scultàr dla mùśica (specialmènt qvéla pop), tgnir a drē a 'l śōg dal balòṅ e a 'l basket e śugàr a Monopoli, a 'l carti e a i śōg vìddeo.

Al 20 ad Maǵ dal 2013 l'è rivàda a èsar la nùmar sinc dal mónd, mént'r in dópi, insém a la Roberta Vinci, l'è la nùmar òṅ da 'l déś ad Setémbar dal 2012. In dla sò caréra l'à mis in bisàca sèt tìtui WTA in singulàr e daśnóṿ in dópi, in mèś a i quài i gh'èṅ anc i tìtui dal Gran Slam dal Roland Garros (2012), di US Open (2012) e di Australian Open (2013). Da par lē l'è rivàda in dal 2012 in finàl a 'l Roland Garros (pardénd da la Marija Šarapova) e in semifinàl a gl'US Open dal 2012 e a 'l Roland Garros dal 2013, pardénd sèmpar in na manéra ciàra da la Serena Williams.

La tîṅ sòdi la rachéta a la manéra western, al cólp ch'a gh piàś druàr da piò 'l è 'l drit. La s cata bèṅ a śugàr in sla tèra rósa. Al sò servìsi l'è òṅ di più débui dal sircùit ma almànc la mét in camp da spés la prima. La ś mōv in présia in sal camp e la n gh dà mai sù, curénd a drē a tut al bucìni. La preferìs far pôc śbali piutòst che pascàr di cólp vinsènt, a part la bucìna curta ch'la fà dimóndi bèṅ.

Caréra

In dal 2005 la Sara la śōga sōl in dal sircùit ITF, a n cavànd-'g-la mai a pasàr al qualificasiòṅ in qvéi WTA. In Favràr la s pòrta a cà al tìtul a Melilla in Spaggna.

In dal 2006, pasànd p'r al qualificasiòṅ, la riva a 'l secónd tùran dal turnèo WTA ad Bugutà, batùda par l'argintìna Gisela Dulko 4-6 3-6. La pasa al qualificasiòṅ anc a Róma ma pò la cata la Martina Hingis e la pèrd subìt par 0-6 1-6. In Luj la tōś part a 'l turnèo a Bùdapest. In dal qualificasiòṅ la dà la paga prima a l'Urzula Radwańska par 7-6 0-6 6-1 e pò anc a sò surèla Agnieszka par 6-4 6-0, tulénd al vist p'r al tablòṅ prinsipàl. Chè la rumagnōla la bat prima l'Ágnes Szávay e pò anc la Yuliana Fedak, prima ad cédar in di quàrt a l'ulandéśa Michaëlla Krajicek. La finìs 'l an a 'l nùmar 171 dal mónd.

In dal 2007 la próa a qualificàr-as a Auckland e a gl'Australian Open ma la n gh la cava briśa parchè la vins sōl cun la Melanie South. A Bugutà la và fóra subìt pardénd 6-4 1-6 3-6 da la Lourdes Domínguez Lino. A Acapûlc la gh śōga p'r avér pasâ 'l qualificasiòṅ. A 'l prim tùran la fà fóra la Sybille Bammer par 6-2 7-6 e pò la bat anc la Kaia Kanepi 1-6 6-3 6-4 e l'itagliàna Tathiana Garbin, in alóra nùmar vint-sèt dal mónd, par 5-7 7-6 6-3. La pèrd in semifinàl cun la Flavia Pennetta cun al puntéǵ ad 2-6 4-6. In Maǵ la pèrd incóra a 'l prim tùran a Róma cun la Kateryna Bondarenko in tri sét. In Maǵ la vìns al tìtul ITF ad Galatìna da 25.000 dòlar. A Palèrum i gh dànan na carta salvàdga e lē la s in prufìta a la granda mulànd un 6-2 6-0 prima a la francéśa Virginie Razzano e pò anc a l'Eva Birnerová e a la Lourdes Domínguez Lino, prima ad cédar in semifinàl a l'Ágnes Szávay par 6-7 1-6. A Los Angeles, a Turònt e a New Haven la n pasa minga 'l qualificasiòṅ pardénd subìt da la Tiantian Sun, da la Galina Voskoboeva e da l'Elena Bovina. Cuma nùmar 105 dal mónd la śōga diretamènt gl'US Open in dua la pèrd a 'l secónd tùran da la Marion Bartoli. In Setémbar la riva incóra in semifinàl in un turnèo WTA a Bali, baténd l'Anabel Medina Garrigues e l'Aiko Nakamura, ma la gh'à da lasàr strada incóra na vòlta a la Lindsay Davenport par 1-6 3-6. La sèra la stagiòṅ a 'l stantéśum pòst.

