Korn

Da Wikipedia.

C'l artìcul chè 'l è scrit in Miranduléś Emiliàn


«
Sometimes I cannot take this place, sometimes it's my life I can't taste, sometimes I cannot feel my face, you'll never see me fall from grace. Something takes a part of me, you and I were meant to be a cheap fuck for me to lay.»
(EN)(Freak On A Leash, 1999)
«
Dal vòlti a n gh la cav minga a tōr mèg cal pòst chè, dal vòlti l'è la vita ch'a n gh la cav briśa a gustàr-um, dal vòlti a m è impusìbil sintìr-um adòs la fàcia, ta n vadrà mai ch'a pèrd la gràsia. A gh'è quèl ch'al s tōś na part ad mè, nuàtar dū a séran distinâ ad èsar na ciulàda da pòc ch'a sòṅ custrét a far.»
(MUD)
Al grup Korn, da sinìstra: Arvizu, Luzier, Davis, Shaffer e Welch

I Korn i èṅ un grup califurgnàṅ mis in pē a Bakersfield in dal 1993, fundadōr insém a i Deftones dal gènar nu metal, in dua al bas a vèṅ sèmpar sparâ a mila. In sal cupertìni di sò disc e in di materiài prumusiunài al nóm dal grup 'l è ripurtâ sèmpar cun la R arbaltàda ad KoЯn.

In dal sò caréra i aṅ vindû da piò ad 30 migliòṅ ad disc, 17 migliòṅ in di sōi Stat Unî.

Biugrafìa

Gl'inìsi

James Shaffer, Reginald Arvizu e David Silveria i aṅ tacâ a sunàr a la fiṅ di an Utànta, insém a 'l cantànt Richard Morrill, in un grup ciamâ L.A.P.D. (acrònim ad Los Angeles Police Department ch'a vōl dir Dipartimènt ad pulisìa ad Los Angeles ma par lōr subìt al vliva dir invéci Love and Peace Dud, Amōr e paś umàsa e pò Laughing as People Die, Ridénd mèntar la gint la mōr) mèntar Brian Welch 'l éra armàś sèg sōl in soquànt cuncèrt.

Al logo cun la R arbaltàda di KoЯn

Par la Triple X Records i regìstran 'l EP umònim e pò 'l àlbum Who's Laughing Now in dal 1991 ma 'l an dòp al cantànt, ch'al druàva dal dròghi, al i mòla. In dal 1994 i quàtar i cgnósan a 'n bar Jonathan Davis, cantànt di SexArt, e Shaffer e Welch i decìdan bvénd che chi lò al gh'arà da èsar al vocalist nóṿ dal grup.

Subìt al cantànt 'l éra persuàś ad dir ad no ma pò un sò amìg ch'al vdiva al futùr al gh fà cambiàr idéa. Cun Davis dèntar, i L.A.P.D. i decìdan ad cambiàr nóm, prima i sarnìsan Creep e pò Korn. Cal nóm chè al gh'éra stâ dit p'r un fan che 'l i vliva ciamàr Corn (Gran). A 'l inìsi al grup al n éra briśa dl'idéa ma pò, a n cavànd-gh-la minga a catàr di àtar nóm, i al tōś. In séguit, Shaffer al s invènta ad cambiàr la "C" cun na "K" e ad prilàr la "R" in "Я", faghénd dvintàr al nóm "KoЯn". Al logo invéci 'l è na pinsàda ad Jonathan Davis.

A Huntington Beach i tàcan al sesiòṅ cun Davis che, cun un micròfun da dū sòld, al próa la prima canta, Alive (al vìddeo dla registrasiòṅ al s vadrà pò in dal 1997 in dla caséta ad Who Then Now?).

In dal 1993 i pùblican al demo ad Neidermeyer's Mind cun dèntar i pès Predictable, Blind, Daddy e Alive. Un bcóṅ dal riff ad cla canta chè al sarà pò druâ in dal braṅ Need To che, insém a i àtar tri, i faràṅ part dal prim disc dal grup. Invéci Alive la sarà pò arfàta ad nóṿ soquànt an dòp, finénd in dal disc dal 2003 Take a Look in the Mirror.

Korn

Al cantànt di KoЯn Jonathan Davis

In dal 1994 i Korn i faṅ catàr in di negòsi al lōr prim disc, ch'al pòrta al sò nóm e ch'l è stâ prudót par Ross Robinson dl' Epic Records, cunsiderâ al prim lavōr nu metal ad sèmpar. I sìngui tirâ fóra dal disc i èṅ Shoots and Ladders (braṅ cun dal curnamùśi a 'l inìsi e numinâ a i Grammy cuma Best Metal Performance), Clown e Blind.

