Kiss

Da Wikipedia.
Vai a: navigazione, Zerca
C'l artìcul chè 'l è scrit in Miranduléś Emiliàn


«
Tonight I wanna give it all to you, in the darkness, there's so much I wanna do and tonight I wanna lay it at your feet 'cause girl, I was made for you and girl, you were made for me. I was made for lovin' you baby.»
(EN)(I was made for lovin' you, 1979)
«
Stasìra a t vój dar-t-al tut, in dl'uscurità, a gh'è un muć ad ròbi ch'a voj far e stasìra a voj métar-t-al a i tò pée parchè ragasóla, a sòṅ stâ fat par tè e tè ragasóla at sée stada fata par mè. A sòṅ stâ fat par tè piculìna.»
(MUD)


I Kiss (al Baś) i èṅ un grup rock americàṅ nâ a New York in dal 1973 par mèrit ad Gene Simmons e Paul Stanley. I aṅ publicâ 'l ùltim disc in studi, Sonic Boom, al 2 'd Utóbar dal 2009, dópa und'ś an ad distansa dal precedènt disc 'd inèdit, Psycho Circus. I aṅ muciâ sù 24 disc 'd òr, 10 disc ad plàtin e 2 multiplàtin. In tut i aṅ vindû 110 migliòṅ ad còpi 'd album in tut al mónd.

I Kiss in cuncèrt in Spaggna in dal 2010

Biugrafìa

Al lógo di Kiss

Gl'Inisi (1972-1973)

I Kiss i nàsan dal séndri di Wicked Lester, un grup fundâ da Gene Simmons (basista) e Paul Stanley (chitarìsta rìtmic) a New York. In dal 1972 Simmons e Stanley i decìdan ad fundàr un grup nóṿ ad paca. Pascànd un baterìsta, Simmons al lèś n'insersiòṅ ad Peter Criscuola in sla rivìsta muśicàla Rolling Stone e 'l al ciàma.

Dòp n'audisiòṅ, Peter Criss (quést chè 'l è al nóm nóṿ ch'al s è dâ) al s unìs a i dū, al càmbia al sò stîl (da jazz a rock dur) e al decìd ad preśentàr-as in pùblic a la sò manéra ad cun di truc e di custùm adòs. L'idéa ad Paul e Gene l'éra quéla ad cupiàr i Beatles, in atri paròli i vlìvan far un grup cun quàtar frontman bòṅ ad scrìvar e cantàr, cumpàgn a 'l quartét ad Liverpool.

'L è pròpria acsè: i Kiss i èṅ òṅ di pòc grup in dua tut i cumpunènt i s pōl cgnósar facilmènt e tut lì lōr i gh'àṅ un séguit anc fóra dla banda. Naturalmènt 'l avér mis sù al truc 'l à dimóndi jutâ, dand-ag lùstar e n'òra ad mistér fóra dal cumùṅ in chi tèmp là.

In dal Śnar dal 1973 al grup (ch'a s ciamàva incóra Wicked Lester) al tóś Ace Frehley cuma chitarìsta sulìsta a 'l pòst ad Bob Kulick ch'l éra drē a ciapàr-al lò. Frehley al s éra preśentâ a 'l pruvèṅ cun na scarpa arànsa e una rósa.

Bill Aucoin, Peter Criss, Gene Simmons, Paul Stanley, Ace Frehley, Joyce, Neil Bogart

Dòp soquànti stmani, Stanley al buta lè l'idéa ad cambiàr al nóm dal grup in Kiss e al ròbi i vaṅ pròpria acsè. Al logo invéci 'l è na creasiòṅ ad Frehley. Ma la manéra cuma 'l éra scrit 'l è sèmpar stâ ugèt ad discusiòṅ parchè al dū "S" i pàran arcurdàr, se misi davśèṅ, i "SS" naśìsti. 'L è par cal mutìṿ lè che in Germâgna al logo 'l è un pòc difarent. Anc al nóm al par 'l acrònim dla fraś "Knights In Satan's Service", ch'a vōl dir "cavalēr a 'l servìsi 'd Sàtana". A s dà al caś invéci che Paul Stanley e Gene Simmons i sìan ad religiòṅ ebràica e donca cl'acùśa lè la pàr dal tut sénsa fundamènt.

In dal stés tèmp, tut i mémbar di Kiss i s èṅ sarnî dal mascri persunàli, di truc faciài, ch'i èṅ dvintâ di marc ad fàbrica: Gene Simmons al dèmon (The Demon), Paul Stanley al fiōl dal stéli (The Starchild, un persunàǵ amadōr da 'l aspèt andrògin e rockstar), Ace Frehley 'l óm dal spasi (The Spaceman) e Peter Criss al gat (The CatMan).

Schis dal custùm 'd Ace Frehley

I prim àlbum (1973-1975)

Dòpa soquant cuncèrt e demo-tape, i Kiss i fìrman par la Casablanca Records e i faṅ gnir fóra al lór prim àlbum, 'l umònim Kiss (Favràr 1974). Al disc 'l è dimondi dur par cal perìud lè ma, cum a sucèd generalmènt p'r i disc di eśurdiènt, al gh'à na tecnica d'afinàr anc s'al gh'à dimondi grinta e freschesa. In particulàr i spìcan al ligni ad bas ch'i s discàcan da la bateria e al stil 'd Ace.

Nunustànt la granda campaggna prumusiunàla, 'l àlbum al gh'à un sucès scars (75 mila còpi vindùdi a 'l incìrca), ma al gh'à dèntar di braṅ dimóndi famóś cuma Strutter, Cold Gin, Deuce e Black Diamond.

