Petra Kvitová

Da Wikipedia.

C'l artìcul chè 'l è scrit in Miranduléś Emiliàn


La Kvitová la s tîṅ strica la sò rachéta
La Kvitová cun la cópa dla Fed Cup dal 2011


La Petra Kvitová (a s lèś Pètra Qvìtovâ [ˈpɛtra ˈkvɪtovaː]) l'è na tenìsta céca nada a Bílovec 'l 8 ad Mars dal 1990. L'è élta 182 cm e la péśa 70 chilo.

Da pìcula la psiva śugàr a vòley, tgnénd a drē a sò pàdar Jiří ch'al fava 'l alenadōr ad cal spòrt lè, ma invéci 'l à pò sarnî al tènis anc parchè al sò ìdul l'éra la Martina Navrátilová, tacànd però dimóndi tard, a séd'ś an.

In dla sò caréra 'l à vins déś turnèo in tut (cun la pèrla ad Wimbledon 2011) rivànd a èsar la nùmar 2 dal mónd al 10 ad Śnar dal 2012. L'à anc purtâ a cà al Master dal 2011 (cóntar la Viktoryja Azaranka) e dū Fed Cup (2011 e 2012).

Caréra

La Petra impgnàda a 'l servìsi a Wimbledon
Petra Kvitová

La Kvitová la taca a śugàr in dal tènis di prufesiunìsta in dal 2008 e la fà subìt na vitma impurtànta: la Venus Williams a la Cellular South Cup. In Śugn la và dimóndi avànti a gl'Open ad Frància rivànd a 'l quàrt tùran baténd in d'l órdan la giapunéśa Akiko Morigami, l'austragliàna Samantha Stosur e l'ungheréśa Ágnes Szávay.

In dal 2009 la fà sèntar vinsénd al prim tìtul WTA a Hobart. A gl'US Open la bat la nùmar òṅ dal mónd Dinara Safina in tri set a 'l tèrs tùran quànd lē l'éra sōl la nùmar 72 dal ranking. A Linz la riva in finàl baténd via via l'Andrea Petković, la Iveta Benešová, la Carla Suárez Navarro e l'Agnieszka Radwańska ma la n gh la cava briśa a far fóra la bélga Yanina Wickmayer ch'la vins par 6-3 6-4.

In dal 2010 la pèrd 6-2 6-1 a gl'Australian Open da la Serena Williams che pò la vinsarà 'l tìtul. A la Cellular South Cup la gh'à d'inchinàr-as a la Marija Šarapova in semifinàl. Stés riśultâ anc a Wimbledon, batùta incóra da la più śóvna dal Williams, ma la s tōś la sudisfasiòṅ ad bàtar la Viktoryja Azaranka e la danéśa Caroline Wozniacki e a dvintàr la nùmar 29 dal mónd. Quànd a pâr ch'la pòsa vulàr in élt a sucéd 'l eśàt cuntràri cun di prim e di secónd tùran ad fila. A và 'n pò méj a gl'Us Open (tèrs tùran, batùda par la Kim Clijsters) e a i China Open (quàrt ad finàl pardénd da la Caroline Wozniacki, la nóva nùmar òṅ). La finìs 'l an a 'l nùmar 34 dal mónd.

In dal Śnar dal 2011 la vins al turnèo ad Brisbane cun un séc 6-1 6-3 a la tedésca Andrea Petković. A gl'Australian Open la riva a i quàrt e pò la vins incóra un tìtul baténd la Kim Clijsters a Parì par 6-4 6-3. 'L 8 ad Maǵ dal 2011 la s pòrta a cà anc al turnèo ad Madrid dand la paga a la Viktoryja Azaranka par 7-6 6-4. Chi riśultâ chè acsè bèi i la cùcian dimóndi in élt in di prim dèś pòst dal ranking WTA. Al 2 ad Luj la vins al sò prim Slam a Wimbledon e la 'l fà cóntar la Marija Šarapova cun al puntéǵ ad 6-3 6-4. Incóra na vòlta però la sò stagiòṅ dòp l'èrba l'è dimóndi fiàpa ma a Linz la tórna a 'l sucès cóntar la śluvàca Dominika Cibulková‎ batùda in finàl par 6-4 6-1. In Utóbar la śōga al Master a Ìstanbul. In di round robin la mét sóta la Vera Zvonarëva, la Caroline Wozniacki e l'Agnieszka Radwańska. In semifinàl la gh lasa strada la Samantha Stosur méntar la finàla l'è sua par 7–5, 4–6, 6–3 in di cunfrònt dla Viktoryja Azaranka. Cal tìtul chè la gh parmét ad rivàr a sōi 115 punt da 'l èsar la nùmar òṅ dal clasìfichi mundiàli dal tènis dal fémni. Cuma s'a n fus incóra asè, la Petra la vins i sò dū singulàr dla finàl dla Fed Cup, cópa ch'la s pòrta a cà par 3-2 in di cunfrònt dla Rùsia.

In dal 2012 la gh'à da patìr soquànt infurtùni e pò la fà fadìga a catàr la fórma giùsta. Dòp soquànt prim tùran la gh la cava a rivàr in semifinàl a gl'Australian Open e a 'l Roland Garros ma la và fóra a i quàrt ad finàl a Wimbledon ad òpra dla Serena Williams. A Montreal la bat la cinéśa Na Li in finàl par 7–5, 2–6, 6–3 e la fà 'l bis anc a New Haven quànd a inchinàr-as l'è la Marija Kirilenko par 7-6, 7-5, dòp avér pardû in semifinàl la stmana prima a Cincinnati cóntar l'Angelique Kerber. A gl'US Open la và invéci fóra a 'l quàrt tùran par maṅ dla francéśa Marion Bartoli. In Nuvémbar la vins però la sò secónda Fed Cup a Praga cóntar la Sèrbia.

In dal Favràr dal 2013 la vins al sò dècim turnèo a Dubai cóntar la Sara Errani par 6-2, 1-6, 6-1. In Mars la buta in dal rusc la sò partìda di quàrt di Indian Wells Masters in Califòrgna cóntar la rusa Marija Kirilenko quànd la pèrd al secónd set faghénd quàtar fai dópi ad fila e pò la partìda par 6-4 4-6 3-6.

Finàli in di Gran Slam

Turnéo An Vins/Pardû Aversàri in finàl Puntéǵ
Wimbledon 2011 V Marija Šarapova 6–3, 6–4

Culegamènt estéran