Pantera

Da Wikipedia.
C'l artìcul chè 'l è scrit in Miranduléś Emiliàn
Al cantànt di Pantera Phil Anselmo tòlt śò a Madrid
«
Look at me now, I'm broken, inherit my life, I'm broken. One day we all will die, a cliched fact of life, force fed to make us heed, inbred to sponge our bleed, every warning, a leaking rubber, a poison apple for mingled blood.»
(EN)(I'm broken, 1994)
«
Guàrd-um adès, a sòṅ dasfàt, a-j-ò reditâ la mè vita, a sòṅ dasfàt. A gnarà al tèmp che tut nuàtar a murarém, un fat da gnint in dla vita, a ciapém al magnàr par fòrsa acsè a psém scultàr, a sém tirâ sù par sugàr al nòstar sangṿ, tut i avìś, na guma ch'la pèrd dl'àqua, un póm pîṅ ad vlèṅ par dal sangṿ misć.»
(MUD)


I texàṅ Pantera i èṅ un grup heavy metal americàṅ, mis insém a Arlington in dal 1981 p'r i fradèi Abbott, cgnusû méj cuma Dimebag Darrell (chitàra) e Vinnie Paul (batterìa). Al nóm al daśvèṅ da la sità ad Pantego in dal Texas e minga da la bèstia. I s èṅ mulâ in dal 2003. In dla lór caréra i aṅ cambiâ gènar pasànd da 'l heavy di inìsi a 'l trash e groove metal di ùltim tèmp.

Al crìtic muśicàl Jason Birchmeier 'd All Music Guide al i à batśâ cuma "al più grand grup metal di an Nuànta e òṅ di più grand e inuvatìṿ ad sèmpar" mèntar la réda televiśìva VH1 la i à mis al 45° pòst in dla clasìfica di 100 più grand d'l hard rock e al 5° pòst ad quéla di più grand grup heavy metal ad sèmpar.

Biugrafìa

Gl'Inisi (1981-1983)

La prima furmasiòṅ di Pantera l'éra furmàda da i fradèi Abbott (ch'i gh'ìvan mis i bèsi), da 'l basìsta Tommy Bradford, da 'l chitarìsta Terry Glaze (cgnusû anc cuma Terrence Lee) e da 'l cantànt Donnie Hart. La band la tacò sunànd dal cover di Kiss e di Van Halen. In dal 1982 Hart e Bradford però i mòlan al grup: Terry Glaze al sa spòsta a la vóś e al sò pòst al riva Rex Brown a sunàr al bas. I Pantera i s fànan cgnósar anc in di àtar pòst cuma la Louisiana e 'l Oklahoma.

I prim an (1983-1986)

In cal mèntar i Pantera i ìvan tacâ a rigistràr dal canti nóvi, lasànd lè quàśi dal tut ad far dal cover di àtar grup. In dal 1983 a vèṅ fóra al lór prim disc Metal Magic (Metàl Màgic) anc par 'l apòǵ finansiàri ad Jerry Abbott e ad soquànt'atri band ch'i i ìvan tòlt a cór p'r al talènt ch'i ìvan mustrâ. Cal prudót lè 'l ira pîṅ 'd influénsi ad grup quài Kiss, Van Halen e Judas Priest.

Maṅ mâṅ ch'i dvintàvan più famóś, i Pantera i s éran mis a sunàr in gir p'r i Stat Unî cun di cuncèrt cic. In dal 1984 i rigìstran al secónd àlbum Projects in the Jungle (Pugèt in dla giùngla) cun un sòṅ ch'al tgnìva a drē a 'l hair metal americàṅ anc se più dur e péś, cun la vóś ad Glaze ch'la parìva sèmpar da piò quéla ad Rob Halford, al cantànt di Judas Priest. P'r i Pantera a gh'éra anc al prim video in bal p'r al sìngul All Over Tonight.

