Bethanie Mattek-Sands

Da Wikipedia.

C'l artìcul chè 'l è scrit in Miranduléś Emiliàn


La Mattek a 'l servìsi, daspatnàda e cun dū gambài adòs


La Bethanie Lynn Mattek-Sands (Rochester, 23 ad Mars dal 1985) l'è na tenìsta americàna, prufesiunìsta da 'l 1999. L'è élta 168 cm e la péśa 66 chilo. La dróa al bras dèstar e la tira 'l arvèrs a dū maṅ. L'è anc ciamàda la Lady Gaga dal tènis par la sò manéra mata ad vistìr-as[1]. 'L à vins sinc tìtui ITF in tut.

La stà a Miami (Flòrida) insém a sò marè Justin Sands, spuśâ in dal 2008, e a 'l sò cagnàs Ruger[2] ma la fà gl'alenamènt a Phoenix (Ariśòna). A gh piàś dimóndi far dal còmpri, tgnir a drē a la mòda, balàr e guardàr al partìdi ad futból americàṅ. Da pìcula al sò tenìsti preferìdi i éran la Steffi Graf e la Monica Seles.

In dla sò caréra l'è rivàda a èsar la nùmar trénta dal mónd 'l 11 ad Luj dal 2011 e la nùmar sinc in dópi, in dua l'à vins sédas tìtui WTA, in mèś a i quài a gh'è anc dū Ślam purtâ a cà in dal 2015 insém a la céca Lucie Šafářová. A s trata di turnèo di Australian Open (6-4 7-6 a la Yung-Jan Chan e a la Jie Zheng) e dal Roland Garros (3-6 6-4 6-2 a la Casey Dellacqua e a la Jaroslava Švedova).

'D arcurdàr anc al tìtul ad qvél misć purtâ a cà a gl'Australian Open dal 2012 insém a Horia Tecău cóntar la còpia Elena Vesnina/Leander Paes, finàla vinsa c'n al puntéǵ ad 6-3 5-7 [10-3].

Caréra

La taca a śugàr da prufesiunìsta in dal Nuvémbar dal 1999, mancànd la qualificasiòṅ in dal turnèo WTA ad Philadelphia p'r òpra dla giapunéśa Nana Smith. In dal 2000 la i và a śugàr anc a Miami e a gl'US Open ma al riśultâ 'l è cumpagn.

In dal 2001 la próa a qualificàr-as p'r al turnèo WTA americàṅ ad Miami ma la và fóra a 'l secónd tùran. A Amelia Island i gh dànan na carta salvàdga ma lē la n pasa briśa 'l prim tùran pardénd in tri sét da la Jill Craybas. La tōś part anc a gl'US Open ma anca lè la và a cà subìt p'r òpra dl'austragliàna Alicia Molik ch'la vins sèg 4-6 6-2 6-4.

La Bethanie c'n un brét in cô e na cóa fùcsia
La Mattek tòlta śò durànt gl'US Open 2007 in dua la spiàna 'n vistî a maci 'd pantéra da lutadōra 'd catch
'N arvèrs tajâ dl'americàna in dal 2009

In dal 2002 la riva in di quàrt di turnèo ITF ad Fullerton e 'd Allentown. In Agóst la śōga al qualificasiòṅ (da nùmar 401 dal mónd) di US Open e la i pasa ma al prim tùran la Jennifer Capriati la gh dà na lesiòṅ ch'la farà fadìga a daśmindgàr-as baténd-la par 6-0 6-0. Almànc la pòrta a cà di punt bòṅ par rivàr a la puśisiòṅ 279 dal ranking dal fémni. In d'l ITF ad Pittsburgh in Nuvémbar la cata in dal prim tùran dal qualificasiòṅ na śōvra Marija Šarapova ch'la gh'à la méj sèg par 6-0 6-3. La Mattek-Sands la finìs 'l an cun na finàla pardùda a Boynton beach.

