Iced Earth

Da Wikipedia.
C'l artìcul chè 'l è scrit in Miranduléś Emiliàn
Al grup di Iced Earth tòlt śò in dal 2008


«
Another day, just like any other, out of the blue, it turned to horror, how could they? Why would they? The innocents suffered hell’s inferno, an senseless act that goes unforgotten, how could they? They will pay! When the Eagle Cries, blood will flow.»
(EN)(When The Eagle Cries, 2004)
«
'N àtar dè cuma tut chi àtar, tut 'd un trat 'l è dvintâ na scarésa, cuma aṅ-i psû? Parchè 'l aṅ-i fat? Di inusènt i aṅ patî 'l Inféran, 'n at inùtil ch'al n sarà briśa daśmindgâ, cuma aṅ-i psû? I la pagaràṅ! Quànd l'àquila la piànś, al sangṿ al śladinarà.»
(MUD)


Gl’Iced Earth (Tèra giasàda) i èṅ un grup heavy metal americàṅ nâ a Tampa in dal 1985 p'r òpra dal chitarìsta Jon Schaffer e dal baterìsta Greg Seymour. A 'l inìsi i ìvan sarnî par lōr al nóm ad Purgatory ma pò i 'l aṅ cambiâ in dal 1988.

Biugrafìa

Schaffer, fundadōr dal grup

Mis sóta cuntràt da la Century Media, al grup ad Jon Schaffer al fà gnir fóra prima Iced Earth (cun Gene Adams a la vóś) in dal 1990 e pò Night of the Stormrider in dal 1991 cun un cantànt nóṿ ad paca, John Greely. Chi lò però al vèṅ mandâ via dòp un tour cun i Blind Guardian parchè 'l è rasìsta. A 'l sò pòst a vèṅ tòlt al rós ad cavìi Matthew Barlow ch'al taca a dar al sò cuntribùt cun al tèrs lavōr da studi dal grup, Burnt Offerings dal 1995, ch'al gh'à anc dèntar na canta (Dante's Inferno) ch'la tōś ispirasiòṅ da la Divina Cumèdia ad Dante Alighieri.

Barlow durànt un spetàcul in Śvèsia

In dal 1996 l'è la vòlta dal concept album The Dark Saga ch'al dascór dal persunàǵ di fumét Spawn e al grup al s fà cgnósar anc in Europa. Dòp soquànt cambi ad furmasiòṅ, in dal 1999 gl’Iced Earth i faṅ catàr in di negòsi Something Wicked This Way Comes, un disc dimóndi più dûr dal precedènt e cun un stîl thrash metal. Durànt al dati gréchi dal Śnar dal 1999, a vèṅ rigistrâ un disc da 'l viṿ, Alive in Athens.

In dal 2001 al grup al decìd ad far vgnir fóra un disc ch'al dascurìs ad persunàǵ tirâ fóra da di film ad scarésa: a nas acsè Horror Show. L'edisiòṅ speciàla ad cal lavōr chè la gh'à dènt'r anc un pès di Iron Maiden, Transylvania. Al cover i cuntìnuan anc cun Tribute to the Gods dal 2002, un disc cun di braṅ di Kiss, Judas Priest, AC/DC, Iron Maiden, Blue Öyster Cult, Alice Cooper e Black Sabbath, ch'al séggna anc la fiṅ di rapòrt cun qvéi dla Century Media.

Dòp l'atintâ a 'l Tóri Śmèli d'l 11 Setémbar 2011, Barlow al decìd ad dar-'g un taj a la sò vita ad rock star par dar na maṅ in dal mónd ad tut i dè. Al dvénta acsè pulisiòt p'r al Georgetown Police Dept. dal Delaware. A 'l sò pòst a vèṅ tòlt Tim Owens ex cantànt di Judas Priest. A càmbia anc la cà discugràfica. Par la SPV GmbH al grup al dà vita in dal Śnar dal 2004 a The Glorious Burden ch'al dascór ad soquànti guèri. Tri an dòp, sèmpar cun "The Ripper" a la vóś, al grup al pùblica Framing Armageddon (Something Wicked Part I). A la fiṅ d'l an Barlow al tórna in si sò pas a al grup al al tōś incóra in di sò rang. Matt al gh astà però sōl in fiṅ a 'l 2011 quànd 'l è custrét a lasàr par di mutìṿ ad famìja, cantànd acsè in The Crucible of Man (Something Wicked Part II) dal 2008 e pò basta.

Par Dystopia dal 2011 gl’Iced Earth i tōśan Stu Block.

Furmasiòṅ

Al grup tòlt śò durànt un cuncèrt dal 2012

Quéla 'd adès

  • Stu Block vóś (2011-incō)
  • Jon Schaffer chitàra e vóś (1984-incō)
  • Troy Seele chitàra (2007-incō)
  • Luke Appleton bas (2012-incō)
  • Brent Smedley baterìa (1996-1999, 2006-incō)

Soquànt di ex-cumpunènt

  • Matthew Barlow vóś (1993-2003, 2007-2011)
  • Tim Owens vóś (2003-2007)
  • Randall Shawver chitàra (1988-1998)
  • Dave Abell bas (1987-1996)
  • James MacDonough bas (1996-2004)

Discugrafìa

Tim Owens, vóś ch'la daśvèṅ da i Judas Priest

Àlbum in studi

  • 1990 - Iced Earth
  • 1992 - Night of the Stormrider
  • 1995 - Burnt Offerings
  • 1996 - The Dark Saga
  • 1998 - Something Wicked This Way Comes
  • 2001 - Horror Show
  • 2002 - Tribute to The Gods
  • 2004 - The Glorious Burden
  • 2007 - Framing Armageddon (Something Wicked Part I)
  • 2008 - The Crucible of Man (Something Wicked Part II)
  • 2011 - Dystopia

Àlbum da 'l viṿ

  • 1999 - Alive In Athens
  • 2011 - Festivals Of The Wicked

Racòlti

  • 1997 - Days of Purgatory
  • 2002 - Dark Genesis (box set)
  • 2004 - The Blessed and the Damned

EP

  • 1999 - The Melancholy
  • 2003 - The Reckoning
  • 2007 - Overture of the Wicked
  • 2008 - I Walk Among You

Culegamènt estéran