In d'l Istâ dal 1985, al grup al cgnós al chitarìsta di Keel Marc Ferrari durànt un sò tour in Texas. Diamond e Vinny i gh dànan un tape cun soquànti dal canti ch'i arév cumpòst in séguit al tèrs disc I am the night (A sòṅ la nòt). Subìt dòp avér-al scultâ, Ferrari a s fà avànti par dar-ag na maṅ dvintànd sò amìg. Al disc al vèṅ fóra in c'l an lè, sèmpar par la cà discugràfica ad famìja, la Metal Magic Records, cun al sìngul Hot and Heavy.

'L arìṿ ad Phil Anselmo (1986-1989)

Al baterìsta Vinnie Paul in dal 2008

In dal 1986 gl'Abbott i decìdan ad cambiàr regìstar e pasàr a 'l thrash metal dòp avér ascultâ di pès da nuànta gnû fóra in c'l an lè cuma Reign in Blood di Slayer e Master of Puppets di Metallica.

Al cantànt Terry Glaze però, da sèmpar cuntràri a chi sòṅ lè parchè a gh piaśìva un stil più clàsic, al n éra minga 'd acòrd e al mòla al grup. Al sò pòst i vènan tòlt prima Matt L'Amour e pò David Peacock ma ninsòṅ di dû 'l éra adàt a cantàr i pès nóṿ.

A la fiṅ a vèṅ catâ quél giùst: Philip "Phil" Anselmo, ex cantànt di Samhain e Razorwhite cun di urìgini itagliàni, pascâ sèmpar in dal Sud di Stat Unî a New Orleans. Chi lò al gh'iva abû n'infànsia dimóndi difìcila: cun un pàdar imbariagòs e ch'al gh'iva un risturànt a Metairie, pò butâ śò da 'l uragàṅ Katrina, a quind'ś an 'l iva dat fóg a la cà di sò genitór sól par far ciapàr un spaj a sò surèla. Scapâ pò da cà, 'l iva decìś ad far dla mùśica in dla vita, al sól quèl ch'al gh'intirisìs.

Cun Anselmo i Pantera i càmbian dal tut pasànd a dal tunalità adàti a 'l sound thrash e groove metal.

Al prim àlbum dla śvòlta a s cata cun Power Metal (Putér dal Metàl, 1988), in dua la nóva furmasiòṅ la s fà védar in pùblic par la prima vòlta. Al disc 'l è prudót anc par Marc Ferrari ch'al sòna pur soquànti parti ad chitàra.

In d'l àlbum a s cata anc al braṅ Proud to be Loud ch'l éra stâ scrit par Ferrari stés p'r èsar mis dèntar in dal disc umònim di Keel dal 1987 ma pò 'l éra stâ mis da na banda.

Power metal al piàś fin da subìt a 'l pùblic e a i crìtic e al pòrta i Pantera al sucès.

«
It's a matter of time 'fore it's too late, the pressure's building up, you feel you've had enough, so go now away, I'll lay it on the table, you’re feelin' so unstable, I want to love you but you seem so far away and I don't even know your name, I just wanta throw you away.»
(EN)(Hard ride, 1988)
«
L'è sól na questiòṅ ad tèmp prima ch'a sia tròp tard, la presiòṅ la và sù dimóndi, at sènt 'd avér-an abû asè, alóra và via adès, a t al ślungarò in sla tavla, ta t sènt ch'at trabàl, a vój amàr-at ma a par ch'at sia acsè luntàṅ e a n sò gnanc al tò nóm, a t vój sól butàr-at via.»
(MUD)

Cowboys from Hell (1989-1992)

Al basìsta Rex Brown

Dòp la publicasiòṅ ad Power Metal, Dave Mustaine al dmanda a Darrell ad śuntàr-as a i sò Megadeth ma chi lò al diś ad no parchè al n vliva minga dastacàr-as da sò fradèl.

In cal mèntar Mark Ross, manager dl'etichéta discugràfica Atco Records, ch'l iva duciâ al grup in un cuncèrt in Texas e 'l éra armàst dimóndi culpî da l'eśibisiòṅ di quàtar, al gh eśibìs un cuntràt par pasàr sèg. I Pantera i èṅ 'd acòrd e acsè i tàcan a lauràr in di studi ad registrasiòṅ ad Pantego. I frut i ś védan al 24 ad Luj dal 1990 quànd i faṅ gnir fóra Cowboys from Hell (Cowboys da 'l Inféran), 'n àlbum ch'al tóca la puśisiòṅ 117 dla Top 200 dla Billboard.