La vèra al 2003 a la granda vinsénd 'l ITF ad Fullerton baténd in finàl l'ulandéśa Seda Noorlander par 6-4 3-6 6-4 e prima incóra al tèsti ad série nùmar tri Mashona Washington e nùmar siē, l'itagliàna Maria Elena Camerin. In Mars la tōś part a i turnèo 'd Indian Wells e Miami dasfrutànd na carta salvàdga ma la và fóra subìt sóta i cólp dla Flavia Pennetta e dla Meilen Tu. A Charleston la pasa al qualificasiòṅ ma la fà incóra prim tùran (2-6 2-6 da la Laura Granville). In Luj la bat l'Alberta Brianti, la Jelena Janković e la Ansley Cargill in d'l ITF 'd Oyster Bay ma pò la céd in finàl a l'Anna-Lena Groenefeld. In Agóst la pèrd in tri sét a 'l inìsi di US Open da la francéśa Nathalie Dechy.

In dal 2004 la pasa i prim méś a pruàr a pasàr al qualificasiòṅ in soquànt turnèo WTA ma la n gh la cava mai. A la fiṅ 'd Śugn a pâr ch'la sia la vòlta bòna a Wimbledon dòp la partìta vinsa 6-2 6-2 cun la Melanie South ma a n è briśa acsè parchè l'è l'Eva Birnerová a métar fiṅ a i sò sógn in tri sét. In Luj la tōś par a 'l turnèo ITF ad Schenectady in di Stat Unî e la 'l pòrta a cà in finàl cun la Maureen Drake par 6-3 6-1. Finàlmènt la pōl śugàr dū turnèo WTA canadéś a Montreal e a Vancouver e in tut i dū i caś la riva a 'l secónd tùran, pardénd prima da la nùmar quatórdas dal mónd Vera Zvonarëva par 2-6 6-7 e pò da la Laura Granville par 3-6 6-7. A gl'US Open, da carta salvàdga, la céd a 'l prim tùran a l'Iveta Benešová, nùmar quarànta-tri dal mónd, par 4-6 6-3 3-6. In Setémbar la s fà strada in d'l ITF ad Troy rivànd in semifinàl e pardénd da la Shenay Perry par 4-6 6-3 1-6. La finìs 'l an a 'l 166śum pòst dal ranking.

In dal 2005 la s fà nutàr a Cincinnati in dua, pasànd p'r al qualificasiòṅ, la bat subìt la Marion Bartoli 1-6 6-4 7-6 (lasànd-la a śèr in dal tie-break), la Camille Pin 6-3 2-0 bandòṅ e la Jelena Janković par 6-1 0-6 6-2, prima ad cédar in semifinàl a la śvisra Patty Schnyder par 4-6 1-6. In Agóst la śōga al qualificasiòṅ a Los Angeles ma la pèrd in d'l ùltim tùran da l'itagliàna Tathiana Garbin par 7-6 5-7 1-6. La śōga listés in dal tablòṅ prinsipàl cuma pardénta furtunàda ma pò la pésca incóra la Garbin ch'la la mét in riga in na manéra incóra più ciàra: 6-4 6-2. A la fiṅ dal méś, cun na carta salvàdga in bisàca, la tōś part a gl'US Open ma la gh pèrd subìt cun la Mariana Díaz-Oliva par 4-6 3-6. A la fiṅ d'l an la pòrta a cà al tìtul ITF ad Palm Beach Gardens baténd in finàl l'ungheréśa Melinda Czink 4-6 6-4 6-4.