«
Get up and get your grandma outta here, pick up! Old Jim is workin' hard this year and baby do the things he says to do. Baby, if you're feeling good and baby if you're feeling nice, you know your man is workin' hard, he's worth a deuce! Honey don't put your man behind his years and baby stop cryin' all your tears. Baby do the things he says to do, do it!...»
(EN)(Deuce, 1974)
«
Lév-at e manda tò nóna via da 'd chè, Pulìs! Al vèć Jim 'l à lavurâ dur 'st an chè e ragasóla fa 'l ròbi ch'al t diś ad far. Baby s'at t sènt bèṅ e s'at t sènt a pòst, 't al sa ch'al tò óm al s fa 'l mas, al val quèl! Dulcésa a n far-ag minga peśar i sò an e mucla ad piànśar tut cal làgarmi. Ragasóla fa al ròbi ch'a t diś ad far, fa-li!...»
(MUD)

A Kiss a gh sucéd Hotter Than Hell (Più cald d'l inféraṅ, Utóbar 1974), caratériśâ da un sòṅ più scur dal precedènt e da braṅ quai Goin' Blind, la prima ballad dal grup, Got to Choose e la title-track. Cal braṅ chè al gh'à un tèst cun di riferimènt sesuài esplìcit.

Al scars sucès anc ad c'l àlbum chè a custrinś al grup a mulàr al tour e a registràr subìt 'n àtar àlbum, Dressed to Kill (Vistî par masàr, Mars 1975), cun un sòṅ méno dastòrt e cun un bòṅ sucès cumerciàl, cun i braṅ Rock Bottom, She, C'mon and Love Me e Rock and Roll All Nite (sunâ sémpar in tut i cuncèrt) a śvetàr.

In cal méntar la band la s crèa un séguit dimondi grand ad fans par mèś di cuncèrt spetaculàr, cun di nùmar stupefacènt (Gene Simmons spudafóg, sangṿ sintètic, chitari ch'i spàran dal fum e di raś e fóg artificiai...), un look particulàr e di custùm vistóś.

Al sucès (1975-1979)

Un śbrudlòṅ Gene Simmons tòlt śò a Stucólma in dal 2008

In dal Setémbar dal 1975 i Kiss i pùblican al lór prim disc dal viv Alive! ch'al dvénta disc ad plàtin in poc tèmp e al cuntèṅ al canti di prim tri àlbum: al fat ch'i Kiss i n s faṅ mai védar sensa truc a cuntribuìs a far crésar al mistér su 'd lór e la fama fr'i fans.

In dal Mars dal 1976, cun 'l apòǵ dal prudutór Bob Ezrin, i Kiss i faṅ gnir fóra Destroyer (Distrutór) ch'al gh'à di sòṅ più fòrt ch'in dal pasâ cunservand però anc di aspèt melòdic. Destroyer al gh purtò dimondi sucès ad venditi e 'l è definî cuma òṅ di mijór lavór dla lór discugrafìà, cun sìngui cuma Detroit Rock City, God of Thunder, Shout It Out Loud e la ballad Beth cantàda par Peter Criss cun la sò vóś róca, a surpréśa òṅ di più vindû in di Stat Unî.

«
You say you feel so empty that our house just ain't a home and I'm always somewhere else and you're always there alone. Just a few more hours and I'll be right home to you, I think I hear them callin', oh Beth what can I do, Beth what can I do. Beth, I know you're lonely and I hope you'll be alright, 'cause me and the boys will be playin' all night...»
(EN)(Beth, 1976)
«
At dì ad sintìr-at acsè vóda che la nostra cà la n t par gnanc piò un rifùǵ e ch'a sòṅ sémpar da di atri bandi e tè 't sée sémpar da par tè. Sól un póc ad tèmp e mè a sarò tèg a cà, a m par ad sintìr-i ciamàr, oh Beth cuśa gh'ò-j-a da far? Beth cuśa gh'ò-j-a da far? Beth al sò ch'at sée vilìda lè da par tè e a spèr ch'at starà bèṅ, parchè mè e i ragàs a sunarém tuta nòt...»
(MUD)
Paul Stanley al canta al Festival 'd Azkena in dal 2010

I du album seguènt, Rock and Roll Over (Oltre al Rock and Roll, Nuvémbar 1976) e Love Gun (Pistòla 'd amór, Śugn 1977), i fan sù un tal sucès ch'in di Stat Unî i dvéntan al grup più pupulàr e in Giapòṅ i véndan da piò di Beatles. Love gun, I stole your love, Making love, I want you, Calling dr. Love e Shock me (la prima cansòṅ cantada da Ace) i èṅ i sucès dal mumènt.

In dal 1977 i Kiss i pùblican al lōr secónd disc dal viṿ, Alive II (quàtar disc ad plàtin subìt, apéna gnû fóra) cun sinc braṅ in studi inèdit, ma 'l è Bob Kulick a sunàr la chitàra lè a 'l pòst ad Frehley. Chi lò al s cata sōl in dal braṅ in du al canta lò Rocket Ride e minga in di àtar (All American Man, Rockin' in the U.S.A., Larger Than Life, e Any Way You Want It).

