Marija Šarapova

Da Wikipedia.

C'l artìcul chè 'l è scrit in Miranduléś Emiliàn


Na Šarapova un pôc stimulìna
La Šarapova tòlta śò in dal 2010


La Marija Jur'evna Šarapova, (Njagan', 19 'd Avrìl dal 1987, ciamàda in Rus Мария Юрьевна Шарапова, scólta'l chè) l'è na tenìsta siberiàna ch'l'è stada la nùmar òṅ dal mónd (al 22 'd Agóst dal 2005). Dòp ès'r-as fata i òs a sèt an a la scóla ad Nick Bollettieri, in dla sò caréra l'è pò stada bòna ad vìnsar tut i turnèo di Gran Slam, da 'l 2004 a 'l 2012.

Élta 188 cm par 59 chilo, la "Masha" l'è stada badśàda da la rivìsta americàna Forbes una dal dóni più bèli e puténti dal mónd, anc par via di bèsi ch'la ciàpa, vint-siē migliòṅ ad dòlar 'l an a 'l incìrca.

L'è stada la prima tenìsta rusa a vìnsar i turnèo ad Wimbledon e di Australian Open.

Da spés i gh daṅ adòs p'r al fat ch'ad sòlit la fà di sîg quànd la culpìs la bucìna, rivànd anc a 105 decibel.

Caréra

La Šarapova versiòṅ 2007
La Marija in sal camp ad Wimbledon
Masha durànt al turnèo 'd Ìstanbul
Prim piàṅ dla rusa
La Šarapova a la rispòsta

La Marija la taca a śugàr in di turnèo WTA in dal 2002 tulénd na carta salvàdga śibìda p'r Indian Wells. A 'l prim tùran la fà fóra la nùmar 302 dal ranking, la Brie Rippner, ma pò la gh'ò da inchinàr-as a la Monica Seles par 6-0, 6-2. A la fiṅ d'l an l'è la nùmar 186 dal mónd.

In dal 2003 la pèrd par soquànti vòlti sèmp'r a i prim tùran in fiṅ ch'la riva a śugàr in s'l èrba ad Birmingham. Chè la riva finalmènt a i quàrt baténd, fra gl'atri, anc l'Elena Dement'eva. A Wimbledon i gh dànan subìt na carta salvàdga e lē la fà 'l suo baténd l'Elena Bovina e anc la nùmar 12 Jelena Dokić. La gh'à da chinàr la tèsta sōl cun la Svetlana Kuznecova par 6-1, 2-6, 7-5. Rivàda a èsar una dal primi sinquànta śugadōri dal mónd, in Utóbar la vins al sò prim turnèo in sal cimènt ad Tokyo cóntar l'ungheréśa Aniko Kapros batùda par 2-6, 6-2, 7-6, e pò 'n àt't incóra in Cànada.

In dal 2004 la pèrd par dū vòlti cun l'Anastasia Myskina e pò a Róma cun la Silvia Farina Elia, ma turnànd a śugàr in sl'èrba la s tōś l'arvìnsida: prima la vins al turnèo ad Birmingham e pò anc Wimbledon faghénd fóra via via gl'americàni Amy Frazier par 6-4 7-5, Lindsay Davenport par 2-6, 7-6, 6-1 e, in finàl, la Serena Williams spasàda via par 6-1, 6-4. Chi lē la pèrd incóra sèg in dla finàla di WTA Championship par 4-6, 6-2, 6-4. La Šarapova la finìs 'l an a 'l quàrt pòst dla clasìfica.

A gl'Australian Open dal 2005 la Šarapova la cata incóra la Williams in sla sò strada in semifinàl e 'sta vòlta la pèrd par 6-2, 5-7, 6-8. La rusa la gh'à la manéra ad daśmindgàr-as subìt incòsa parchè la vins dū turnèo ad fila, al Tier I ad Tokyo (su la Lindsay Davenport) e Doha. A Indian Wells la gh riva da nùmar tri ma in semifinàl la Davenport la gh dà la paga baténd-la par 6-0, 6-0. A Miami la perd in finàl cóntar la Kim Clijsters ma dòp avér mandâ a cà la Justine Henin e la Venus Williams. Cuma 'l sòlit in sla tèra la patìs un pôc (a Parì la Henin la la bat) ma in s'l èrba la gh la cava a far suo incóra Birmingham (cóntar la Jelena Janković par 6-2, 4-6, 6-1) ma a Wimbledon la pèrd da la Venus Williams in semifinàl, dvintànd però listés la nùmar òṅ dal mónd anc se sōl par na stmana. A gl'US Open la pèrd in semifinàl in tri set da la Kim Clijsters e la finìs 'l an cuma nùmar quàtar.

