Lita Ford

Da Wikipedia.
Vai a: navigazione, Zerca
C'l artìcul chè 'l è scrit in Miranduléś Emiliàn


«
I get so scared inside and I don't really understand, is it love that's on my mind, or is it fantasy. Heaven is in the palm of my hand and it's waiting here for you, what am I supposed to do with a childhood tragedy. If I close my eyes forever will it all remain unchanged, if I close my eyes forever would it all remain the same?»
(EN)(Close my eyes forever, 1988)
«
A gh'ò acsè tanta paùra dèntar e a n gh la cav propria minga a capìr, è'l amór quél ch'a gh'ò in testa o è-la sól dla fantaśìa? Al Paradìś 'l è chè in dal palmùs dla maṅ e'l t aspèta, cuśa gh'arév-j-a da far-ag in na tragèdia da putèṅ? S'a sarìs i mè òć par sèmpar, rimarév-al tut cumpàgn?»
(MUD)


Lita Ford, in cumùṅ la s ciàma Carmelita Rossanna Ford, l'è na cantànta e chitarìsta heavy metal americàna cun di urìgini ingléśi e l'è nada a Streatham al 19 ad Setémbar dal 1958. L'à tacâ la sò caréra in dal grup dal Runaways ad Joan Jett ma pò l'à cuntinuâ da par lē, tucànd al pic cun al disc Lita e al sìngul Kiss me deadly. In dal córs dal tèmp la s'è anc misa insém a Nikki Sixx di Mötley Crüe, Tony Iommi di Black Sabbath, Joe Lynn Turner di Rainbow, Chris Holmes di W.A.S.P. e a Jim Gillette di Nitro e cun chi lò la gh'à du fiói. Cuma a pól dir al sò nóm, la gh'à di urìgini itagliàni. Sò màdar la s ciàma Isabella (Lisa) mèntar sò pàdar 'l éra un militàr ingléś.

Lita Ford

Biugrafìa

Gl'Inisi

Dòp ch'al Runaways i s ìran lasàdi in dal 1979, Lita la taca na caréra sulìsta firmànd par la Mercury Records e miténd insém al sò grup, al chitarìsta canadéś Neil Merryweather e al baterìsta Dusty Watson. Cun chi du lè la regìstra al sò prim disc in dal 1983 Out for blood (Fóra p'r al sangṿ), 'n àlbum péś ma pasâ sensa lasàr dal trasi parchè minga sustgnû a basta da la sò cà discugràfica.

«
You never won a battle so don't fight with me 'cause you ain't really nothing, tried to tell you that before so get your ammunition 'cause I'm ready for war, wasting my time, frying my mind and I am not, so what you take me for? I'm out for blood...»
(EN)(Out for blood, 1983)
«
Ta n à mai vins na batàja alóra minga cumbàt'r-um parchè at sē gnit dabòṅ, a-j-ò sercâ ad dirt-al prima acsè at psiv tōr al munisiòṅ parchè mè a sòṅ prónta par la guèra, butànd via al mè tèmp, friśénd la mè tèsta ma a n la sòṅ minga alóra par chi ta m à tòlt? A sòṅ fóra p'r al sangṿ...»
(MUD)

In séguit la tóś al basìsta Hugh McDonald e al baterìsta Randy Castillo e in dal 1984 la fà gnir fóra al secónd disc Dancin' on the edge (Balànd al lìmit). 'L àlbum al véd la partecipasiòṅ ad Jeff Lieb in dla scritùra di braṅ e 'l uś ad sintetiśadór al rénd al sòṅ più alśēr. I sìngui i èṅ Gotta let go, Dressed to kill e Fire in my heart.

Lita la gh'la cava a partìr par di cuncèrt in Europa a fiànc di Rainbow e di Black Sabbath ma, durànt al tour, Castillo al la mòla e al vèṅ rimpiasâ par Eric Singer (in séguit cun i Kiss).

