Jaroslava Švedova

Da Wikipedia.

C'l artìcul chè 'l è scrit in Miranduléś Emiliàn



La Jaroslava Vjačeslavovna Švedova, (Mósca, 12 ad Setémbar dal 1987, in rus Яросла́ва Вячесла́вовна Шве́дова) l'è na tenìsta rusa dvintàda pò kaśakistàna in dal 2008 ch'l'è stada la nùmar vint-sinc dal mónd (al 29 'd Utóbar dal 2012). L'è élta 180 cm par 68 chilo e l'è prufesiunìsta da 'l 2005. La dróa al bras dèstar e la tira 'l arvèrs a dū maṅ. A gh piàś far-as ciamàr Slava.

Da 'l 2012 l'è stada custréta da i dutōr a purtàr di uciài par via 'd un tic narvōś ch'la gh'à in 'n òć.

In dla sò caréra l'à vins in singulàr un tìtul WTA (in Ìndia) e tri ad qvéi ITF e sèt in dópi, in dua l'è stada la nùmar quàtar dal mónd. L'è dvintàda famóśa in tut al mónd al 30 ad Śugn dal 2012 quànd l'è stada bòna ad far al Golden set a 'l tèrs tùran ad Wimbledon cóntar la nùmar déś dal mónd Sara Errani ch'la vgniva da la finàl dal Roland Garros. La rumagnōla la n gh l'à cavàda a far sù gnanc un punt par tut al prim sét e l'à patî acsè un 6-0 in quìndas minùt. In dal tènis dal fémni a n éra mai sucès un quèl dal gènar.

Caréra

La kaśàka la vins al sò prim turnèo WTA al 18 ad Nuvémbar dal 2007 a Bangalore baténd in finàl l'itagliàna Mara Santangelo cun al puntéǵ ad 6-4 6-4. In dal 2010, insém a l'americàna Vania King, la vins dū tìtui dal Gran Slam, a Wimbledon e a Flashing Meadows.

In dal 2012 la śōga al qualificàsiòṅ a 'l Roland Garros da nùmar 147 dal mónd e la i pasa. Dòp avér batû par strada la Na Li, ch'l'iva vins al tìtul 'l an prima, la riva in di quàrt in dua la fà sudàr sèt camìśi a la Petra Kvitová prima ad cédar 6-3 2-6 4-6. A Wimbledon pò la fà piànśar la Sara Errani a n lasànd-ag gnanc un punt in dal prim sèt par pò bat'r-la 6-0 6-4. In dal tùran dòp la pèrd p'r un pēl da la Serena Williams (pò vinsidōra dal tìtul) ch'la la spunta par 6-1 2-6 7-5.

Culegamènt estéran