Karolína Plíšková

Da Wikipedia.
C'l artìcul chè 'l è scrit in Miranduléś Emiliàn
Karolína Plíšková 2014


La Karolína Plíšková (Louny, 21 ad Mars dal 1992) l'è na tenìsta céca.

Prufesiunìsta da 'l 2009, l'è élta 186 cm e la péśa 72 chilo. I gh piàś'n i lìbar ad Paulo Coelho e la và mata par la pasta.

In dla sò caréra 'l à vins un turnèo WTA e nóṿ ad qvéi ITF e l'è stada bòna ad rivàr a 'l 71śum pòst in clasìfica.

Caréra

In dal Luj dal 2009 la śōga 'l turnèo ad Praga, prufitànd dna carta salvàdga, ma la pèrd a 'l prim tùran da l'Iveta Benešová par 7-6 1-6 3-6, stés quèl anc 'l an dòp ma 'sta vòlta la céd a la Johanna Larsson.

In dal 2011 la pèrd a 'l prim tùran a Cupenàghen da l'Angelique Kerber 2-6 2-6. La próa al qualificasiòṅ a gl'US Open ma la pèrd subìt da la Mandy Minella. In Setémbar la i pasa invéci a Tokyo ma incóra na vòlta la và fóra a 'l prim tùran (6-1 3-6 4-6 da l'Irina-Camelia Begu).

In dal 2012 la pèrd a Auckland 3-6 4-6 da la Yanina Wickmayer dòp avér pasâ 'l qualificasiòṅ cóntar la Monica Puig. Finalmènt la vins al sò prim incóntar WTA a Kuala Lumpur baténd la Kai-Chen Chang 6-3 6-2 ma pò la céd in dū sét a l'Agnieszka Radwańska. A 'l Roland Garros la s fà strada in dal qualificasiòṅ dand la paga a la Laura Robson ma pò la tasta al pugnét alvâ dla Marion Bartoli ch'la la manda a cà 6-3 6-3. A Wimbledon invéci la pèrd subìt da la Sloane Stephens. In Utóbar la n gh la cava briśa a śugàr in dal tablòṅ prinsìpal ad Linz par cólpa dla Bethanie Mattek-Sands ch'la la bat 6-3 7-6. La finìs 'l an a 'l 102śum pòst.

In dal 2013 la fà sù tri scunfìti ad fila a 'l prim tùran a Brisbane (6-7 6-7 da l'Ol'ga Alekseevna Pučkova), a Sydney (1-6 3-6 da la Sara Errani) e a gl'Australian Open (5-7 7-5 4-6 da l'Eleni Daniilidou). Da nùmar 127 dal mónd la và a śugàr al turnèo ad Kuala Lumpur e la 'l vins, dand la paga prima a l'Ayumi Morita in semifinàl e pò a la Bethanie Mattek-Sands, crudàda śò in cal méntar a 'l 197śum pòst, par 1-6 7-5 6-3. A Indian Wells la pèrd a 'l secónd tùran da la Caroline Wozniacki 7-5 3-6 3-6 e la s férma in di quàrt a Katowice par maṅ dla Roberta Vinci, pò vinsidōra, ch'la gh'à la méj par 6-1 6-0.

Culegamènt estéran