In dal 2006 la próa a pasàr al qualificasiòṅ a Tokyo e a Pattaya City ma la n gh la cava minga. In Favràr la riva invéci in di quàrt a Bugutà ma la ciàpa la paga da la Flavia Pennetta 3-6 1-6. A Indian Wells la bat in d'l ùltim tùran dal qualificasiòṅ la Viktoryja Azaranka e pò la pasa anc un tùran cun la Nicole Pratt prima ad pèrdar da l'indiàna Sania Mirza 2-6 6-3 5-7. A 'l Roland Garros la patìs incóra un 3-6 1-6 da la Flavia Pennetta a 'l prim tùran. A Birmingham la pórta via 'n sét a la Marion Bartoli a 'l secónd tùran ma a Wimbledon la vèṅ asfaltàda subìt da la Venus Williams 1-6 0-6. A Cincinnati la pasa 'n tùran ma pò la sa stablìs atàc a la Serena Williams. A Los Angeles la Bethanie la s tōś l'arvìnsida cun la Pennetta baténd-la 6-4 2-6 7-5 e pò la riva in di quàrt pardénd 6-4 1-6 1-6 da l'Elena Dement'eva. A la fiṅ 'd Agóst la śōga gl'US Open ma la và fóra subìt p'r òpra dla Daniela Hantuchová. In Utóbar la pèrd la finàl d'l ITF ad Houston. La finìs 'l an da nùmar 104 dal mónd.

La vèra al 2007 śugànd al qualificasiòṅ a gl'Australian Open ma la n i pasa minga parchè la Stéphanie Cohen-Aloro la s mét in mèś a 'l tèrs tùran, avénd la méj sèg par 2-6 7-6 6-1. La gh và méj a Tokyo: faghénd fóra par 6-4 1-6 6-3 la Meilen Tu la finìs in dal main draw dal turnèo giapunéś ma pò la ciàpa la paga da la cinéśa Jie Zheng par 2-6 1-6. A Memphis la pèrd in di quàrt da la Shahar Peer par 0-6 3-6 mént'r a Indian Welles la gh'à da pigàr-as a 'l secónd tùran a la nùmar déś dal mónd, la Nicole Vaidišová, par 4-6 1-6. In Mars e Avrìl la śōga al qualificasiòṅ a Miami, Amelia Island e Charleston ma la n i pasa briśa. In Maǵ la vins 'l ITF 'd Indian Harbour Beach baténd in finàl l'Ol'ga Govorcova 7-5 1-6 6-1. La pèrd pò in dū sét in di secónd tùran a Wimbledon (da la Svetlana Kuznecova par 6-7 4-6) e a gl'US Open (incóra da la Shahar Peer). In d'l ITF ad Pittsbourgh la bat a 'l prim tùran la cruàta Petra Martić ma pò la céd a la Ol'ga Pučkova. La sèra 'l an a 'l 112śum pòst.

La Bethanie impgnàda in di US Open 2010
La Mattek-Sands in Austràglia in dal 2011
La Bethanie tòlta śò a Wimbledon 2011
La Mattek la tira 'n servìsi a Charleston
Un servìsi cun al bras dèstar tatuâ
L'americàna prònta par rispóndar