Un arvèrs ghignóś dla rumagnōla

In dal 2008 la cata incóra la Davenport in di quàrt a Auckland e la pèrd incóra sèg par 3-6 3-6. A gl'Australian Open la la pésca incóra a 'l prim tùran e 'sta vòlta, prima ad cédar, la la fà sudàr dimóndi purtànd-la a 'l tèrs sét: 6-2 3-6 7-5. In Favràr la pèrd par dū vòlti da la spagnōla Nuria Llagostera Vives a Vigna dal Mar e a Bugutà. In Mars la pasa dū tùran a Miami, dand la paga prima a la giapunéśa Akiko Morigami 6-2 3-6 6-4 e pò anc a la Marija Kirilenko par 6-4 4-6 7-6. A la fiṅ la gh'à da lasàr strada a la nùmar òṅ dal mónd, la Justine Henin. A Amelia Island la pòrta a 'l tèrs sét la Viktoryja Azaranka ma l'è pò chi lē a pasàr al prim tùran par 3-6 7-5 6-4. A Róma la Sara la riva par la prima vòlta a 'l tèrs tùran in dua la pèrd par 4-6 3-6 da la Serena Williams. In Śugn la pasa dū tùran anc a Barcelóna (6-3 6-2 a la Lourdes Domínguez Lino e 6-4 7-5 a la Varvara Lepchenko) ma pò la pèrd incóra da la Nuria Llagostera Vives 6-2 2-6 3-6. In Luj la Errani la s pòrta a cà i sò prim dū tìtui WTA dla caréra. A Palèrum la bat in di quàrt la Carla Suárez Navarro 4-1 bandòṅ e pò la Flavia Pennetta 7-5 6-3 e in finàl la Marija Korytceva par 6-2 6-3. A Pòrtrōś invéci la manda a cà la Maria Elena Camerin 6-7 6-2 6-1, la Mara Santangelo 6-2 6-4, la Marija Kirilenko 6-1 7-5, la Caroline Wozniacki 6-4 6-4 e in finàl la valensiàna Anabel Medina Garrigues par 6-3 6-3. A New Haven la pasa 'l qualificasiòṅ ma pò la pèrd a 'l secónd tùran da l'Ágnes Szávay 4-6 7-6 4-6. A gl'US Open e a Bali la fà cumpàgn, ciapànd la paga da la Na Li 6-4 2-6 0-6 e da la Tamira Paszek 0-6 6-7. A Mósca, tacànd da 'l qualificasiòṅ, la cata sōl di ex suviètichi. Baténd la Galina Voskoboeva par 6-3 6-3, la riva in dal tablòṅ prinsipàl in dua la manda a cà anc la Viktoryja Azaranka par 1-6 6-4 6-3 ma pò la pèrd da la nùmar sèt dal mónd, la Svetlana Kuznecova, par 6-7 1-6. La sèra 'l an in Lussembûrg in dua la bat la Marina Eraković prima ad cédar a la Sorana Cîrstea, finénd acsè in dla puśisiòṅ nùmar 42 dal mónd.

