Klára Koukalová

Da Wikipedia.
(Reindirizzamento da Klára Zakopalová)
C'l artìcul chè 'l è scrit in Miranduléś Emiliàn
La Klára Koukalová tòlta śò in dal 2012


La Klára Koukalová (Praga, 24 ad Favràr dal 1982) l'è na tenìsta céca prufesiunìsta da 'l 1999 ch'l'è stada bòna ad rivàr a èsar la nùmar vint dal mónd (al 15 'd Avrìl dal 2013). L'è élta 166 cm e la péśa 55 chilo. A gh piàś druàr l'arvèrs che lē la tira a dū maṅ. Da spuśàda (un quèl sucès in dal 2006) l'iva sarnî ad śugàr c'n al nóm ad sò marè, al śugadōr ad balòṅ dla nasiunàla céca Jan Zakopal, dvintànd acsè la Klára Zakopalová (a s lèś [ˈklaːra ˈzakopalovaː]), ma dòp ch'la s è divìśa l'è turnàda a druàr al nóm ch'la gh'iva da puta.

In dla sò caréra 'l à śugâ dódas finàli dla WTA ma la i à pardùdi tuti a part qvéla dal Śugn dal 2005 a 's-Hertogenbosch, vinsa cóntar la Lucie Šafářová par 3–6 6–2 6–2, e qvéla dal Setémbar dal 2005 a Pòrtrōś, vinsa cóntar la Katarina Srebotnik par 6–2 4–6 6–3. In chi atri ucaśiòṅ la gh'à abû da pigàr-as a dal śugadōri cuma la Flavia Pennetta (par dū vòlti), la Mary Pierce, la Caroline Wozniacki e la Na Li. In bisàca la gh'à anc sèt turnèo d'l ITF.

In di turnèo dal Gran Slam l'è rivàda par dū vòlti a 'l quàrt tùran: a Wimbledon in dal 2010 (baténd la Flavia Pennetta ma pardénd da la Kaia Kanepi par 2-6 4-6) e a 'l Roland Garros in dal 2012 (faghénd fóra via via la Lesja Curenko, la Marija Kirilenko e l'Anastasija Pavljučenkova prima ad cédar a cl'atra rusa, pò vinsidōra dal tìtul, la Marija Šarapova, par 4-6 7-6 2-6).

Culegamènt estéran