Al 2008 al taca mâl par lē ch'la mùcia sù sōl di prim e di secónd tùran. A Bugutà la và a cà subìt pardénd da la qualificàda Carla Suárez Navarro par 5-7 2-6 mént'r a Memphis l'è la Julia Görges a dar-'g un daśpiaśēr dòp ch'l'americàna l'iva fat fóra la nùmar trédas dal mónd, la francéśa Tatiana Golovin. In Avrìl la Bethanie la tōś part a i turnèo 'd Amelia Island e ad Charleston. In dal prim la fà 'l valìś cun la Sorana Cîrstea par 3-6 6-2 4-6 mént'r in sla tèra vérda, dòp avér batû in tri sét la cinéśa Meng Yuan, la vèṅ sćiancàda literalmènt da la Marija Šarapova 0-6 0-6. La stmana dòp però l'americàna l'è bòna ad vìnsar al tìtul ITF ad Dothan cóntar la Varvara Lepchenko par 6-2 7-6. La n s ripét minga a Indian Harbour Beach parchè la céd in finàl 4-6 6-7 a la bélga Yanina Wickmayer. L'ucaśiòṅ par far-gh-la pagàr a la Marija Šarapova la s preśénta a 'l secónd tùran dal Roland Garros. La nùmar òṅ dal mónd però la s la cava p'r al śbrag dla scùffia 6-2 3-6 6-2. Par la Mattek-Sands a pâr finalmènt ch'la mòla la sia scrucàda. La riva acsè in semifinàl a Birmingham, in dua la pèrd incóra da la Yanina Wickmayer par 5-7 6-7, e a 'l quàrt tùran ad Wimbledon in dua la lasa strada a la Serena Williams 3-6 3-6 dòp però avér batû la Marion Bartoli 6-4 6-1. Anc a Los Angeles l'è 'n òs dimóndi dûr par chi atri, sōl la Flavia Pennetta la gh la cava a bat'r-la a fadìga 3-6 6-2 7-5. A gl'US Open la pasa sōl un tùran prima ad pèrdar da l'Alizé Cornet par 6-7 1-6. La Bethanie la sèra 'l an cun la finàl a Quebec City, pardùda 6-4 4-6 1-6 da la Nadia Petrova, e cun al 39śum pòst dla clasìfica in bisàca.

In dal 2009 la taca a śugàr tard (in Mars) e la n è più bòna ad far i riśultâ d'l an prima. La pèrd sèmp'r in di prim o in di secónd tùran, catànd par strada dal bruti ghigni cuma la Daniela Hantuchová (6-3 7-5 a Ponte Vedra Beach), la Caroline Wozniacki (6-1 7-5 a Róma), l'Elena Dement'eva (6-4 6-1 a Madrid), la Venus Williams (6-1 4-6 6-2 a 'l Roland Garros), la Samantha Stosur (6-4 6-7 6-2 a Wimbledon), la Nadia Petrova (6-3 3-6 6-3 a Stanford) e incóra la Venus Williams (6-4 6-2 a gl'US Open). In Avrìl la pèrd anc i sò dū singulàr ad Fed Cup cun al céchi Petra Kvitová e Lucie Šafářová. La pasa dū tùran sōl a Quebec City (cun la Varvara Lepchenko e cun la Vania King) ma la Lucie Šafářová la la manda pò a cà 3-6 4-6. L'americàna la ślìcia śò a 'l 152śum pòst.

Anc al 2010 al tōś na bruta piga. L'americàna la n pasa minga 'l qualificasiòṅ a gl'Australian Open parchè la céd a l'Yvonne Meusburger 6-3 5-7 4-6. A Memphis la patìs na scòpla a 'l secónd tùran da la Marija Šarapova, 6-1 6-1 al puntéǵ par la siberiàna. A Indian Wells la bat la Jaroslava Švedova 7-5 7-5 ma pò la gh'à da pigàr-as a la Shahar Peer 2-6 3-6. A Ponte Vedra Beach la pasa 'l qualificasiòṅ (baténd l'Andrea Hlaváčková 6-2 6-2, la Mónica Puig 2-6 6-2 6-1 e la Varvara Lepchenko 6-4 6-1) e la riva pò a 'l secónd tùran in dua la lòta ma la pèrd da l'Anastasija Pavljučenkova par 6-7 6-4 2-6. A Róma la s qualìfica incóra ma la céd in tri sét a la Jelena Janković a 'l secónd tùran. A Birmingham la bat subìt la parmśàna Alberta Brianti par 4-6 6-4 6-2 ma pò la n pōl far gnint cóntar la Marija Šarapova. A Wimbledon la sprava ad far méj ma la Karolina Šprem la n éra briśa 'd acòrd sèg. A Montreal l'è custréta incóra a far al qualificasiòṅ e lē la i pasa (baténd anc la Roberta Vinci 6-4 6-3) ma pò a 'l secónd tùran la nùmar quàtar dal mónd Kim Clijsters la la mét in riga cun al puntéǵ ad 4-6 6-4 6-3. A Quebec City, turnèo ch'a gh piàś dimóndi stand a i riśultâ, la riva in finàl ma a n è incóra par lē al mumènt ad vìnsar al sò prim tìtul WTA, difàti la qualificàda Tamira Paszek la gh al pòrta via baténd-la p'r un pēl 7-6 2-6 7-5. La finìs 'l an śugànd in cà la finàl dla Fed Cup cóntar l'Itâglia ma la pèrd al sò sìngulàr 6-7 2-6 dand al punt dal 2-0 a la Flavia Pennetta che pò la bat anc la Coco Vandeweghe 6-1 6-2 srand i cònt 3-1 e dand al secónd tìtul cunsecutìṿ a 'l sò paéś.