In dal canti a vèṅ druàda, par la prima vòlta par la mùśica heavy metal, la tècnica dal scatting (in dal braṅ Ball Tongue) ch'la daśvèṅ da 'l jazz e ch'la cunsìst in dal bacajàr in présia soquànti paròli sénsa séns una a drē a cl'atra sōl par dar-gh al ritm e la meludìa. I tèst, scrit par Jonathan Davis, i dascóran dla sò vita e i èṅ dimóndi dûr e pîṅ ad parulàsi (cuma in dal braṅ Faget, Fnòć), anc parchè chi lò da pìcul 'l à patî dal bòti e di suprùś. In particulàr, in dla canta Daddy, Davis al cònta ch'l è stâ viulentâ quànd 'l éra un putèṅ, da 'n amìg ad famìja, òṅ ch'al vivìva davśèṅ da lò.

Par dar 'n apòǵ a 'l disc, ch'l à vindû 4 migliòṅ ad còpi in tut al mónd, i Korn i tàcan un tour ad 'n an e mèś.

Fra Mars e Avrìl dal 1995, i vaṅ in gir a sunàr insém a i Danzig e a Marilyn Manson. In Agóst i s śibìsan cun Megadeth, Fear Factory e Flotsam and Jetsam e pò in Aṿtòṅ cun Ozzy Osbourne, Deftones, Sugar Ray e Cradle of Thorns.

«
Little child, looking so pretty, come out and play, I'll be your daddy, innocent child, looking so sweet, a rape in my eyes and on your flesh I'll eat, you've raped! I feel dirty, it hurt! As a child, tied down! That's a good boy and fucked! Your own child, I scream, no one hears me, it hurt! I'm not a liar.»
(EN)(Daddy, 1994)
«
Putèṅ at sē acsè bèl, vîṅ fóra e śóga, a sarò al tò papà, putèṅ a mód, at sē acsè dóls, na viulénsa in di mè òć e a magnarò in sla tò carna, at sē stâ viulentâ! A m sènt un malnét, al m fà mâl! Cuma 'n putèṅ, ligâ par tèra! Acsè 'l è un brav baghét e futû! Pròpria al tò putèṅ, mè a sig e ninsòṅ a m sènt, al m fà mâl! A n sòṅ mia un buśiàrd.»
(MUD)

Life Is Peachy

Al baterìsta David Silveria

In d'l Utóbar dal 1996 al grup al pùblica al sò secónd lavōr in studi, Life Is Peachy (La vita l'è tòga), un disc ch'al s piàsa drit a 'l tèrs pòst in di Stat Unî, anc séns avér i cuć dal ràddio, dal televiśiòṅ e di giurnài, anc parchè al canti i èṅ pini stópi ad parulàsi (specialmènt al braṅ K@#0%! ch'al gh'i à dèntar tuti una a drē a cl'atra, anc quéli più malnéti ch'a sa gh sia) e cun di tèst dimóndi dûr (Swallow). I sìngui tirâ fóra i èṅ tri: No Place to Hide, A.D.I.D.A.S. (òṅ di sò braṅ più famóś, ch'al n dascór briśa, cuma a s prés crédar, dal scarpi americàni, ma dal sès parchè 'l è 'l acrònim ad All Day I Dream About Sex, Tut i dè a sógn al sès) e Good God (gnû fóra in dal 1997, cun Davis ch'al dróa la sò vóś cuma s'al gh'is al diav'l adòs). In dla cansòṅ Wicked (cover 'd Ice Cube) Davis al fà un duét cun Chino Moreno, cantànt di Deftones, mèntar la canta Chi la tōś al nóm pròpria dal basìsta ad cal grup lè, Chi Cheng.

«
It came unknown to me, paranoid, it's controlling all of me, somehow, terror so pure, right now, shit I'm yours. My sorrow, I swallow, follow me, oh hell, no. Was it me? I swallow, forget me, I don't know.»
(EN)(Swallow, 1996)
«
'L è rivâ dascgnusû, paranòic, al m tîṅ dal tut sóta cuntròl, in na quàlc manéra, scarésa a mila, pròpria adès, mèrda a sòṅ tuo. Al mè dulōr, a mand śò, vîṅ mèg, 'd un diàvul, no. Sòṅ-j-a stâ mè? A mand śò, daśmént-at ad mè, a n al sò minga.»
(MUD)

La b-side Proud l'è stada druàda dènt'r al film ad scarésa So cosa hai fatto (A 'l sò quél ch't à cumbinâ) dal 1997.

Life Is Peachy 'l è stâ numinâ a i Grammy cuma "Best Metal Performance", par la canta No Place To Hide e 'l à vindû quàtar migliòṅ ad còpi in dal mónd (dū in dal sò paéś), ciapànd dū disc ad plàtin.

I Korn i 'l àṅ sunâ pò dal viṿ durànt un tour in gir cun i Metallica e anc in dla réda Internet, òṅ di prim grup a far-al.