«
I'm someone you can't fight, I'm plain in size, you can't believe your eyes, what you heard were not lies, I'm too much to hold, I can't be bought or sold, I'm far more than a man, I'm gonna make you understand, I'm larger than a life size man and you can't believe your eyes, what you heard weren't lies, my love is too much to hold, too much to hold.»
(EN)(Larger Than Life, 1977)
«
Ta n pó briśa lutàr mèg, 'l è ciàr ch'a sòṅ mis bèṅ, ta n pó minga crédar a i tò òć, quél ch't à scultâ al n éra mia na fōla, a sòṅ trop grôs da tgnir, a n pòs briśa èsar cumprâ o vindû, a sòṅ tut 'n àtar quèl da i óm nurmàl, a t al farò capìr, a gh 'l ò più grand dal nurmàl e tè ta n pó minga crédar a i tò òć, quél ch't à scultâ al n éra mia na bala, al mè amōr 'l è tròp grand da tgnir, tròp grand da tgnir.»
(MUD)
Gene, è-la la tò léngua più granda dal nurmàl?

'L an dòp 'l è la vòlta dla prima racòlta Double Platinum, cun na versiòṅ ad Strutter arfàta ad nóṿ par l'ucaśiòṅ.

Al sèns di afâr di Kiss 'l è sénsa lìmit: i métan in véndita di ugèt firmâ da lōr e cun al lōr logo ch'al dvénta un marc rigistrâ: fumét dla Marvel, truc, bàmbuli, putóć, mascri 'd Halloween, preservatìṿ, bari, pantòfuli, mudàndi e anc la carta igènica (ciamàda Kiss my ass, Baś'm al cûl)!

In dal 1978 i Kiss i decìdan ad far gnir fóra quàt'r album sulìsta: méntar Paul Stanley e Ace Frehley i mantìnan al stil hard rock, Peter Criss al s buta in dal R&B (cun na sèrie infinìda ad balàdi) e Gene Simmons al fa un mesculòṅ, basta dir ch'al sò disc al finìs cun la cover When You Wish Upon a Star dal film Pnòć! Dal Dèmon, i fan i s aspetàvan un àlbum dimondi più dur in ligna cun al persunàǵ. I lavór sulìsta i èṅ però di mèś flop: quél ch'a vénd da piò 'l è quél 'd Ace ch'a cuntèṅ New York Groove e la dura Ozone.

A la fiṅ d'l an i Kiss i rècitan in un filmàs dla NBC Kiss Meets the Phantom of the Park, tut da daśmingàr.

In dal Maǵ dal 1979 i Kiss i culàburan cun Desmond Child e Vini Poncia e i publìcan Dynasty (Dinastìa ma a fa gnir in a mènt Die nasty!, Mór bruta ghigna!) tucànd un sucès mundiàl mai vist, anc in Itaglia, par mèś ad canti cuma I Was Made For Lovin' You e Sure Know Something. 'L àlbum al cuntèṅ però dal sunurità ch'i raśéntan la muśica disco (in chi tèmp lè dimóndi in vóga). Difati I Was Made For Lovin' You l'è stada sunàda un muć ad vòlti in di discutéchi.

Al grup al pèrd na part di vèć sustenidór ch'i n supòrtan minga al cambiamènt ma, in generàl, Dynasty 'l è stâ un sucès minga dal tut prevedìbil. Ace Frehley al n pèrd minga la sò véna rock e al fa na versiòṅ da lcar-'s i bafi ad 2.000 man na cover di Rolling Stones e al sèra al disc cun la cativa Save your love. Dal cant suo Peter Criss 'l è tròp imbariàg e drugâ par sunàr in dal disc e al sò cuntribùt al s lìmita a la sò cansòṅ Dirty Livin': in di àtar òt braṅ a gh'è Anton Fig da drée a la baterìa.

La criśi (1979-1982)

Peter Criss sénsa truc in dal 1995

Vist al sucès ad Dynasty, i Kiss i cunférman Poncia a la prudusiòṅ e i tàcan a lauràr in s'l àlbum nóṿ, Unmasked (Śmascherâ). A vèṅ fóra na vóś ch'la diś ch'i Kiss i s tireràn via al truc. La curiuśità la crés ma a n è minga véra: in dla cupertìna dal disc i Kiss i s tìran via dabòṅ la mascra ma sóta i grugn i èṅ cumpàgn a prima!

Dal punt ad vista artìstic, 'l àlbum (grû fóra in dal Maǵ dal 1980) 'l è un mèś fiasc: al sòna cuma Dynasty ma Shandi 'l è un sìngul ch'al n vénd briśa. In dal sò video e in di crèdit dal disc a par che Peter Criss, stabilmènt drugâ pódag, a gh sia incóra ma a sunàr la baterìa 'l è Anton Fig par la secónda vólta: al Gat 'l è stâ butâ fóra!

Quèl ad bòṅ a s pól incóra catàr: Naked City o Talk to me ad Simmons e Frehley p'r eśémpi, ma Stanley 'l è tròp A.O.R. cun Tomorrow, Is that You? e What Makes The World Go Around che, anc s'i èṅ cunfesiunàdi bèṅ, i èṅ trop distandi dal stil di Kiss par scaldàr i cór di fan.