Al prim turnèo che la Mattek-Sands la śōga in dal 2011 'l è qvél 'd Hobart e a riva n'atra finàl par lē cun i scalp dl'Anastasija Pavljučenkova e dl'Angelique Kerber. In sal più bèl però la pardòna ad cà Jarmila Gajdošová la la bat 6-4 6-3. A gl'Australian Open però la pèrd mâl da la nùmar 139 dal mónd, l'Arantxa Rus, par 1-6 6-3 5-7. Dòp avér pardû i sò dū singulàr ad Fed Cup in Bélgi cun la Yanina Wickmayer e la Kim Clijsters, la riva a Parì e la fà la vóś grôsa mandànd a cà via via la Carla Suárez Navarro 6-0 6-3, la Stéphanie Cohen-Aloro 7-5 6-3 e l'Andrea Petković 7-6 2-6 6-3 ma pò la céd nét in semifinàl a la Petra Kvitová par 2-6 0-6. In Mars e Avrìl la śōga i turnèo americàṅ 'd Indian Wells, ad Miami e ad Charleston andànd sèmpar fóra a 'l secónd tùran śóta i cólp dla Shahar Peer, dla Caroline Wozniacki e dl'Elena Vesnina. La fà méj a Madrid in dua la s fà nutàr dimóndi baténd l'ex nùmar òṅ dal mónd l'Ana Ivanović e la nùmar quàtar dal mónd Francesca Schiavone. Sōl la Na Li l'è bòna ad bat'r-la a fadìga par 6-4 3-6 6-4. A Róma l'è la Flavia Pennetta a 'ndàr fóra sóta i sò cōlp. La Bethanie la riva a i tèrs tùran a 'l Roland Garros (pardénd da la Jelena Janković) e a Cupenàghen (la Mona Barthel l'arbàlta la situasiòṅ 1-6 6-3 6-4) par pò śugàr sōl a Wimbledon e a gl'US Open (dū prim tùran).

In dal 2012 la tórna a śugàr in dal sircùit a Hobart ma la céd a la Sorana Cîrstea a 'l secónd tùran par 6-2 3-6 5-7. In di tri turnèo a vgnir (Australian Open, Parì e Indian Wells) la vins sōl na partìda pardénd invéci da l'Agnieszka Radwańska 7-6 4-6 2-6, da la Roberta Vinci 3-6 6-1 3-6 e da l'Ekaterina Makarova 2-6 3-6. Dòp avér mancâ soquànti qualificasiòṅ (pardénd a Madrid da l'Anna Čakvetadze, a Róma da la Sloane Stephens e a Bruxelles da la Paula Ormaechea), la bat par 6-4 6-3 la Sabine Lisicki (nùmar trédas dal mónd) a 'l prim tùran dal Roland Garros ma pò la Sloane Stephens la l'asfàlta 6-1 6-1. Dòp a n avér śugâ briśa in Śugn, la Mattek-Sands la taca a pistàr incóra i camp dal sircùit ITF in Luj ma la n cata sù gnint. Dòp dū prim tùran a Montreal (2-6 2-6 da la Anastasija Rodionova) e a Cincinnati (3-6 5-7 da l'Andrea Hlaváčková), l'americàna la fà dal figùri da ciòld anc a New Haven e gl'US Open in dua la pèrd subìt in dū sét da la Sara Errani e da la Venus Williams. A Linz la riva in di quàrt pasànd p'r al qualificasiòṅ e baténd anc la Tamira Paszek e la Carla Suárez Navarro ma lasànd pò strada a l'Irina-Camelia Begu par 4-6 6-1 2-6. La finìs 'l an pardénd a 'l secónd tùran d'l ITF ad Phoenix da la Madison Keys par 3-6 5-7 finénd acsè dimóndi śò in clasìfica, a 'l 173śum pòst dal ranking dal fémni.