A la fiṅ dal 1997 al grup al dà vita a la Elementree Records faghénd firmàr sèg subìt al grup di Orgy.

Follow the Leader

James "Munky" Shaffer

Prima ch'a gnis fóra al sò tèrs àlbum, i Korn i s faṅ védar par na stmana in un spetàcul ciamâ KornTV traśmìs sōl via intèrnet ch'al fava védar i lavōr ad prudusiòṅ ch'i éran drē a far. Fra i òspit dla prugràma a s arcòrda 'l atōr ad film purcùs Ron Jeremy e al grup di Limp Bizkit.

Al 18 'd Agóst dal 1998 al disc Follow the Leader al vèṅ vindû finalmènt in di negòsi. I gh'aṅ dâ na maṅ al rapper Ice Cube (ch'al canta insém a Davis in dal braṅ Children Of The Korn, un tìtul ch'al fà gnir in mènt al film da scarésa Furmintòṅ Rós Sangṿ, cuntâ par Stephen King), Tre Hardson di Pharcyde e Fred Durst di Limp Bizkit mèntar la cupertìna dal disc, ch'la véd na putìna śugàr a la campanèla in sal pic dna muntàgna andànd in a risć ad cascàr śò e spaplàr-'s a tèra, l'è un lavōr ad Greg Capullo, diśegnadōr ad fumét americaṅ cuma Quasar, Spawn e X-Force.

'L àlbum al finìs subìt a 'l prim pòst in dal nòrd Amerìca, Austràglia e Śelànda Nóva, tirâ sù da dū sìngui da nuànta cuma Got the Life (canta tìpica di Korn) e Freak on a Leash, cun un vìddeo fat a pòsta p'r al diśegnadōr Todd McFarlane, creadōr ad Spawn e vèć artìsta dla Marvel Comics in dua 'l iva laurâ a 'l Óm Ragn a la fiṅ di an Utànta e Hulk.

Follow the Leader 'l è dvintâ al disc più cgnusû dal grup cun déś migliòṅ ad còpi vindùdi e sinc disc ad plàtin.

«
Bring your boys to the party, we can double up, double rowdy, double bout it, hardcore teenager fuckin' bitches major, catch me if you can, fuck the law with my dick in my hand, we're comin' strong, generation triple X, we're all about the weed smoke and the kinky sex. And the children are born, insanity! You picked on me! Stop fuckin' with me! Alright. Stop fuckin' with me! We're the children of the Korn. Stop fuckin' with me! Called a fag all my life then I got it, so far, it's open day like me. Insanity. Go figure, what's a fag? Now a player, baptized and born and the children of the Korn.»
(EN)(Children Of The Korn, 1998)
«
Manda i tò baghét a la fèsta, a psém ardupiàr-i, stus dópi, fèsta dópia, ragasèṅ malnét ch'i fótan dal putàni più grandi, ciàp-am s'at pō, ciàva la léǵ druànd al mè cas ch'a gh'ò in maṅ, a sém drē a rivàr catìṿ, na generasiòṅ cun tri X, tut quél ch'a fém 'l è ad fumàr dl'èrba e far dal sès fóra dal cumùṅ. E i putèṅ i èṅ nâ, ròbi da mat! Ta gh l'à mèg! A basta ad fótar mèg! Và bèṅ. A basta ad fótar mèg! A sém i fiōi di Korn. A basta ad fótar mèg! Ciamâ fnòć par tuta la vita pò a 'l ò ciapâ acsè a la fiṅ 'l éra bòṅ mèg. Ròbi da mat. Figùr-at, cuś è'l un fnòć? Adès un muśicìsta nâ e batśâ e i fiōi di Korn.»
(MUD)

Issues

I Korn tòlt śò durànt i MTV Awards Aśiàtic in dal 2006

In dal 1998 al grup al dà vita a 'l Family Values Tour insém a Incubus, Orgy, Limp Bizkit, Rammstein e Ice Cube. Al tour al gh'à dimóndi sucès e al registrasiòṅ su CD e DVD i ciàpan un disc 'd òr e ad plàtin.

Al 23 ad Luj dal 1999 al grup al s śìbis a Woodstock, in frònt a 250.000 spetadōr.

In dal Nuvémbar dal 1999 'l è al tùran ad Issues (Questiòṅ), prudót par Brendan O'Brien. Al disc 'l è gnû fóra cun quàtar cupertìni difarénti, frut 'd un cuncórs 'd MTV fra i sò sustenidōr ch'i gh'ìvan da mandàr un diśégn. Quél ch'l à vins, fat p'r Alfredo Carlos, al véd un putòcio ad pèsa, su sfónd aràns, cun la pansa vèrta e sénsa al butòṅ d'l òć.