«
Cat's droolin' on the bar stool, shake your hips and crack your whips, cheap seventeen and trashed out, you went too far, been a bitch you are. Your reputation's in the bathroom, it's on the wall and down the hall. I hear you're cheatin' with my teacher, after school tell me what you do when you know, you always get the boys you like, play nice, then stick them with your knife, take off your insecure disguise. Is that you, crawlin' up my stairs, is that you (Is that you, crawlin' up my stairs) Is that you, lookin' half way dead...»
(EN)(Is that you?, 1980)
«
La gata la sbròdla tuta in sal śgabèl dal bar, at móṿ i fianc e at dróv al tò scùrii, darsèt an malfamada e ruinada, 't sée 'ndada fóra strada, rója cuma sée't. La tò reputasiòṅ l'è in dal cès, scrita in si mur e, in fónd a 'l àndit, a-j-ò sintî ch'at t sée fata al mè prufesór, dòp la scóla dì-m cuśa fà't quand at sà, t at fà sèmpar i ragàs ch'at piaś a tè, at fà la dólsa e pò 't i curtèi, tira-t via cal travestimènt insicùr. Sée't tè (ch'at sée drée a salìr sù par li scali?), sée't tè ch'at pàr mèśa mòrta?...»
(MUD)
Ace Frehley durant un tour sulìsta

I Kiss i sèraṅ cla pàgina lè catand al rimpiàs ad Criss: a s tràta 'd Eric Carr, un baterista cun di urìgini itagliàni che, dòp l'audisìòṅ, al dmanda 'n autógraf a Gene e Paul. Eric al sarnìs al persunàǵ dla vólp.

In dal 1981 i Kiss i publìcan Music from "The Elder", un concept-album prudót par Bob Ezrin e ch'a véd la culaburasiòṅ ad Lou Reed. Al disc, ch'a gh'iva 'd èsar la culóna sunóra 'd un film mai prudót, 'l è 'n àlbum sperimentàl, dimóndi distànt da i lavór precedènt di Kiss (in di strumènt muśicai a s cata di sintetiśadór, di còraṅ mediuevai e di arc). Tant impégn par gnint: "The Elder" 'l è al disc ch'a vindû da meno ad tut. Da 'rcurdàr A World Without Heroes, The oath, Only you (cantada anc da Doro Pesch in d'l àlbum umònim prudót par Gene) e I candata da par lór da Gene e Paul al Festival ad Sanremo dal 1982 diretamènt da New York.

In dal Śugn dal 1982 Ace Frehley al vèṅ mandâ via di Kiss e rimpiasâ inisialmènt da Bob Kulick (incóra lò!) e definitivamènt da Vinnie Vincent in Dicémbar. Cal funàmbul chè 'l éra na primadóna in tut i sèns ma l'éra anc un brav cumpuśidór e artista.

Vincent al cuntribuì dimóndi a la realiśasiòṅ d'l àlbum sucesìv: Creatures of the night (Criatùri dla nòt, Utóbar 1982) ma, par mutìṿ cumèrciai, in sla cupertìna a gh'éra incóra Frehley (anc in dal video ad I love it loud).

Al sòṅ ad cal 33 gir chè 'l è dimóndi dur, al cambiamènt rispèt a prima 'l è evidènt ma i riśultâ i èṅ cumpàgn: póchi vénditi e 'l è un pcâ. I love it loud, War machine, Danger, I still love you e la title-track i èṅ di braṅ frésc e piṅ 'd energìa, i meritàvan da piò. Durant la prumusiòṅ dal disc, i Kiss i vénan anc in Itàglia a sunàr a Discoring.

Durant i cuncèrt, Vinnie al tóś la mascra 'd un cumbatènt egisiàṅ (The Warrior).

P'r al marcâ Giuapunéś e Europeo a vèṅ fora, sémpar in dal 1982, la racòlta Killers (Asasèṅ) cun quàtar braṅ inèdit: I'm a legend tonight, Down on your knees, Nowhere to run e Partners in crime tut cantâ da Paul Stanley.

Al perìud sénsa mascri (1983-1994)

Gene Simmons al fa al nùmar dal magnafōg

In dal Setémbar dal 1983 a sucèd 'l impensàbil: i Kiss i decìdan ad tirar-as via al truc durànt la prumusiòn dal nóṿ album Lick it up (Léc-al) a MTV. A s tràta 'd un àlbum granìtic, suspéś fra 'l hard rock e 'l pop metal. Al vénditi i tàcan a crésar incóra: Lick it up, spìnt dal sìngul umònim, al dvénta disc ad plàtin. Vinnie Vincent al firma òt braṅ su déś ma a s trata 'd un fóg ad paja: Paul e Gene i 'l màndan via dòp la cuncluśiòṅ dal tour par cumpurtamènt imùral (acsè i dìśan lór ma a dar fastìdi 'l éra al fat che Vincent a vliva più spasi). Exciter, Not for the innocent, Young and wasted, Gimme more, All hell's breakin' loose e al lènt A million to one i cumplétan degnamènt al disc.

«
Baby, now that you've made up your mind, I'm gonna let you go, if that's what it takes to show love is blind. I gave you the best love you ever had, but it wasn't enough, so if you think you're so smart, go and play with your heart when you walk out the door, you'll realize what you never did before. A million to one - that's what it will be, a million to one - there's someone better than me, a million to one - no, you never will find, a million to one - another love like mine...»
(EN)(A million to one, 1983)
«
Baby, adès ch'at gh'à pinsâ bèṅ, a t lasarò andàr via, se quést 'l è quél ch'a sèruv par mustràr ch'l amór 'l è òrub. A t ò dâ 'l amór mijór ch'at gh'à mai abû ma a n éra minga abàsta, alóra s'at pèns 'd ésar acsè inteligénta, va e śóga cól tò cór quand 't va fóra da 'l us at capirà quél ch'at n à mai fat prima. Oṅ contra 'n migliòṅ - Quést 'l è quél ch'a sarà, òṅ contra 'n migliòṅ - A gh'è qualchidòṅ méj ad mè, òṅ contra 'n migliòṅ - No, ta n catarà mai, òṅ contra 'n migliòṅ - 'n àt'r amór cum al mio...»
(MUD)
Bruce Kulick durant un cuncèrt in Finlandia in dal 2002