'L inìsi dal 2013 par lē 'l è da daśmindgàr. La n pasa briśa al qualificasiòṅ a Brisbane e a Melbourne. A Pattaya City e a Doha invéci la i pasa ma pò la và fóra subìt, pardénd da la Sorana Cîrstea 1-6 3-6 e da la Svetlana Kuznecova 6-7 4-6. In Dubai la céd a l'Elena Vesnina par 5-7 3-6 sénsa psér acsè śugàr in dal tablòṅ prinsipàl. In Favràr invéci l'è bòna ad far-as strada a Kuala Lumpur faghénd fóra in semifinàl l'Anastasija Pavljučenkova par 6-4 6-1 ma in finàl, incóra na vòlta, la gh'à d'inchinàr-as, lasànd al tìtul a la Karolína Plíšková par 6-1 5-7 3-6. In Avrìl la śōga a Charleston e chè la sćiànca 6-2 6-0 la Sloane Stephens a 'l secónd tùran ma pò la céd a cl'atra americàna, la Madison Keys, par 6-7 4-6. La sa spòsta in Germâgna, sèmpar piò daspatnàda e cun i cavìi mèś vióla e méś griś tgnû sù cun un gróp e na fasa, par śugàr al qualificasiòṅ ad Stucàrda e la i pasa cun un pôc ad fadìga. A 'l prim tùran l'asfàlta la Yanina Wickmayer e pò la dà la paga anc a la nùmar siē dal mónd Sara Errani tulénd-la a palàdi par tut 'l incóntar e mandànd-la a cà 6-0 4-6 6-1[3]. In di quàrt la fà fóra anc la padróna ad cà, la Sabine Lisicki, par 6-4 6-2 ma pò la pèrd in semifinàl da la Na Li par 4-6 3-6. La pasa 'l qualificasiòṅ anc a Madrid (baténd facilmènt prima l'Andrea Petković e pò la Madison Keys) ma pò la vèṅ batùda a 'l prim tùran da l'Ana Ivanović 6-7 6-3 6-2. A la fiṅ 'd Maǵ la tōś part a 'l Roland Garros e dòp avér batû la Lourdes Domínguez Lino 6-4 6-1, la manda a cà la Na Li 5-7 6-3 6-2. La riva in di utàṿ baténd 4-6 6-1 6-3 l'argentìna Paula Ormaechea ma lè la patìs un 5-7 4-6 da la Marija Kirilenko dòp ch'l'éra stada avànti 3-0 in dal prim sét. In sal 5-4 par lē l'è stada custréta a ciamàr al dutōr parchè la n éra minga tant in bóla. P'r al turnèo ad Wimbledon la ś mét 'd acòrd cun qvéi ad Google par mét'r-as i sò uciài da sōl ciamâ Google Glass ch'i parmétan ad tiràr śò qvél che òṅ al véd[4]. Par l'ucaśiòṅ l'americàna la s tinś i cavìi ad śal e ad vérd ma chi culōr lè i n gh pòrtan minga tant furtùna, difàti la pèrd subìt da l'Angelique Kerber par 3-6 4-6. La Mattek-Sands la tórna a śugàr un méś dòp in dal turnèo ad Carlsbad e la 'l fà baténd 2-6 6-1 6-2 la Mónica Puig. In dal secónd tùran la cata la pugléśa Roberta Vinci ch'la la mét in riga par 6-4 6-2 sénsa mai pèrd'r al servìsi sèg e lasànd-ag sōl na bucìna break in tuta la partìda. In Agóst la s imprufìta dla scanśladùra dla Laura Robson da 'l turnèo ad Turònt par śugàr a 'l sò pòst, da pardénta furtunàda, cóntar la Yanina Wickmayer. Cun la bélga la s pòrta avànti par 4-6 6-2 3-1 prima ad cédar sèg 4-6 a 'l tèrs sét. La stmana dòp la Mattek-Sands la tōś part a 'l turnèo ad Cincinnati, cun na carta salvàdga in bisàca. A 'l prim tùran la pésc' incóra la Roberta Vinci e la gh dà batàja par dū óri e vint prima ad cédar listés cun al puntéǵ ad 4-6 7-5 3-6.