Prim piàṅ dla Sarita
Un drit tirâ in top spin da l'Errani
La bulgnéśa a 'l servìsi a Madrid
Sara la cata sù na bucìna cun 'l arvèrs in di US Open 2012

La bulgnéśa la taca bèṅ la stagiòṅ 2009 rivànd in semifinàl a Brisbane, cun i sucès su la Daniela Hantuchová 6-7 6-4 6-0, su la Cvetana Pironkova 6-7 7-5 6-3 e su l'Ol'ga Govorcova 6-3 6-3, ma lè la pèrd par 3-6 1-6 da la Viktoryja Azaranka. A Sydney invéci la pèrd a 'l secónd tùran da la Serena Williams. A gl'Australian Open l’Errani la dà incóra la paga a la Marija Kirilenko par 6-0 6-4 e pò anc a la ruména Monica Niculescu par 6-2 6-3. A 'l tèrs tùran la pésca la nùmar sèt dal mónd Vera Zvonarëva e la n gh pōl far gnint cun la rusa ch'la và avànti par 6-4 6-1. In Favràr la rumagnōla la bat l'Amélie Mauresmo in Fed Cup par 6-3 6-4 ma dū dè dòp la gh pèrd a Parì a 'l quèrt par 2-6 0-6. La stmana dòp la fà sudàr dimóndi la Serena Williams in Dubai ma a la lunga l'è l'americàna a 'vér-ag la méj a 'l secónd tùran par 4-6 6-2 6-0. Dòp i quàrt a Marbella (2-6 7-6 5-7 da la Anabel Medina Garrigues) la fà sù pôc, sōl di prim e di secónd tùran. La s tira sù incóra a Palèrum e a Pòrtrōś rivànd incóra in finàl ma 'sta vòlta la gh'à da 'lvàr la bandéra biànca cun la Flavia Pennetta par 1-6 2-6 e cun la Dinara Safina, nùmar òṅ dal mónd, par 7-6 1-6 5-7. Dòp tri prim tùran a Cincinnati (6-3 3-6 1-6 da la Daniela Hantuchová), a Turònt (4-6 2-6 da la Dominika Cibulková) e a New Haven (1-6 4-6 da la Varvara Lepchenko), la riva a 'l tèrs tùran a gl'US Open in dua la pèrd da la Yanina Wickmayer par 3-6 4-6. La pèrd sèg anc in di quàrt ad Linz. La Errani la fà un pas a 'l indrē, śliciànd a 'l 48śum pòst.

In dal 2010 la pèrd subìt a Brisbane da la Roberta Vinci par 4-6 6-2 2-6. A Hobart la riva in semifinàl baténd la Kirsten Flipkens par 6-3 6-4 ma pò la céd a la Shahar Peer 2-6 0-6. A gl'Australian Open la bat la Klára Zakopalová par 6-2 7-6 e pò l'Ekaterina Makarova par 6-2 6-3 prima ad lasàr strada, incóra na vòlta, a la Yanina Wickmayer in tri sét. La Errani la n pòrta a cà gnint in di turnèo sudamericàṅ in sla tèra rósa. A Indian Wells e a Miami invéci la riva sèmp'r a 'l tèrs tùran, pardénd pò da la Jelena Janković 6-2 6-7 4-6 e da la Vera Zvonarëva 2-6 3-6. A Marbella la s insfìlsa in semifinàl (1-6 1-6 da la Flavia Pennetta) ma pò la śōga mâl in chi àtar turnèo in sla tèra, rivànd sōl na vòlta a 'l tèrs tùran a Varsàvia in dua la bèca un 2-6 1-6 da la Na Li. In sl'èrba la riva in di quàrt a Birmingham (6-7 5-7 da la Aravane Rezaï) e a 'l tèrs tùran a Wimbledon (3-6 1-6 da l'Agnieszka Radwańska). A Palèrum la và fóra in di quàrt ad òpra dla Kaia Kanepi 2-6 2-6 e pò la fà secónd tùran a Pòrtrōś, a San Diego e a Cincinnati, pèś a Montreal in dua la và a cà subìt pardénd da l'Iveta Benešová. A New Haven e a gl'US Open l'è la Samantha Stosur a vìnsar sèg. In Utóbar la tōś part a i turnèo ad Pechîṅ, ad Linz e ad Mósca, miténd insém dū secónd tùran e un quàrt in Àustria (7-5 3-6 4-6 da la Roberta Vinci). La sèra 'l an a 'l nùmar quarànta-tri dal mónd.