Mark St. John al vèṅ tòlt par sustituìr Vinnie Vincent e al sòna dimóndi parti dal chitàri d'l àlbum sucesìv, Animalize (Setémbar 1984), al disc di Kiss più vindû di an Utànta. Al prìm sìngul estràt 'l è Heaven's On Fire 'l ùnic video dla band in du a gh'è anc Mark St. John. Paul Stanley al tira la caréta e al firma al canti mijóri (I've had enough insém a Desmond Child o Thrills in the night insém a Jean Beauvoir). Gene 'l è più defilâ anc parchè al s buta in dal cìnema e i sò cuntribùt, par sò stésa amisiòṅ, i n è minga a l'altésa. Purtròp, durànt al próvi d'l Animalize world tour, Mark St. John 'l è custrét a mulàr al grup parchè 'l impàra 'd avér cuntràt la Sindròm ad Reiter. Al sò pòst a vèṅ tòlt Bruce Kulick fradèl ad Bob. Nunustànt i cambiamènt òṅ a drée c'l àtar, i Kiss i tórnan al sucès, par lo méno in di Stat Unî anc se in manéra inferióra rispèt a i an Stanta.

Cun la nóva line-up, i Kiss i incìdan Asylum (1985) 'n àlbum misć cun di sòṅ putènt e di àtar melòdic e da "airplay". Tears are falling 'l è al sìngul sarnî par lanciàr 'l àlbum che però a n è gnint 'd ecesiunàl, anc s'al dvénta ad plàtin. I Kiss i van a drée a la moda dal tèmp e i spiànan di custùm culurâ, tut lustrèṅ e fard in facia, ròba da putàni: 'l éra méj al truc da na vòlta.

Eric a Milàṅ in dal 2008

'L an dòp a s fa viṿ Vinnie Vincent cun na cauśa da 6 migliòṅ ad dólar par di dirìt 'd autór minga arcgnusû a lò. La gh va mal: al pèrd la cauśa e al gh armét un sac ad bèsi.

In dal 1987 a vèṅ publicâ al cumerciàl Crazy nights (Nòti mati) cun al sìngul Crazy Crazy Nights ch'al schisa al quart pòst in dla clasìfica ingléśa. Cum al sòlit, i braṅ più bei i èṅ quéi ad Paul Stanley. Ad Simmons a s ricòrda sól Good girl gone bad.

'L an dòp i Kiss i fan gnir fóra na racòlta interesanta, Smashes, Thrashes & Hits cun gl'inèdit minga mal ad Paul Let's put the X in sex e You make me rock hard. Dal cant suo, Eric Carr al canta Beth al post ad Peter Criss.

I Kiss i vènan a catàr-as anc dal nòstri bandi a Mòdna in dal 1988 durant al Monsters of Rock insém a Judas Priest, Iron Maiden, Anthrax e Megadeth.

Gene Simmons cun al sò bas a manarèṅ

'L ùlt'm àlbum di an Utànta 'l è Hot in the shade (Cald a l'òra, 1989), quìndas braṅ rock e piṅ 'd energìa. Eric Carr al canta la sò cansòṅ Little Caesar, Gene Simmons al tórna a i sò livèi cun Betrayed, Somewhere between Heaven and Hell e Boomerang ma i sìngui i èṅ incóra ad Paul Stanley: Hide your heart, Rise to it e Forever (scrita cun Michael Bolton) ch'la tóca l'utàva puśisiòṅ in clasìfica, ròba ch'a n sa vdiva minga da 'l an 1979. In dal video Rise to it a s véd par pòc tèmp Paul e Gene incóra mascrâ, ma 'l è un fals indìsi: al truc al gh'à 'd aspetàr di at'r an par turnàr a pituràr i grugn dal Baś.

P'r al prim àlbum di an Nuvanta i Kiss i decìdan ad tór Bob Ezrin cuma prudutór ma i lavór dal disc i subìsan na batùda 'd arèst quand Eric al capìs 'd avér un càncar al cór e in di palmòṅ. Dopa n'uperasiòṅ e un cicclo ad chemio, a du méś da la guarigiòṅ, in Setémbar al patìs du emuragìi serebràli. Carr al mór al 24 ad Nuvémbar dal 1991 lasànd un vód inculmàbil fra i fans e in dal grup. Pasâ cal brut mumènt, cun un disc da finìr, i Kiss i tóśan al sò pòst Eric Singer, un baterìsta ch'l à laurâ anc cun i Black Sabbath, Lita Ford e Alice Cooper. 'L è cun cla line-up chè ch'i Kiss i pùblican Revenge (Vendéta, 1992) un bel disc heavy metal cun al sìngul dimóndi catìv Unholy scrit da Simmons insém a Vinnie Vincent ch'al firma anc I just wanna e Heart of chrome cun Paul Stanley. In dal disc a gh'è anc la ballad God gave rock 'n' roll to you ch'l'è tuta un manifèst.