In dal 2006 la pèrd par dū vòlti da la Justine Henin: in semifinàl a gl'Australian Open e pò in dla finàla ad Dubai. Anc la Martina Hingis la vins sèg (par 6-3, 6-1) in dla semifinàl ad Tokyo. La Šarapova invéci la vins a Indian Wells ma la gh'à da lasàr strada a l'Amélie Mauresmo in semifinàl a Wimbledon. In tèra americàna la rusa la tórna a śugàr a 'l màsim, vinsénd San Diego (cóntar Kim Clijsters) e anc i US Open in di cunfrònt dla Justine Henin par 6-4, 6-4. La pòrta a cà anc dū turnèo in sal cimènt a 'l quèrt: Śurìg e Linz. Pardénd invéci al Master cóntar la Justine Henin, la rusa l'è custréta a lasàr a la bélga la curóna da nùmar òṅ.

Al 2007 al s vèra par lē cun la finàla pardùda a gl'Australian Open: la più śóvna dal Williams la gh mòla un séc 6-1, 6-2. Ma p'r al fat che l’Henin la n à mia śugâ cal turnèo lè, la muciâ sù di punt abàsta par far-la turnàr in sima a la clasìfica WTA, dòp al sinc stmani dal 2006. Ma a Indian Wells la pèrd la puśisiòṅ andànd fóra a 'l quàrt tùran ad òpra dla Vera Zvonarëva. A Miami la bat la Venus ma minga sò surèla Serena ch'la l'asfàlta a 'l quàrt tùran par 6-1, 6-1. Un prubléma a la spala la gh mét i spròc in mèś a 'l rōdi in dla stagiòṅ dla tèra rósa: la fà in tèmp a rivàr in semifinàl a 'l Roland Garros par pò pèrdar da l'Ana Ivanović. In s'l èrba la patìs dū scunfìti, da la sèrba Jelena Janković a Birmingham e da la Venus Williams. Prima dla fin d'l an la s pòrta a cà al turnèo ad San Diego.

In dal 2008 la fà suo 'l Australian Open baténd la Lindsay Davenport, la Jelena Janković e l'Ana Ivanović in finàl ma 'l ciòc la 'l fà casànd fóra in di quàrt la nùmar òṅ Justine Henin ch'la n pardìva da 32 partìdi. La s ripét anc a Doha cóntar la Vera Zvonarëva par 6-1, 2-6, 6-0 e pò, par la prima vòlta, anc in sla tèra vérda 'd Amelia Island baténd la śluvàca Dominika Cibulková cun al puntéǵ ad 7-6, 6-3. A 'l Roland Garros la pèrd in di utàṿ da la Dinara Safina e l'Ana Ivanović la ringràsia vinsénd al turnèo e dvintànd lē la nùmar òṅ dal mónd. A Wimbledon pò la và fóra subìt a 'l secónd tùran e in Cànada la s fà incóra mâl a la spala e la stagiòṅ par lē la finìs lè.

In dal 2009 la taca a śugàr in singulàr sōl a Varsàvia, in sla tèra rósa. Anc s'la n è briśa in fórma, a 'l Roland Garros la và avànti baténd a 'l secónd tùran la Nadia Petrova par 6-2, 1-6, 8-6 e pò anc la Na Li par 6-4, 0-6, 6-4 in dū óri e trédas minùt. Ma in di quàrt la vèṅ spasàda via da la Dominika Cibulková par 6-0, 6-2 dòp avér salvâ sinc match point in sal 6-0, 5-0. A Wimbledon la và fóra a 'l secónd tùran. A Los Angeles la strabùca in semifinàl p'r òpra dla Flavia Pennetta par 2-6, 6-4, 3-6. La Marija la và śò a 'l 32śum pòst.