A Birsbane la mùcia sù n'atra scunfìta pēśa da la Dominika Cibulkova in dal Śnar dal 2011 (3-6 0-6). A Hobart la bat prima l'Anna Čakvetadze par 7-6 6-3 e pò la padróna ad cà, l'Alicia Molik, par 6-1 6-0 prima ad patìr un 1-6 3-6 da la cinéśa Shuai Peng. Dòp un prim tùran a Melbourne (3-6 2-6 da la Venus Williams), la tōś part a 'l turnèo ad Pattaya City in Favràr. Chè la bat la Kai-Chen Chang par 4-6 6-2 6-4, l'Ayumi Morita par 2-6 7-5 6-2, la Galina Voskoboeva par 2-6 6-3 6-2 e pò la Roberta Vinci par 6-1 6-4. In finàl però la vèṅ sćiancàda da la Daniela Hantuchová cun al puntéǵ ad 6-0 6-2. A Indian Wells la pèrd a 'l tèrs tùran da la Kim Clijsters, nùmar dū dal mónd, par 3-6 6-2 4-6, a Miami invéci la và a cà subìt sóta i cólp dla Jaroslava Švedova ch'la la spunta par 6-3 5-7 7-6. A Marbella e a Barcelóna la riva in semifinàl pardénd 2-6 1-6 da la Viktoryja Azaranka e 1-6 5-7 da la Lucie Hradecká. In di turnèo più impurtànt dla stagiòṅ in sla tèra rósa la n gh la cava minga a 'ndàr da 'd là da 'l secónd tùran, pardénd da la Francesca Schiavone a Madrid, da la Viktoryja Azaranka a Róma e da la Daniela Hantuchová a 'l Roland Garros. Parcōrs cumpàgn anc in sl'èrba, cun la bulgnéśa ch'la bat la Christina McHale a Birmingham par 7-6 4-6 6-2, la Kiki Bertens a 'S-Hertogenbosch par 7-6 6-1 e la Kaia Kanepi a Wimbledon par 6-1 6-4 prima ad cédar dòp a la Marina Eraković 7-5 4-6 3-6, a la Svetlana Kuznecova 6-3 6-7 1-6 e a la Kateryna Bondarenko 4-6 7-5 2-6. In Luj la riva in di quàrt a Bùdapest e a Palèrum. A Carlsbad e a Cincinnati la céd par dū vòlti incóra a la Shuai Peng ma almànc in Ohio la dà na scòpla a la carta salvàdga Sloane Stephens par 6-1 7-5. A New Haven e a gl'US Open la mét in fila dū prim tùran da la Marija Kirilenko e da la Svetlana Kuznecova. La sèra 'l an pardénd incóra da la Dominika Cibulková a Linz e da la Kaia Kanepi a Mósca, finénd acsè la stagiòṅ da nùmar quartànta-sinc.