«
I am the incubus, I lay the egg in you, the worm that burrows through your brain but you are the beast that calls me by my name. You send your children to war to serve bastards and whores, so now you know, you created me on the day that you were born. Unholy I was created by man, yeah I'm the Lord of the flies, you know I'm...»
(EN)(Unholy, 1992)
«
A sòṅ 'l ìncub, A v infìls 'l óṿ dèntar, al vèrum ch'a v scava in dal sarvèl ma tè at sée la bestiàsa ch'la m ciama par nóm. At mand i tò fiói a la guèra par sarvìr di bastàrd e dal putàni, acsè adès at sa, ta m à dat vita in dal dè ch'at sée nâ. Maladî a sòṅ stâ criâ da 'l óm, sè a sòṅ al Śgnór dal móschi, 't al sa ch'a 'l sòṅ...»
(MUD)

A 'l àlbum a s śònta subìt dòp al Revenge Tour e al sò registrasiòṅ i èṅ misi dèntar al live Alive III fat in dal 1993. Al disc al finìs cun l'eśecusiòṅ d'l in americàṅ Star spangled banner.

La riugnòṅ (1995-2002)

Paul Stanley durànt un cuncèrt in Bulgarìa, Maǵ 2008

In dal 1995 i Kiss i urganìśan al Worldwide Kiss Convention Tour, durànt al qual dal cover bands i s iśibìsan mèntar i s ténan dal móstri cun espuśisiòṅ ad śavai, ugèt e strumentasiòṅ dla band. In dal córs dla prima data dal tour (17 ad Śugn), la band la fa n'eśibisiòṅ dal viv insém a Peter Criss, ch'l i iva lasâ in dal 1980.

Al 9 'd Agóst dal stés an, i Kiss i tènan al lór Unplugged, un spetàcul acùstic urganiśâ par la televiśiòṅ muśicàla MTV. In dal córs dal show, i s śóntan via via i već cumpunènt urigìnai dal grup, Peter e Ace, par cantàr 2,000 man e Beth. A vèṅ fat anc un cd dimóndi interesànt parchè a gh s pól catàr dèntar dal canti raramènt fati dal viṿ cuma Comin' home, Sure know something, A world without heroes e See you tonight.

Gene Simmons al tira fóra la sò linguàsa a Boston in dal 2004

Cl'aparisiòṅ chè la fa pinsàr ch'l è rivâ al tèmp dla riugnòṅ di Kiss e difati al 28 ad Favràr dal 1996 i quàtar Kiss i s preśéntan insém a la trentuteśma edisiòṅ di Grammy Awards cun tant ad truc e vistî da na vòlta e quàtar méś dòp i èṅ bèla sul palc p'r al prim cuncèrt dal Alive/Worldwide Tour. I spetacui i èṅ fenuménai, cun tut i nùmar di vèć cuncèrt, e i èṅ sold-out dapartùt. La pupularità dla band la tórna incóra a 'l stéli, i vìnan vindû migliòṅ ad gadget e i Kiss i tórnan in sìma al cupèrtini dal rivisti.

In cal mèntar a vèṅ publicâ uficialmènt un àlbum fat du an prima cun la vècia furmasiòṅ (Singer e Kulick) ma suspés mumentaneamènt a cauśa dla riugnòṅ. Al mutìv ad cla deciśiòṅ chè 'l è p'r al fat ch'in cal mèntar al mastér dal disc 'l éra stâ piratâ e dònchina 'l éra finî ad dumìni pùblic. Al disc al s ciàma Carnival of Souls: The Final Sessions (Carnevàl da gl'anmi: la sesiòṅ finala, 1997) e al gh'à un sòṅ difarènt dal sòlit, dark e grunge, al fa gnir in a mènt i lavór di Alice in Chains. Al tentatìṿ 'd inuvasiòṅ al finìs in un flòp e 'l è un pcâ. Da segnalàr la prima (e ultma) cansòṅ cantàda da Kulick: I walk alone.

Na stòria difarenta al gh'à al disc sucesìv: Psycho circus (Circ psìchic, 1998), prim e ùnic àlbum in stùdi registrâ cun la line-up uriginàla dòp al 1977. A gh'è da dir però che Psycho Circus 'l è stâ fat cun di muśicista ad sesiòṅ minga creditâ e cun na furmasiòṅ briśa al cumplét, propria cum è sucès in di prim an Utanta. Peter Criss al sòna sól in un braṅ e Ace Frehley in du (in chi àtri i sònan Bruce Kulick e Tommy Thayer ch'al dvéntarà al chitarìsta sulìsta di Kiss soquànt an dòp). Paul al canta la title track (e prim sìngul) e al dà I finally found my way a Peter da cantàr ma a s fa nutàr Gene cun al sui Within, We are one e You wanted the best. Ace invéci al canta Into the void e In Your Face ma sól p'r al marcâ giaupunéś.

«
I, I've been waiting here to be your guide, so come, reveal the secrets that you keep inside. Step up! No one leaves 'til the night is done, the amplifier starts to hum, the carinval has just begun. You're in the psy, you're in the psycho circus....»
(EN)(Psycho circus, 1998)
«
A-j-ò spetâ chè p'r èsar la tò guida, alóra vèṅ, cònta i segrét ch'at gh'à dèntar. Fa in présia! Ninsòṅ a va fóra prima ch'la nòt la finisa, l' amplificadór al taca a cantàr, al carnevàl 'l è péna tacâ. At sée in dal psic, at sée in dal circ psìchic,...»
(MUD)

Al 31 'd Utóbar dal 1998 i Kiss i partìsan cun al Psycho Circus Tour dal Dodger Stadium ad Los Angeles cun di efèt viśiv in tri dimensiòṅ. Anc cal tour chè 'l è un sucès.