Al disc 'l è cunsiderâ 'l àlbum dla śvòlta par la madurasiòṅ dal stil muśicàl dal grup, cun di pès ch'i vaṅ da 'l heavy metal clàsic (quài Domination, Shattered e The Art of Shredding) cun la vóś puténta, élta e basa ad Philip Anselmo a di àtar ch'i arciàman i sòṅ dal speed/thrash metal an Utànta (Heresy, tant par dir-'n una) cuma a s pól ascultàr in di riff ad chitàra ad Diamond Darrell e in dla casa dópia ad Vinnie Paul.

Cowboys From Hell al gh'à dèntar dimóndi àtar pès dvintâ pò di clàsic dal grup cuma Cemetery Gates, na cansòṅ ad sèt minùt ch'la dascór dla religiòṅ e dla mòrt, Psycho Holiday e la title-track stésa.

P'r al fat che quést chè al sia al prim àlbum par na major (la ATCO la fà part dl'Atlantic Recording), dimóndi i crédan ch'al sia anc al prim àlbum dabòṅ.

Fòrt dal fat ch'al disc 'l iva vindû bèṅ (dòpa sèt an al dventarà ad plàtin in di Stat Unî), i Pantera i tàcan al Cowboys from Hell Tour, sustgnû da grup da spala quài Exodus e Suicidal Tendencies, avénd 'l unór ad sunàr a 'l Monsters Of Rock ch'al s éra tgnû a Mosca in dal 1990 insém a AC/DC e Metallica.

«
Under the lights where we stand tall, nobody touches us at all, showdown, shootout, spread fear within, without, we're gonna take what's ours to have, spread the word throughout the land, they say the bad guys wear black, we're tagged and can't turn back. You see us comin' and you all together run for cover, we're takin over this town. Here we come reach for your gun and you better listen well my friend, you see, it's been slow down below, aimed at you we're the cowboys from hell.»
(EN)(Cowboys from hell, 1990)
«
Sót al luś in du sém in èlt, ninsòṅ a s tóca, mét al carti in tàvla, pusa via, stràmna la paùra dèn't e fóra, a turém quél ch'l è nòstar ad dirìt, a purtarém la paròla dapartùt, i dìśan ch'i ragasōl catìṿ i ś vèstan ad négar, a sém marcâ e a n psém minga turnàr indrē. Tè 't a ś véd rivàr e tut vuàtar a curarìv a lugàr-uv, a sém drē a tōr al vòstar pòst in cla sitadìna chè. A sém chè e a ślunghém la maṅ vèrs la vòstra rivultèla e a sarév méj ch'at ascultìs bèṅ umàsa, à't capî? 'L è stâ lènt ché 'd sóta, a t puntém, a sém i cowboy da 'l Inféran.»
(MUD)

Vulgar Display of Power, Far Beyond Driven (1992-1994)

Philip Anselmo in dal 2009

Al 25 ad Favràr dal 1992 i Pantera i pùblican 'l àlbum Vulgar Display Of Power (Vulgàra Dimustrasiòṅ ad Putér), un tìtul tòlt diretamènt da na fraś dal film dal 1973 L Eśurcìsta quand al prevòstar Damien Karras al dmanda a l'indemugnàda Regan MacNeil ad liberàr-as dal demòni druànd al sò putér malèfic e lì lē la gh rispónd: "that's much too vulgar a display of power".

Al disc al gh'à un stil incóra più tirâ in di cunfrónt ad Cowboys from Hell esénd un eśémpi ad groove metal in tut e par tut e 'l è cunsiderâ da dimóndi di sustenidór dal grup cum al più cumplét ad tut, vindénd più ad dû migliòṅ ad còpi in di sól Stat Unî a tut al 2004. I sìngui fat gnir fóra i èṅ sinc: Mouth for war, Walk, Fucking Hostile, This Love e Hollow e i sò vìddeo i tàcan a giràr anc par MTV.