«
I'm gettin' ready, nobody's gonna stop me, can't ya, feel the fire burnin', now's the time to start rockin', so if you want to be the main attraction, all you need's a little chain reaction, you and I can set the night on fire. Now you gotta let go, yeah you gotta let go, well you gotta let go if you really want to rock tonight...»
(EN)(Gotta let go, 1984)
«
A sòṅ prónta, ninsòṅ a m pól farmàr, e tè?, sènt al fóg ch'al bruśa, adès 'l è al mumènt ad dar inìsi al rock, alóra s'at vō èsar l'atrasiòṅ più granda, a gh vól na reasiòṅ a cadéna, insém a psém impisàr la nòt cun al fóg. Adès at gh'à da dar-at na mòsa, sè at gh'à da dar-at na mòsa, bòṅ at gh'à da dar-at na mòsa s'at vō dabòṅ al rock stasìra...»
(MUD)

Al sucès

Lita Ford dal viṿ

Al tèrs àlbum al s ciàma Lita e al véd la luś in dal 1988 par la RCA Records. Lita l'iva tòlt Sharon Osbourne mujér 'd Ozzy, cuma manager e l'iva dat a mènt a i sò cunsìli ad tōr di artista bòṅ par lauràr in dal disc, cuma Myron Grombacher, baterìsta ad Pat Benatar e Vinnie Vincent Invasion, David Ezrin al tastéri e Ozzy Osbourne stés. Al chitarìsta 'l éra Steve Fister, ch'in pasâ 'l iva tintâ, sensa sucès, ad sunàr pròpria cun al Madman. Anc a livèl ad scritùri, al disc al véd di pès gròs: Nikki Sixx di Motley Crue (un tèmp, al sò muróś) e Lemmy Kilmister di Motörhead.

Al disc 'l è più melòdic ad chi àtar e, anc par via ad sìngui ad sucès cuma Kiss me deadly (dimóndi traśmìs a la raddio), Back to the cave e Close my eyes forever (cantâ cun Ozzy), al vénd un muć. Par cumpletàr al tut, al disc al pōl cuntàr anc su la rabìda Can't catch me e la dura Blueberry. I crìtic muśicài i al cunsidéra òṅ di più bèi di an Utànta.

«
Had a few beers getting high, sitting watching the time go by uh-huh, it ain't no big thing, nothing to eat and no T.V., looking in the mirror don't get it for me, uh-huh, it ain't no big thing, but I know what I like, I know I like dancing with you and I know what you like, I know you like dancing with me oh yeah, kiss me once, kiss me twice, come on pretty baby kiss me deadly.»
(EN)(Kiss me deadly, 1988)
«
A gh'iva un para ad biri par tiràr-um sù, a sira sintàda a guardàr al tèmp ch'a pasàva, uh-huh, a n éra minga un gran lavór, gnint da magnàr e gnanc la televiśiòṅ, guardàr in dal spèć a n éra briśa na ròba par mè, uh-huh, a n éra minga un gran lavór, ma a sò quél ch'a m piàś, a m piàś balàr tèg, e a sò quél ch'at piaś a tè, at piàś balàr mèg, sè, baś-um na vòlta, baś-um du vòlti, dai mò bèl ragàs dà-m un baś a la mòrt.»
(MUD)

'L è acsè che Lita la vèṅ sarnìda p'r èsar 'd apòǵ a i cuncèrt di Poison in di Stat Unî e ad Bon Jovi in Europa in du 'l è anc stâ girâ al viddeo 'd un sò live al stadi ad Wembley in Inghiltéra in dal 1989.

I an Nuànta

Lita Ford dal viṿ al 19 ad Dicémbar dal 1988

Al 26 ad Śugn dal 1990, Lita Ford la spóśa Chris Holmes al chitarìsta di W.A.S.P. e sèmpar in c'l an lè la fà gnir fóra al sò quart disc Stiletto, 'n àlbum fat bèṅ ch'al gh'à dèntar i sìngui Hungry (dimóndi malisióśa) e Lisa (in unór ad sò màdar), la cover 'd Alice Cooper Only women bleed e di àtar braṅ sòlid cuma Stiletto, Dedication e Cherry red, quésta chè druàda anc in 'n epiśòdi ad la telenuéla Beautiful sensa che lē la saìs gnint.