Rivàda in dal 2012, dòp quàt'r an, a pâr ch'la rumagnōla la n pòsa briśa dasćiuldàr-as da na puśisiòṅ ch'la vaga da la quarànta a la sinquànta. La taca la stagiòṅ bèṅ, rivànd in di quàrt a Auckland baténd la sò bistiàsa négra, la Yanina Wickmayer, par 4-6 6-1 6-1, par pò pèrdar da la Svetlana Kuznecova par 4-6 3-6. Dòp avér pardû da l'Angelique Kerber a 'l secónd tùran a Hobart, la riva par la prima vòlta in di quàrt anc in un turnèo dal Gran Slam in Austràglia, cedénd par 4-6 4-6 a la nùmar dū dal mónd, la Petra Kvitová. In Favràr la śōga dū turnèo in sla tèra rósa in Mèsic. Al prim 'l è qvél ad Monterrey in dua la riva in semifinàl (4-6 7-6 4-6 da l'ungheréśa Tímea Babos). Al secónd 'l è qvél 'd Acapûlc e lē la vins al tìtul baténd la Roberta Vinci in semifinàl par 6-4 6-1 e pò la Flavia Pennetta in finàl par 5-7 7-6 6-0. In di Stat Unî in sal dûr (Indian Wells e Miami) invéci la và fóra subìt, pardénd da la Vania King e da la Sloane Stephens. In Avrìl la fà suo anc al tìtul ad Barcelóna baténd in di quàrt la Julia Görges par 6-2 6-3, in semifinàl la Carla Suárez Navarro par 6-1 6-2 e in finàl la śluvàca Dominika Cibulková par 6-2 6-2. Cun i duśènt-utànta punt mis in bisàca la gh la cava a dvintàr una dal primi trénta śugadōri dal mónd. Al 5 ad Maǵ la vins al sò tèrs turnèo ad fila a Bùdapest dand la paga a l'Elena Vesnina par 7-5 6-4. La sò sfilaràda ad vìnsiti la s férma a 'l secónd tùran in dal WTA Mandatory ad Madrid (tèra blù) in dua, dòp avér mandâ a cà la Chanelle Scheepers, la patìs un 0-6 1-6 da l'Agnieszka Radwańska. Anc a Róma la fà secónd tùran, lasànd strada a la Samantha Stosur par 3-6 5-7. A la fiṅ 'd Maǵ la và a śugàr a 'l Roland Garros. Dòp avér batû in di prim tùran la Casey Dellacqua 4-6 6-2 6-2 e la Melanie Oudin 6-2 6-3, par la rumagnōla i tàc'n i tùran dûr ma lē la i fà fóra tuti, parténd da l'Ana Ivanović pigàda a la lunga par 1-6 7-5 6-3. In di utàṿ a cróda la tèsta dla Svetlana Kuznecova 6-0 7-5 e pò qvéla dl'Angelique Kerber par 6-3 7-6. Vinsénd cun la tedésca, la Errani la gh la cava finalmènt a bàtar na top déś, un quèl mai sucès in dla sò caréra. Al 7 ad Śugn, baténd par 7-5 1-6 6-3 la Samantha Stosur, la riva in finàl ma lè la céd