Al 2010 al n taca minga bèṅ par lē parchè la và fóra a 'l prim tùran da part dl'atra rusa Marija Kirilenko, na ròba ch'la n sucidìva briśa da i tèmp dal Roland Garros 2003. La và méj in di turnèo sucesìṿ parchè la vins a Memphis e anc a Straśbùrg, al prim in sla tèra rósa. In sla tèra pariśìna la pèrd a 'l tèrs tùran p'r òpra dla Justine Henin mént'r a Wimbledon la riva a 'l quàrt tùran ma la Serena Williams la la manda a cà cun un 6-7, 4-6. In dla stagiòṅ la pèrd tri finàli: a Birmingham da la Na Li par 7-5, 6-1, a San Diego da la Viktoryja Azaranka par 6-4, 6-1 e a Cincinnati da la Kim Clijsters par 2-6, 7-6, 6-2.

In dal 2011 la Šarapova la decìd ad cambiàr al sò alenadōr, pasànd da Michael Joyce a Thomas Högstedt. Anc s'la pèrd 1–6, 4–6 la finàla dal Sony Ericsson Open par maṅ dla Viktoryja Azaranka, la gh la cava listés a turnàr in dal primi déś dal mónd dòp dū an. A Róma la bat la Samantha Stosur par 6-2, 6-4, faghénd sua la finàla, e pò in Agóst la vins anc al turnèo ad Cincinnati in sal cimènt cóntar la Jelena Janković par 4-6, 7-6, 6-3. In mèś a gh'è la finàla pardùda par 6-3, 6-4 a Wimbledon cóntar la Petra Kvitová e la semifinàl dal Roland Garros fata sua da la Na Li par 6-4, 7-5. A gl'US Open l'è incóra la Flavia Pennetta a dar-'g un daspiaśér a 'l tèrs tùran: l'itagliàna la pòrta a cà la partìda par 3-6, 6-3, 4-6. Chi riśultâ chè i gh parmétan ad turnàr a èsar la nùmar quàtar da mónd.

A gl'Australian Open dal 2012 la riva in finàl dòp avér fat fóra la Petra Kvitová cun al puntéǵ ad 6-2, 3-6, 6-4 ma la Viktoryja Azaranka la n gh lasa minga scamp mulànd-ag un séc 6-3, 6-0 ch'al gh parmét ad dvintàr la nùmar òṅ dal mónd. Dòp èsar stada batùda in di quàrt dal turnèo Open GDF Suez da l'Angelique Kerber cun un dópi 6-4, la Maria la tōś part a Indian Wells in dua l’Azaranka la gh dà incóra la paga in finàl par 6-2, 6-3. Par la Šarapova a riva n'atra finàla: a Miami la la spunta l'Agnieszka Radwańska par 7-5, 6-4. In Avrìl a riva al prim tìtul d'l an quànd a Stucàrda la bat na vòlta tant l’Azaranka par 6-1, 6-4 e pò in Maǵ a s śònta anc qvél ad Róma in dua la gh'à la méj su la Na Li par 4-6, 6-4, 7-6. La sò fórma in sla tèra rósa la gh parmét pò ad vìnsar al sò prim Roland Garros in Śugn in finàl cóntar la Sara Errani dòp èsar turnàda la nùmar òṅ dal mónd baténd in semifinàl la Petra Kvitová. Cun cal turnèo chè in bisàca, la Šarapova la dvénta la dècima tenìsta a 'l mónd a purtàr-'s a cà al Career Grand Slam.

In dal Mars dal 2013 la bat in dla finàla 'd Indian Wells la Caroline Wozniacki par 6-2, 6-2 e acsè la tórna a 'l nùmar dū dal clasìfichi mundiàli a 'l pòst dla Viktoryja Azaranka custréta a dar-'g a muć in dla sò partìda di quàrt cóntar la danéśa par via 'd 'n infurtùni ch'la n gh parmét minga ad diféndar al tìtul d'l an prima. La Marija la próa a 'rdupiàr anc a Miami: in finàl la s pòrta avànti 6-4 3-2 e servìsi in di cunfrònt dla Serena Williams ma pò la vèṅ asfaltàda pardénd tut i déś śōg a vgnir.

Finàli in di Gran Slam

Turnéo An Vins/Pardû Aversàri in finàl Puntéǵ
Wimbledon 2004 V Serena Williams 6-1, 6-4
US Open 2006 V Justine Henin 6-4, 6-4
Australian Open 2007 P Serena Williams 6-1, 6-2
Australian Open 2008 V Ana Ivanović 7-5, 6-3
Wimbledon 2011 P Petra Kvitová 6-3, 6-4
Australian Open 2012 P Viktoryja Azaranka 6-3, 6-0
Roland Garros 2012 V Sara Errani 6-3, 6-2

Culegamènt estéran