«
My nylons are melting down my legs, your heart is pounding at my throat, I can't catch my breath, I lost it when your fingertips ran down my back and up my neck, your kiss makes me feel like this. I'm so hungry for your sex, I'm so hungry for your sex, I got an appetite for love tonight, I wanna taste your sweet thing, I wanna feel the sting of your sex, of your sex.»
(EN)(Hungry, 1990)
«
I mè calsét ad réda i èṅ drē a gnir śò dal gambi, al tò cór al bat fòrt in dla mè góla, a n pòs minga tgnir férum al mè respìr, a'l ò pardû quand i tò dî i m curivàn śò da la schina e lung al mè còl, al tò baś al m fà sintìr acsè. A gh'ò acsè fam ad cal tò sès, A gh'ò acsè fam ad cal tò sès, stasìra a gh'ò 'n apetìt 'd amór, a vój tastàr cla tò ròba acsè dólsa, a vój sintìr al bśi dal tò sès, dal tò sès.»
(MUD)

Purtròp al disc al n à minga abû di riscòntar bòṅ ad vénditi anc se pò Lita la s è tòlta la sudisfasiòṅ ad cumparìr in dal Circus Rock Hall of Fame, prima dóna a gudér ad cal tìtul lè.

In dal 1991, Lita la divòrsia e la taca a lauràr al disc nóṿ, Dangerous Curves (Curvi periculóśi), nóm tòlt in prèst da 'l tìtul dna canta ad Sammy Hagar di Van Halen in sò unór. Ma al pùblic in cal perìud lè al gh'à di àtar gust, al va adrē a i Nirvana e al grunge, e anc c'l àlbum chè (dedicâ a sò genitór mòrt e pîṅ ad còr in di riturnèi) al n vénd minga a basta e 'l è un pcâ parchè al gh'iva dèntar di braṅ minga mal cuma i sìngui Shot of poison, Playing with fire, Larger than life, la canta Bad love, ch'la dascurìva di prubléma cun sò marè, e al braṅ Little too early, scrit cun Joe Lynn Turner e Ritchie Blackmore.

«
I'm savin' all my passion for you, I got a heart break habit that I can't kick, only you can ease the pain, I'm a midnight animal trying to score, before I go insane give me one shot of poison, a little twist is all I need, one drop of your sweet poison, sets me free, one shot of poison, a little taste of paradise, one drop of your sweet poison satisfies. Give me one last kiss before I die.»
(EN)(Shot of poison, 1991)
«
A-j-ò mis da part tuta la mè pasiòṅ par tè, a gh'ò al visi ad sćiancàr i cór a n pòs far-ag gnint, sól tè at pō calmàr al dulór, a sòṅ 'n animàl ad meśanòt ch'al próa a marcàr al teritòri, prima ch'a dvénta séma dà-'m un cólp ad velèṅ, un tarmutèṅ 'l è quél ch'a m vōl, na gósa dal tò dóls velèṅ, la m rénd libra, un cólp ad velèṅ, na tastadìna ad Paradìś, na gósa dal tò dóls velèṅ la fà cuntènt. Dà-'m un ùltim baś prima ch'a móra.»
(MUD)

In dal 1994 Carmelita la cgnós Jim Gillette (ex cantànt di Nitro) in un club ad Dallas e la'l spósa dòp du stmani. Chi lò al fà pò i còr in dal disc nóṿ ad sò mujér, Black (Négar), 'n àlbum pîṅ ad sòṅ grunge e alternative rock, ch'al vèṅ fóra sóta n'etichéta tedésca, la ZYX Records.