a la Marija Šarapova par 3-6 2-6. Cun cal sucès lè, la siberiàna la dvènta la nóva nùmar òṅ dal mónd, méntar la Sara la fà al sò ingrès in dal primi déś. A Wimbledon la bulgnéśa la s férma a 'l tèrs tùran ad òpra dla Jaroslava Švedova ma qvél ch'a fà 'rmàgnar l'è al puntéǵ dal prim sét in dua l'itagliàna la n è bòna ad far gnanc un punt, finénd pò cun al pèrdar par 0-6 4-6. Catànd incóra la tèra rósa ad Palèrum la Errani la tórna incóra a vìnsar, 6-1 6-3 in finàl cun la Barbora Záhlavová-Strýcová. In Agóst la sa spòsta in Nordamèrica par śugàr a Montreal e a Cincinnati, rivànd sèmp'r a i utàṿ, pardénd prima da la Na Li 4-6 2-6 e pò da la Venus Williams par 3-6 0-6. A New Haven la riva invéci in semifinàl, dand via via la paga a la Bethanie Mattek-Sands 6-4 7-5, a la Carla Suárez Navarro 6-4 6-3 e a cal grintèṅ dla Marion Bartoli 6-4 6-2. La patìs pò un 1-6 3-6 da la nùmar sinc dal mónd, la Petra Kvitová. La tōś pò part a gl'US Open cuma tèsta ad série nùmar déś. Lung la strada la bat fàcil la spagnōla Garbiñe Muguruza Blanco cun al puntéǵ ad di 6-3 6-7 6-1. A 'l secónd tùran la manda a cà la rusa Vera Duševina asfaltànd-la par 6-1 6-0, e pò la s cumpórta cumpàgn anc cun cl'atra rusa, l'Ol'ga Alekseevna Pučkova, sćiancàda 6-1 6-1. In di utàṿ la manda a cà par la secónda vòlta in un Slam la nùmar siē dal mónd, l'Angelique Kerber, par 7-6 6-3. In semifinàl però la n pōl gnint cun la Serena Williams ch'la vins sèg 6-1 6-2. Cun i nuvsènt punt purtâ a cà, la Sara la dvènta la nùmar sèt dal mónd. In Setémbar, baténd incóra la Marion Bartoli a Tokyo, la riva in di quàrt dal turnèo aśiàtic par pò pèrdar par 6-3 5-7 3-6 da la Nadia Petrova. Chi lē la gh dà anc cóntar dgénd ch'al sò śōg al fà vgnir al lat a i śnòć. A Pechîn la Sara la s fà mâl durànt al prim sét d'l incóntar dal prim tùran cun la Camila Giorgi e la gh'à da bandunàr. In Utóbar la tōś part a i WTA Championships 'd Ìstanbul. Dòp avér pardû cun la Marija Šarapova par 3-6 2-6 e avér vins cun la Samantha Stosur par 6-3 2-6 6-0, par qualificàr-as la gh'arév da bàtar in d'l ùlt'm incóntar la pulàca Agnieszka Radwańska. Dòp tri óri e mèś ad lòta però la céd par 7-6 5-7 4-6, finénd listés 'l an da nùmar siē dal mónd.