Al sucès bèl grôs ad vénditi l'à parmìs pò a i Pantera ad tacàr un tour mundiàl rivànd anc in Giapòṅ e a 'l Monsters Of Rock ingléś (in dua i quàtar i aṅ sunâ insém a di pès da nuànta cuma Iron Maiden e Black Sabbath).

«
You can't be something you're not, be yourself, by yourself, stay away from me, a lesson learned in life known from the dawn of time. Respect, walk, what did you say? Are you talking to me? No way punk, I come home boy.»
(EN)(Walk, 1992)
«
Ta n pō minga èsar quèl che ta n sē briśa, fà in manéra 'd èsar tè stés, da par tè, stà luntàṅ da mè, na lesiòṅ imparàda in dal córs dla vita cgnusùda fiṅ da 'l inìsi di tèmp. Rispèta, móv-at! Cuś à't dit? Sē't drē a dascórar mèg? A n gh'à minga sèns, sfigâ, mè a vag a cà ragasōl.»
(MUD)

Finî al tour i Pantera i tàcan subìt a far dal canti nóvi e al riśultàt 'l è Far Beyond Driven (Purtâ bèṅ da 'd là), disc fat gnir fóra al 15 ad Mars dal 1994 e purtâ a di livèi clamuróś ad vendìti, rivànd anc al prim pòst in dal clasìfichi americàni (29 stmani in dal top 200) e austragliàni. 'L àlbum, che in cupertìna al véd na punta gigànta 'd un tirabusòṅ insfilsàr un tésć ma che a 'l inìsi al gh'iva da ficàr-as dèntar a 'n cûl pigâ a nuànta, al gh'à quàtar sìngui: I'm Broken (numinâ a i Grammy Award cuma Best Metal Performance), 5 Minutes Alone, Becoming e la cover di Black Sabbath fata bèṅ Planet Caravan.

«
I'm born again with snakes eyes, becoming Godsize, I found my life was slipping through my hands, perhaps through death my life won't be so bad, I can see you, can fuck you, inside of you. Staring through your eyes, belittle your friends to serve me, to suck me.»
(EN)(Becoming, 1994)
«
A sòṅ rinâ cun di òć da bisa, dvintànd grand cum un Dio, a-j-ò fat a mènt che la mè vita l'éra drē a śliciàr-um via da 'l maṅ, a gh'è al caś che la mòrt la la faga dvîntàr quèl ad méj, a pòs véd'r-at e ciulàr-at, da dèntar ad tè. I guard fis i tò òć, a dag pòca impurtànsa a i tò amìg faghénd-um sarvìr e ciuciàr.»
(MUD)

The Great Southern Trendkill e prim prubléma (1994-1996)

Philip Anselmo impgnâ cun i sò Down a Bulógna in dal Luj dal 2008

Phil Anselmo al taca ad avér di cumpurtamènt strâṅ dòp la publicasiòṅ ad Far Beyond Driven restànd da spés da par lò e separâ da chi àtar e mulànd al tour dal 1995 tut 'd un trat.

La band la próa a dar na spiegasiòṅ dgénd che Phil 'l éra stresâ par via ad tut chi viàś ch'l éra custrét a far par tgnir a drē a gl'impégn ma 'l éra ciàr ch'a gh'éra di prubléma fra lò e al rèst dal grup. Soquànti stmani dòp a ś vèṅ a savér che Anslemo 'l éra finî in dla depresiòṅ parchè 'l éra sòlit imbariagàr-as e drugàr-as.

I Abbott i al manda alóra a far-as curàr e p'r un pōc al ròbi i vaṅ a pòst ma 'l an dòp i prubléma i vènan fóra incóra e a salta fóra che Phil al tōś dl'eruìna.

In cal mèntar, al 19 ad Setémbar dal 1995, al cantànt 'l iva fat gnir fóra un disc da par lò cun un grup suo ciamâ Down e cun al tìtul ad Nola.