In dal 1997 a nas sò fiól James Leonard Gillette e la regìstra du cover di Led Zeppelin, Whole lotta love e Rock & roll, par la compilation Stairway to Heaven. La sa stablìs in Florida e in dal 2001, la gh'à 'n àtar putèṅ.

I an Dumìla

La Lita Ford durànt al Gods of Metal dal 2009

In dal Maǵ dal 2000 Lita la fà gnir fóra al sò prim disc dal viṿ Greatest Hits Live ch'al ś vèra però cun 'n inèdit in studi, Nobody's Child. I àtar trédas braṅ i èṅ live e i èṅ stâ rigistrâ in dal sud dla Califòrgna, prubabilmènt durànt al tour dal disc Dangerous Curves.

In dal Mars dal 2009 la firma un cuntràt par la Collier Entertainment ad New York e la diś a tut ch'l'è prònta a far gnir fóra un disc nóṿ, a quìnd'ś an da 'l àlbum precedènt.

«
A sòṅ dvintàda madùra cuma parsòna e la l'è anc la mè mùśica. I tèst i èṅ dimóndi cuncrèt. I dascóran dla mè vita... beh, dal ròbi ch'i sucédan quand i putèṅ i vànan a durmìr e mè e mè marè andém in dla cambra da lèt...»
(Lita Ford la cònta cum al sarà al disc nóṿ)

In d'l Agóst dal 2009 a véd la luś Wicked Wonderland (Paéś dal maravìji catìvi), cun 15 braṅ dèntar e in du a canta anc sò marè. Al cansòṅ più impurtànti i èṅ al sìngul Crave, Patriotic SOB (in du la sòna p'r un mumènt un pès d'l in americaṅ cun la sò chitàra lètrica), Scream 4 me e Bed. Na versiòṅ limitàda in vinìl la vèṅ fóra in Utóbar, cun i dū pès tòlt via e i àtar misćiâ in na manéra difarénta.

«
Spank me cuz I like it, my soul is haunted, dancing with the devil, dress I disappear, I have been such a bad boy, hate is love love is hate, open your mind, I pin the hate. Tie me to the bed, make my eyes roll, look at my head.»
(EN)(Bed, 2009)
«
Dà-'m dal patóni ch'a m piàś, la mè anma l'è usesiunàda, balànd cun al diàvul, vistî ch'i sparìsan, a sòṅ stâ un putèṅ catìṿ, 'l òdi 'l è amór e 'l amór 'l è òdi, vèra i tò pinsér, mè a tac 'l òdi. Lég-um al lèt, fà prilàr i mè òć, guard-um la tèsta.»
(MUD)

In dal Favràr dal 2011 Lita la diś in n'intervìsta ch'l'è drē a pasàr un brut mumènt parchè l'è drē a separàr-as da sò marè dòp sed'ś-an ad matrimòni e che un sò àlbum nóṿ 'l è bèla prònt par gnir fóra. Al tìtul al gh'arà da èsar The Healing e al dascurarà ad càncar, malatìi, pèrdidi e separasiòṅ ma cun la vója 'd incuragiàr chi àtar.

Discugrafìa

In studi

  • 1983 Out for Blood
  • 1984 Dancin' On The Edge
  • 1988 Lita
  • 1990 Stiletto
  • 1991 Dangerous Curves
  • 1994 Black
  • 2009 Wicked Wonderland
  • 2012 Living Like a Runaway

Dal viṿ

  • 2000 Greatest Hits Live

Racòlti

  • 1992 The Best Of Lita Ford
  • 1999 Greatest Hits
  • 2001 Kiss Me Deadly
  • 2004 Platinum and Gold Collection - The Best of Lita Ford

Videugrafìa

  • 1989 Lita Video
  • 1990 A Midnight Snack
  • 1991 Dangerous Videos Vol.1
  • 2003 Complete Video Collection

Culegamènt estéran in ingléś


Estratto da "http://eml.wikipedia.org/w/index.php?title=Lita_Ford&oldid=68851"