Un alenamènt dl'Errani dal 2009
Òṅ di sò drit rabî
La Sara tòlta śò a 'l Roland Garros 2013
Un servìsi dla rumagnōla

La Errani la taca dimóndi mâl la stagiòṅ 2013 in Austràglia in dua la pèrd a 'l secónd tùran a Brisbane da la Daniela Hantuchová par 6-4 1-6 5-7 e in di quàrt a Sydney cóntar la Dominika Cibulková par 2-6 1-6, dòp avér duminâ la Karolína Plíšková 6-1 6-3 e la Marija Kirilenko 6-1 6-1. Incóra pèś la fà a gl'Australian Open parchè la gh pèrd subìt da la Carla Suárez Navarro par 4-6 4-6 in nuànta-sèt minùt ad śōg. La rumagnōla la ś tōś l'arvìnsida sèg baténd-la in di quàrt a Parì (a 'l quèrt) 7-5 4-6 7-5 in un turnèo in dua la riva pò in finàl, amprufitànd-'s anc di bandòṅ in dal prim sét dla Magdaléna Rybáriková e dla Kiki Bertens che però i éran bèla sóta par 0-4 e 0-5. In finàl la Sarita la gh'à da pigàr-as a la Mona Barthel par 5-7 6-7 ma almànc la bat un cólp purtànd-'s a cà al tìtul in dópi cun la Roberta Vinci. Dòp avér śugâ in Fed Cup a Rìmin cónt'r i Stat Unî, in dua la bat fàcil la Jamie Hampton ma la pèrd da la Varvara Lepchenko, la tōś part in Favràr a 'l turnèo ad Doha in dua la riva in di quàrt baténd par 7-5 5-7 6-2 la śluvàca Daniela Hantuchová ma dòp la gh'à da cédar par 2-6 2-6 a la nùmar òṅ dal mónd, la Viktoryja Azaranka. I rìvan par lē pò dū finàli in Dubai e a Acapûlc. In di Emirâ Àrab Unî la bat una a drē a cl'atra la Julia Görges 6-3 4-6 6-4, la Sorana Cîrstea 6-4 6-4, la Nadia Petrova 6-4 0-6 6-3 e la Roberta Vinci 6-3 6-3 par pò pèrdar da la Petra Kvitová par 2-6 6-1 1-6. In Mèsic invéci la mét in riga l'Alexandra Cadanțu 6-3 6-2, l'Eugenie Bouchard 7-6 6-2, la Kiki Bertens 6-4 6-4, l'Alizé Cornet 6-2 6-1 e la Carla Suárez Navarro in d'l ùlt'm incóntar par 6-0 6-4. A Indian Wells e a Miami la pèrd par dū vòlti in di quàrt da la Marija Šarapova in dū partìdi tiràdi, prima par 6-7 2-6 e pò par 5-7 5-7 (chè la gh'à abû anc tri bucìni p'r al sét), ma la s tōś la sudisfasiòṅ ad bàtar dal śugadōri cuma la Marion Bartoli, la Daniela Hantuchová, la Simona Halep (qvésta chè asfaltàda par 6-1 6-0 in quarant'òt minùt) e l'Ana Ivanović. In Avrìl la śōga a Palèrum la semifinàl cóntar la Repùblica céca, nasiòṅ campiòna in carga, cun dū tìtui in bisàca ad fila. In dal prim incóntar la bulgnéśa la bat la Lucie Šafářová in dū sét e pò la mét sóta a 'l inìsi anc la Petra Kvitová, purtànd-'s avànti par 6-2 2-1 ma pò a sa śmòrsa la luś e lē la pèrd ùndas śōg ad fila e la partìda par 6-2 2-6 0-6. Cuma nùmar quàtar dal tablòṅ (e sèt dal mónd) la gh'à 'l dirìt ad saltàr al prim tùran dal turnèo ad Stucàrda. A 'l secónd tùran la pésca la qualificàda, nùmar 104 dal mónd, Bethanie Mattek-Sands. L'americàna la s pòrta a cà al prim sét in na manéra ciàra 6-0 (par l’Errani a s trata acsè dna sfilaràda ad darsèt śōg pardû òṅ a drē a c'l àtar) par pò patìr la reasiòṅ dl'itagliàna ch'la paréśa i cònt 6-4 e pò la gh tōś anc al servìsi a 'l inìsi dal tèrs sét. A cal punt lè a la Mattek a gh tórna però al diav'l adòs e la fà sua la partìta par 6-0 4-6 6-1. A Madrid la Errani la tórna subìt a i sò livèi faghénd dimóndi strada in dal turnèo mandànd a cà l'Urszula Radwańska 6-3 6-1, la Sorana Cîrstea 7-5 2-6 6-4 (in 'n incóntar tirâ sù p'r i cavìi, cun la ruména ch'la piànś a la fiṅ par l'ucaśiòṅ butàda in dal rusc), la Varvara Lepchenko 7-5 6-3 ('l éra sóta 1-4 pēś in dal prim sét) e l'Ekaterina Makarova par 