Quand tut a lasàva inténdar che la stòria di Pantera la fus finìda lè, al 22 ad Maǵ dal 1996 a vèṅ fóra un disc nóṿ dla band texàna, The Great Southern Trendkill (La Gran Vója 'd Masàr dal Sud), al più rabî e catìṿ ad tut i disc ch'i ìvan fat fin lè, cun Anselmo ch'l iva rigistrâ la vóś da par lò in un studi ad New Orleans luntàṅ da chi àtar. Dimóndi dal canti i dascóran ad 'l uś dla dròga, cuma in dal caś ad Suicide Note (cansòṅ gnuda fóra in dû part), Living Through Me (Hell's Wrath) e dla cgnusùda, par via dal vìddeo, Drag the Waters.

«
Promised you (swore) that no one had been there and she was going to keep it that way, let it move in, you got thin, and got high, and your money went and so did your friends but she's by your side, and her smile cannot hide the premonition of the beckoning end - the end. Drag the waters some more like never before.»
(EN)(Drag the Waters, 1996)
«
La t à giurâ che lè a n gh'éra stâ ninsòṅ e la 'l dgiva da spés, fà'l móvar, ta gh'l à fiàp, ta gh'l à grōs e 't à spéś i tò bèsi cuma anc i tò amìg, ma lē l'è da la tò banda e al sò surìś al n pōl minga lugàr la premunisiòṅ ch'la fiṅ 'l è drē a rivàr. Pésca in di aqui 'n àtar pōc cuma ta n à fat mai prima.»
(MUD)

Phil drugâ pódag, un disc dal viṿ e ùltim cd insém (1996-2004)

Philip Anselmo cun i sò Superjoint Ritual a 'l Ozzfest in dal Luj dal 2004

Al 13 ad Luj dal 1996 Phil Anselmo al vèṅ purtâ in présia a 'l uśdàr parchè 'l iva tòlt dl'eruìna e 'l éra finî in còma n'óra dòp un cuncèrt in Texas armanénd sinc minùt cun al cór férum. Da cal mumènt lè in avànti, anc s'l iva prumìs ad tar-gh un taj, Anselmo al taca a śugàr ad tant in tant cun la "pulvrìna biànca", questiunànd-as sèmpar da piò cun la sò muróśa 'd in alóra, Stephanie Opal Weinstein, e cun gl'Abbott ch'i al vlìvan pulî e mis a pòst.

In cal mèntar, par far in manéra ad far gnir fóra quèl, al 29 ad Luj dal 1997 a véd la luś al prim disc dal viṿ dal grup, cun di eśibisiòṅ live d'l an prima. Al tìtul dal cd 'l è Official Live: 101 Proof e al gh'à dèntar dû braṅ nóṿ, Where You Come From e I Can't Hide.

A pasa al tèmp e Anselmo al par sèmpar da piò luntàṅ da i Pantera. In dal 1999 Phil al decìd ad tóras n'atra pàuśa, dòp quéla cun i Down, sunànd la chitàra in dal disc Holocausto de la Morte di Necrophagia, cun al scutmàj 'd "Anton Crowley".

In dal 2000 i Pantera métan da na banda al questiòṅ (anc parchè custrét da i impégn cun la cà discugràfica) e i tórnan insém par rigistràr Reinventing the Steel (Invintàr ad nóṿ 'l aśàl). Al disc al vèṅ fóra al 14 ad Mars diretamènt al quart pòst dla Billboard 200 cun al sìngul Revolution is My Name (numinàta Best Metal Performance a i Grammy Awards dal 2001) a cuciàr-al.

Al grup al partìs anc p'r un tour mundiàl ma in Europa i gh stànan pò pòc par via d'l atintâ d'l 11 ad Setémbar (a s fava fadìga a vulàr da un pòst a c'l àtar).

Turnâ a cà, Anselmo al taca incóra a lauràr da par lò, miténd sù 'n àtar sò grup, i Superjoint Ritual, e faghénd gnir fóra 'n àtar disc cun i Down, Down II: A Bustle in Your Hedgerow in dal 2002.

I Abbott i próan ad aspitàr-al, spirànd ch'al cambìs idéa, ma a n gh'è gnint da far: 'sta vòlta Anselmo al i à pròpria mulâ. In dal 2003 a vèṅ fat un cumunicâ in dua a ś dgiva uficialmènt che la stòria di Pantera la finìva lè.