In dal 1999 i Kiss i vénan mis in dla Hollywood Walk of Fame (in dla categurìa Record Industry) e i fan na cumparsàda in dal film Detroit Rock City ad Adam Rifkin. Par l'ucaśiòṅ i cantan Nothing Can Keep Me From You.

In dal Favràr dal 2000 i Kiss i diśan ch'i arévan tacâ un tour intitulâ Kiss Farewell Tour, 'l ùltim cun la furmasiòṅ uriginàla. I cuncèrt i cuntìnuan anc in dal 2001 cun al dati śuntàdi in Austraglia e Giapòṅ. Pòc prima d'l inisi dla tapa giapunéśa, Peter Criss al mòla tut parchè a n è minga sudisfàt dal sò cuntràt. I Kiss i vànan avanti ciamànd incóra Eric Singer che, par l'ucaśiòṅ, al s truca da Gat.

Al preśènt (2003-2012)

I Kiss in mèś a n'espluśiòṅ ad fōg artificiài

In dal Favràr dal 2003 i Kiss, cun l'apòǵ dl'urchèstra sinfònica ad Melbourne, i regìstran al lór quint àlbum live KISS Symphony: Alive IV, publicâ in istâ dal stés an. Durant al cuncèrt, al sòna uficialmènt par la prima vólta Tommy Thayer al pòst 'd Ace Frehley ch'l iva bandunâ al grup in di ultmi dati dal Farewell Tour.

I Kiss (cun Criss turnâ mumentaneamènt in dla band) i dan vita sucesivamènt al World Domination Tour, insém a gl'Aerosmith. Sémpar in dal 2003, dòpa na dmanda ad Johnny Ramone, i càntan la cansòṅ Do You Remember Rock 'n' Roll Radio? in dla compilation tribùt di Ramones We're a Happy Family.

In dal Mars dal 2004 Simmons e Stanley i n cunférman minga al cuntràt a Peter Criss favurénd al ritóran 'd Eric Singer ch'a s tinś i cavî ad négar e al s pitùra al grungn p'r impersunàr degnamènt la figùra dal Gat (Thayer al fa la stésa ròba cun Ace parchè i Kiss i aṅ cumprâ i dirìt dal mascri uriginàli). In dl'Istâ dal stés an, i Kiss i dàn vita al Rock the Nation Tour méntar du an dòp 'l è al tùran dal Rising Sun Tour.

Al nóṿ chitarìsta di Kiss Tommy Thayer in un cuncèrt a Dallas in dal 2009

Al 5 'd Avrìl dal 2007 a mór al vèć chitarìsta d'l àlbum Animalize Mark St. John par n'emuragìa serebràla.

Anc Paul Stanley al gh'à i sò prubléma: prima al galòṅ pò na tachicardìa ma al s riprénd sémpar bèṅ.

A par ch'i Kiss i sìan dvintâ na live band e basta (cun i cuncèrt Hit'n Run dal 2007 e Kiss Alive/35 World Tour dal 2008) ma, a surpréśa, in dal 2009 a vèṅ fóra 'n àlbum nóṿ 'd inèdit: Sonic boom (Stus sònic) cun al sìngul Modern day Delilah, un disc sicuramènt interesànt, dimóndi cumpàt, bèṅ sunâ e mai banàl. Eric Singer e Tommy Thayer i càntan (bèṅ) par la prima vólta di braṅ di Kiss, rispetivamènt All for the Glory e When Lightning Strikes.

«
I still remember when I saw your face across the room, told me to take you but the price of love would seal my doom. I know the way you made the others break but loving me would be your first mistake. Same old way, same old ways, modern day Delilah, each time you learn to give, queen to slave, modern day Delilah....»
(EN)(Modern day Delilah, 2009)
«
A m vèṅ in a mènt incóra quand a-j-ò vist la tò fàcia da cl'àtra banda dla stansa, la m à dit ad tór-at ma'l prèsi d'l amór 'l intunarév al mè destìṅ. A cgnós la manéra che 't à druâ par ruinàr chiàtar ma vlér-am bèṅ a prév èsar al tò prim sbàli. La stésa vècia manéra, al stési vèci manéri, un dè modèraṅ Delilah, tut al vòlti che 't impràr a dar, da regìna a sćiava, un dè modèraṅ Delilah...»
(MUD)

Al 18 ad Maǵ dal 2010 i Kiss i càntan a Milàn durànt al Sonic Boom over Europe: from the beginning to the boom.

Discugrafìa

I Kiss dal viṿ a Parìs durànt al Psycho Circus World Tour
Eric Singer mascrâ da gat al canta Beth in dal 2010
Paul Stanley sénsa mascra


Gene Simmons pîṅ 'd sangṿ
Ace Frehley in dal 1999
Un flìper tedésc di Kiss
la chitàra ad Paul

Àlbum

  • 1974 Kiss
  • 1974 Hotter Than Hell
  • 1975 Dressed To Kill
  • 1976 Destroyer
  • 1976 Rock And Roll Over
  • 1977 Love Gun
  • 1978 Paul Stanley
  • 1978 Gene Simmons
  • 1978 Ace Frehley
  • 1978 Peter Criss
  • 1979 Dynasty
  • 1980 Unmasked
  • 1981 Music From The Elder
  • 1982 Creatures Of The Night
  • 1983 Lick It Up
  • 1984 Animalize
  • 1985 Asylum
  • 1987 Crazy Nights
  • 1989 Hot In The Shade
  • 1992 Revenge
  • 1997 Carnival Of Souls
  • 1998 Psycho Circus
  • 2009 Sonic Boom