6-4 6-3. In semifinàl l’Errani la partìs bèṅ cun la nùmar òṅ dal mónd Serena Williams purtànd-as in vantàś par 3-1 par pò pèrdar a sò vòlta al servìsi. Dòp avér mancâ la bucìna dal 5-3 par lē, l'americàna la prila la partìta vinsénd-la par 7-5 6-2. Cun i quatarsènt-sinquànta punt dal turnèo spagnōl, la rumagnōla la pasa l'Angelique Kerber a 'l sèst pòst dal ranking WTA. A Róma, dòp un bye, la cata la Christina McHale ch'la la fà sudàr dimóndi prima ad cédar sèg dòp dū óri e sinquànta minùt par 7-5 5-7 6-2. L'itagliàna la dasfrùta pò i bandòṅ dal rusi Marija Kirilenko (in sal 6-3 2-0 par la bulgnéśa) e Marija Šarapova (sénsa gnanc śugàr parchè la gh'iva al mamòṅ) par rivàr in semifinàl cun la Viktoryja Azaranka. La bielurùsa la n gh lasa scamp in dal prim sét duminâ 6-0 e gnanc in dal secónd in dua però la Sara l'éra andàda a sarvìr in sal 5-4 par lē par pò cédar 0-6 5-7. Cun la scunfìta prèst dla Na Li cun la Jelena Janković, la rumagnōla la dvénta la nùmar sinc dal mónd a 'l sò pòst. A la fiṅ 'd Maǵ la Sara la tōś part a 'l Roland Garros in dua la gh'à da diféndar al sò best ranking e la finàla d'l an prima. In di prim tùran la sćiànca l'Arantxa Rus 6-1 6-2, la Julija Putinceva 6-1 6-1 e la Sabine Lisicki 6-0 6-4, avénd anc mancâ 2 bucìni dla partìda in sal 5-2 e servìsi a sò dispuśisiòṅ. In di utàṿ invéci la gh'à da patìr dimóndi prima 'd avér-ag la méj su la Carla Suárez Navarro batùda dòp dū óri e mèś par 5-7 6-4 6-3. In di quàrt, par la prima vòlta dòp vint-i-òt tintatìṿ andâ a vōd, la bat finalmènt na top 5, la nùmar quàtar dal mónd Agnieszka Radwańska par 6-4 7-6. In semifinàl però la patìs n'umiliasiòṅ ad c'l àtar mónd cun la Serena Williams ch'la gh lasa sōl al briśi, sćiancànd-la par 6-0 6-1 in quarànta-siē minùt ad śōg. La bulgnéśa la rèsta listés a 'l nùmar sinc dal mónd parchè la Na Li la và fóra a 'l secónd tùran ad òpra dla Bethanie Mattek-Sands. A Wimbledon però la và fóra subìt (3-6 2-6 da la nùmar ssanta-sinc dal mónd, la Mónica Puig) e l'è custréta a cédar al sò pòst a la cinéśa. A la fiṅ la rumagnōla la fà savér ch'la fà dimóndi fadìga a móv'r-as in si camp in èrba. In Luj la tōś part a 'l turnèo ad Palèrum da tèsta ad série nùmar òṅ, dmandànd na carta salvàdga. In dal prim tùran la fà patìr un pēś 6-0 6-1 a l'americàna Julia Cohen e pò la s ripét baténd 6-3 6-2 la finalìsta d'l an prima sèg, la Barbora Záhlavová-Strýcová. In di quàrt, sóta 3-4 in dal prim sét, l'insfìlsa na sfilaràda ad nóṿ śōg cunsecutìṿ par bàtar la Silvia Soler Espinosa. Dimóndi più difìcil par lē 'l incóntar ad semifinàl in dua la la spunta a fadìga par 6-4 6-4 cun la Klára Zakopalová, pasànd anc da 1-3 a 5-3 in dal secónd sét. In dla finàl la cata la nùmar ùndas dal mónd, la sò cumpàgna ad dópi Roberta Vinci, ch'la gh'à la méj sèg dòp sinc partìdi pardùdi ad fila. La pugléśa la s fà śgranfgnàr i dū break ad vantàś in dal tèrs sèt (cun anc na bucìna p'r al 5-0) prima ad saràr listés cun al puntéǵ ad 6-3 3-6 6-3.

Sucès in dópi

In dópi la tenìsta bulgnéśa l'è stata bòna ad vìnsar daśnóṿ tìtui, sédas sun la sò amìga la Roberta Vinci. Sèg l'à anc purtâ a cà tri di quàtar tìtui dal Gran Slam (fra 'l 2012 e 'l 2013), a gh manca sōl qvél ad Wimbledon in dua i èṅ rivàdi in di quàrt in dal 2012.

Finàli in di Gran Slam

Turnéo An Vins/Pardû Aversàri in finàl Puntéǵ
Roland Garros 2012 P Marija Šarapova 3-6 2-6

Culegamènt estéran