In dal 2014 la pasa 'l qualificasiòṅ a Sydney, pò la bat l'Eugenie Bouchard par 6-4 6-3 e l'Agnieszka Radwańska, nùmar sinc dal mónd, par 7-5 6-2 ma pò la gh'à da bandunàr in di quàrt cun la Madison Keys quànd la vinsìva 3-2 in dal prim sét. In Favràr a Doha la dà incóra la paga a la Bouchard par 7-5 6-1 ma pò la pèrd cun la Monica Niculescu par 1-6 6-3 3-6. La śōga pò a Indian Wells e a Miami ma la n stà minga bèṅ e la và fóra subìt cun la Caroline Garcia e cun l'Elina Svitolina, dònca la decìd ad far-'s uperàr a i galòṅ[5]. L'americàna la tórna a śugàr sōl in setémbar ma in cal méntar l'è crudàda śò in clasìfica pardénd da piò ad sènt-sinquànta pòst. La finìs 'l an a da nùmar 175 dal mónd, un pôc méj dal 213 'd al turnèo ad Pechîṅ in dua l'iva pardû a 'l prim tùran da la Mona Barthel par 6-4 1-6 4-6.

In dal 2015 la riva a 'l tèrs tùran di Australian Open baténd la Kristina Mladenovic par 7-6 7-6 ma pò l'incróśa la nùmar tri dal mónd, la Simona Halep, e la gh pèrd par 4-6 5-7. A Monterrey la céd subìt a la carta salvàdga Francesca Schiavone par 6-3 6-7 4-6 e la fà cumpàgn anc in di turnèo 'd cà 'd Indian Wells e ad Charleston in dua la pèrd, sèmp'r in tri sét, da gl'americàni ad culōr Taylor Townsend e Sloane Stephens. A Stucàrda la s qualìfica baténd l'Alberta Brianti ma la n pasa gnanc chè al prim tùran parchè la gh'à da lasàr strada a l'Ekaterina Makarova. La Mattek-Sands la n è bòna 'd vìnsar gnanc 'n incóntar in sla tèra batùda parchè la fà 'l valìś subìt anc a Madrid (6-3 1-6 4-6 da la Sloane Stephens), a Nurimbèrga (6-4 3-6 2-6 in dal qualificasiòṅ da l'Arantxa Rus) e a 'l Roland Garros (4-6 6-7 da la Irina-Camelia Begu). La tórna a śugàr un méś dòp a Wimbledon in dua l'è custréta a pasàr p'r al qualificasiòṅ. La riva a 'l tèrs tùran baténd l'Alison Van Uytvanck par 6-3 6-2 e l'Ana Ivanović par 6-3 6-4 ma pò la céd a la śvisra Belinda Bencic par 5-7 5-7.

Culegamènt estéran

Nòti