'L amasamènt ad Dimebag Darrell (2004)

Al pòvar Dimebag Darrell

In dal 2003 gl'Abbott i métan sù 'n grup groove metal tut nóṿ, i Damageplan, insém a 'l cantànt Patrick Lachman e a 'l basìsta Bob Zilla.

I quàtar i faṅ pò gnir fóra un disc in dal 2004 ciamâ New Found Power ch'al vénd bèṅ e ch'al gh parmìt ad partìr p'r un gir ad cuncèrt in di Stat Unî.

Durànt al cuncèrt d'l 8 ad Dicémbar dal 2004, in dal club famóś Alrosa Villa ad Columbus, al stés dè d'l umicìdi ad John Lennon, un sustenidór fóra ad tèsta di Pantera al salta sù a 'l impruvìś in sal palc e al taca a sparàr cun la sò rivultèla vèrs Dimebag Darrell, masànd-al. Insém a lì lò, i móran àtar tri óm ch'i éran rivâ lè par jutàr-al. A mór anc 'l asasèṅ p'r i cólp ad sćiòp sparâ da i pulisiòt ch'i éran in sal pòst.

Sabû quél ch'l éra sucès, Phil Anselmo a s fà viṿ incóra, rivànd in Texas p'r un ùltim salùt a 'l sò vèć cumpàgn ma ninsòṅ dal grup al al vliva a 'l funeràl, specialmènt la murósa ad Darrell, Rita Haney, ch'la gh'îva dit ch'la gh arév tajâ la tèsta s'al s fus preśentâ da cla banda.

Anselmo al decìd ad rispetàr al vulér dla famìja stand luntàṅ da 'l simitèri al dè dal funeràl.

Par arcurdàr Darrel, 'l ex chitarìsta 'd Ozzy Osbourne, Zakk Wylde al decìd ad dedicàr-ag la sò cansòṅ In this River.

In dal 2005 soquànti rivìsti i dìśan che i Pantera i sarésan drē a turàr incóra insém ma la vóś la vèṅ fata taśér diretamènt par Vinnie Paul.

La stòria di Pantera l'è finìda par sèmpar. A gh'è sól al tèmp par far gnir fóra in dal 2009 un dvd 'd un cuncèrt tgnû in Curèa, Killing in Korea. In Memory of Dimebag p'r arcurdàr al chitarìsta dasfurtunâ e in dal 2010 la racòlta ciamàda 1990-2000: A Decade of Domination.

Furmasiòṅ

Ùltim cumpunènt

Philip Anselmo in dal 2011

Ex-cumpunènt

Discugrafìa

Album in studi

  • 1983 - Metal Magic
  • 1984 - Projects in the Jungle
  • 1985 - I Am the Night
  • 1988 - Power Metal
  • 1990 - Cowboys from Hell
  • 1992 - Vulgar Display of Power
  • 1994 - Far Beyond Driven
  • 1996 - The Great Southern Trendkill
  • 2000 - Reinventing the Steel

Album dal viṿ

  • 1997 - Official Live: 101 Proof

Racòlti

  • 2003 - Reinventing Hell: The Best Of Pantera
  • 2010 - 1990-2000: A Decade of Domination

Sìngui

  • Cowboys from Hell
  • Cemetery Gates
  • Psycho Holiday
  • Mouth for War
  • This Love
  • Hollow
  • Walk
  • I'm Broken
  • Planet Caravan
  • 5 Minutes Alone
  • Drag the Waters
  • Suicide Note Pt. I
  • Floods
  • Where You Come From
  • Cat Scratch Fever
  • Revolution is My Name
  • Goddamn Electric
  • I'll Cast a Shadow

Videugrafìa

  • 1985 - The Hot 'n Heavy Home Video
  • 1991 - Cowboys from Hell: The Videos
  • 1993 - Vulgar Video
  • 1997 - 3: Watch it Go
  • 1999 - 3 Vulgar Videos from Hell

Culegamènt estéran