Disc dal viṿ

  • 1975 Alive!
  • 1977 Alive II
  • 1993 Alive III
  • 1996 Mtv Unplugged
  • 1996 You Wanted The Best, You Got The Best - (Racòlta dal viv)
  • 2003 Symphony: Alive IV

Racòlti

  • 1978 Double Platinum
  • 1982 Killers
  • 1988 Smashes, Thrashes & Hits
  • 1997 Greatest Kiss

Sìngui

  • 28.03.1974 "Nothin' to Lose"/"Love Theme From Kiss" → Kiss
  • 10.05.1974 "Kissin' Time"/"Nothin' to Lose" → Kiss
  • 10.08.1974 "Strutter"/"100,000 Years" → Kiss
  • 22.10.1974 "Let Me Go Rock N' Roll"/"Hotter Than Hell" → Hotter Than Hell
  • 02.04.1975 "Rock and Roll All Nite"/"Getaway" → Dressed to Kill
  • 10.07.1975 "C'Mon and Love Me"/"Getaway" → Dressed to Kill
  • 14.10.1975 "Rock and Roll All Nite (Live)" → Alive!
  • 01.03.1976 "Shout It Out Loud"/"Sweet Pain" → Destroyer
  • 30.04.1976 "Flaming Youth"/"God of Thunder" → Destroyer
  • 28.07.1976 "Detroit Rock City"/"Beth" → Destroyer
  • 01.11.1976 "Hard Luck Woman"/"Mr. Speed" → Rock and Roll Over
  • 13.02.1977 "Calling Dr. Love"/"Take Me" → Rock and Roll Over
  • 01.06.1977 "Christine Sixteen"/"Shock Me" → Love Gun
  • 31.07.1977 "Love Gun"/"Hooligan" → Love Gun
  • 14.10.1977 "Shout It Out Loud (Live)"/"Nothin' to Lose" (Live) → Alive II
  • 22.02.1978 "Rocket Ride"/"Tomorrow And Tonight" (Live) → Alive II
  • 02.04.1978 "Strutter '78"/"Shock Me" → Double Platinum
  • 1978 "Hold Me, Touch Me"/"Goodbye" → Paul Stanley
  • 1978 "New York Groove"/"Snowblind" → Ace Frehley
  • 1978 "Radioactive"/"See You In Your Dreams" → Gene Simmons
  • 1978 "Don't You Let me Down"/"Hooked On Rock 'N Roll" → Peter Criss
  • 20.05.1979 "I Was Made For Lovin' You"/"Hard Times" → Dynasty
  • 30.09.1979 "Sure Know Something"/"Dirty Livin'" → Dynasty
  • 01.06.1980 "Shandi"/"She's So European" → Unmasked
  • 01.11.1980 "Tomorrow"/"Naked City" → Unmasked
  • 22.11.1981 "A World Without Heroes"/"Dark Light" → Music from "The Elder"
  • 13.10.1982 "I Love It Loud"/"Danger" → Creatures of the Night
  • 18.09.1983 "Lick It Up"/"Dance All over Your Face" → Lick It Up
  • 06.02.1984 "All Hell's Breakin' Loose"/"Young and Wasted" → Lick It Up
  • 19.09.1984 "Heaven's On Fire"/"Lonely is the Hunter" → Animalize
  • 13.01.1985 "Thrills In the Night"/"Burn Bitch Burn" → Animalize
  • 16.09.1985 "Tears Are Falling"/"Any Way You Slice It" → Asylum
  • 03.01.1986 "Uh! All Night"/"Trial By Fire" → Asylum
  • 18.08.1987 "Crazy Crazy Nights"/"No, No, No" → Crazy Nights
  • 01.11.1987 "Reason to Live"/"Thief in the Night" → Crazy Nights
  • 27.02.1988 "Turn on the Night"/"Hell or High Water" → Crazy Nights
  • 11.10.1988 "Let's Put The X In Sex"/"Calling Dr. Love" → Smashes, Thrashes & Hits
  • 03.03.1989 "(You Make Me) Rock Hard"/"Strutter" → Smashes, Thrashes & Hits
  • 17.10.1989 "Hide Your Heart"/"Betrayed" → Hot in the Shade
  • 05.01.1990 "Forever"/"The Street Giveth & The Street Taketh Away" → Hot in the Shade
  • 01.04.1990 "Rise to It"/"Silver Spoon" → Hot in the Shade
  • 1992 "God Gave Rock 'N' Roll To You II" → Revenge
  • 1992 "Domino"/"Carr Jam 1981" → Revenge
  • 1992 "I Just Wanna" → Revenge
  • 1992 "Everytime I Look at You"/"Spit" → Revenge
  • 1993 "I Love It Loud (Live)" → Alive III
  • 1996 "Rock And Roll All Nite → KISS Unplugged
  • 1997 "Jungle" → Carnival of Souls: The Final Sessions
  • Nuvémbar 1998 "Psycho Circus" → Psycho Circus
  • 1998 "We Are One" → Psycho Circus
  • 1998 "I Finally Found My Way" → Psycho Circus
  • 1999 "You Wanted the Best" → Psycho Circus
  • 19.08.2009 "Modern Day Delilah" → Sonic Boom
  • 08.12.2009 "Say Yeah" → Sonic Boom
  • 08.06.2010 "Never Enough" → Sonic Boom

Videografìa

Culegamènt estéran


Estratto da "http://eml.wikipedia.org/w/index.php?title=Kiss&oldid=68756"