Ekaterina Makarova

Da Wikipedia.
C'l artìcul chè 'l è scrit in Miranduléś Emiliàn
La Makarova tòlta śò durànt gl'US Open dal 2012


L’Ekaterina Valer'evna Makarova, (Mósca, 7 ad Śugn dal 1988, Екатерина Валерьевна Макарова in Rus) l'è na tenìsta rusa ch'l'è stada la nùmar daśnóṿ dal mónd (al 7 ad Śnar dal 2013). L'è élta 180 cm par 65 chilo e l'è prufesiunìsta da 'l Utóbar dal 2004.

In dla sò caréra l'à vins un tìtul WTA in singulàr e quàtar in dópi ch'la śōga in gènar insém a l'Elena Vesnina.

La và mata par la cantànta Rihanna, par la pizza e al suc ad póm.

Caréra

La Makarova la taca a śugàr a tènis a siē an par pò tōr par a 'l sircùit senior dal fémni a quind'ś an. Dòp avér-'g-la cavàda a dvintàr una dal primi 250 śugadōri dal mónd in dal Maǵ dal 2005, la fà pò fadìga a 'ndàr avànti in di daśdòt méś a vgnir.

La rusa la tira 'n cólp a 'l Roland Garros dal 2009

Dòp ès'r-as mis in bisàca tri tìtui ITF e avér pasâ soquànt tùran in di Gran Slam dal 2007 e 2008, in dal Maǵ 2009 la śōga finalmènt dū finàli in sla tèra rósa ma la i pèrd: a Fès in Maròc la céd a la spagnōla Anabel Medina Garrigues par 0-6 1-6 mént'r a Estoril (Purtugàl) a gh'à la méj in dū sét la Yanina Wickmayer.

A gl'Australian Open dal 2010 la pèrd a 'l secónd tùran da la Sara Errani par 2-6 3-6. Al 19 ad Śugn dal 2010 la vins al sò prim turnèo WTA in sl'èrba 'd Eastbourne baténd in finàl la bielurùsa Viktoryja Azaranka par 7-6 6-4. Prima l'iva fat fóra atri quàtar śugadōri dal primi vint: la Flavia Pennetta (11), la Nadia Petrova (13), la Svetlana Kuznecova (20) e la Samantha Stosur (7).

In di Australian Open dal 2011 la bat a surpréśa la sèrba Ana Ivanović a 'l prim tùran par 3-6 6-4 10-8 e pò la mét in riga anc la Lesia Tsurenko e la rusa Nadia Petrova. La pèrd in di utàṿ da la Kim Clijsters par 7-6 6-2. Stés riśultâ anc a 'l Roland Garros ma chè l'è la Viktoryja Azaranka a saràr-'g al pas cun al puntéǵ ad 2–6 3–6.

In dal 2012 la riva, par la prima vòlta in caréra, in di quàrt 'd un Gran Slam: a sucéd in Austràglia in dua la s parmét ad dar la paga a la Serena Williams par 6–2 6–3 prima ad patìr un séc 0–6 2–6 da la Marija Šarapova. La s ripét anc in dal 2013 quànd la bat prima la Marion Bartoli e pò l'Angelique Kerber par pò pigàr-'s incóra a la Marija Šarapova par 6-2 6-2 in di quàrt.

Culegamènt estéran