Cuciâ sù p'r i sìngui Falling Away from Me (cun al vìddeo dirèt par Fred Durst), Make Me Bad (cun la danéśa Brigitte Nielsen e 'l atōr Udo Kier ch'i rècitan in dal vìddeo) e Somebody Someone, 'l àlbum al finìs a 'l prim pòst dla Billboard, vindénd da piò 'd ùndas migliòṅ ad còpi in tut al mónd (al ciàpa anc tri disc ad plàtin). Dal punt ad vista muśicàl, al disc al véd un stîl misć, cun 'l uś dla letrònica e un pôc ad méno dal rap metal. Davis al sòna la curnamùśa in dal prim braṅ, Dead, e la baterìa in di pès Trash e Dirty.

Durànt la prumusiòṅ dal disc, i Korn i sònan dal viṿ, insém a la banda dla pulisìa dla sità, tut i sò pès a 'l teàtar Apollo ad New York, secónd grup a druàr ch'al pòst lè dòpa i Buddy Holly ch'i 'l ìvan fat a la fiṅ di an Sinquànta. Al cuncèrt 'l è anc stâ traśmìs a la ràddio.

«
Hey, I'm feeling tired, my time is gone today, you flew with suicide, sometimes that's ok, hear what others say, I'm here standing hollow, falling away from me, falling away from me, day is here fading, that's when I would say, I flew with suicide, sometimes kill the pain, I can always say "It's gonna be better tomorrow", falling away from me, falling away from me. Beating me down, beating me, beating me down down, into the ground.»
(EN)(Falling Away from Me, 1999)
«
Vê, a m sènt stuf, al mè tèmp 'l è finî, ta t cumpàgn cun al suicìdi, dal vòlti al và bèṅ, scólta quél ch'i dìśan chi àtar, mè a sòṅ chè vōd, luntàn-at via da mè, luntàn-at via da mè, cal gióran chè 'l è drē a finìr, quést quànd a vój dir, a m cumpàgn cun al suicìdi, dal vòlti a mas al patimènt, a n pòs minga sèmpar dir "Dmaṅ 'l andrà méj", luntàn-at via da mè, luntàn-at via da mè. Dand-um śò dal bòti, Piciànd-um, dand-um śò dal bòti, par tèra.»
(MUD)

In dal stés an i Korn i cumparìsan in 'n epiśòdi dal cartòṅ animâ South Park intitulâ Korn's Groovy Pirate Ghost Mystery, in dua a vèṅ anc sunâ la canta Falling Away From Me.

Sèmpar in ch'l an lè a vèṅ fóra 'n EP ad remix cun dèntar sinc braṅ: A.D.I.D.A.S. (radio mix), Good God (dub pistols mix), Got The Life (John Abraham remix), Twist/Chi (dal viṿ) e Jingle Balls, quésta chè na canta nóva.

Untouchables

Jonathan Davis

'L 11 ad Śugn dal 2002, dòp tri an da 'l ùltim disc p'r un prubléma ad sàlut dal baterìsta David Silveria, i Korn i pùblican Untouchables (Intucàbii), al dè dòp dn'eśibisiòṅ dal viṿ par la televiśiòṅ a 'l Hammerstein Ballroom ad New York. 'L àlbum al gh'à dèntar di sòṅ gothic rock e di sistetiśadōr, arc e di efèt speciài, par la prima vòlta in òṅ di sò lavōr, specialmènt in di braṅ Alone I Break, Hating e Hollow Life.

Al prim sìngul tirâ fóra, Here to Stay, in dal 2003 al vins un Grammy Award cuma "Best Metal Performance". Al sò vìddeo, cuma quél dal secónd sìngul Thoughtless, 'l è stâ dirèt p'r i fradèi śmèi Allen e Albert Hughes, famōś p'r avér girâ in séguit al film La vera storia di Jack lo squartatore cun Johnny Depp. Un tèrs sìngul, Alone I Break, al vèṅ dirèt in séguit par Sean Dack.

Al disc al vénd pôc anc parchè di hacker, di làdar dla réda internet, i gh l'ìvan cavàda a rubàr dal computer ad Munky al canti dal disc, sinc méś prima ch'al gnis fóra. Untouchables però al ciàpa listés al disc ad plàtin.

«
Why are you trying to make fun of me? You think it's funny? What the fuck you think you're doing to me? You take your turn lashing out at me, I want you crying with your dirty ass in front of me, oh, all my hate cannot be found, I will not be drowned by your thoughtless scheming, so you can try to tear me down, beat me to the ground, I will see you screaming. Thumbing through the pages of my fantasies, I'm above you smiling at you drown, drown, drown, I wanna kill and rape you the way you raped me and I'll pull the trigger and you're down, down, down.»
(EN)(Thoughtless, 2002)
«
Parchè sē't drē a tōr-'m in gir? Péns-at ch'al sia divertènt? Cuśa cas créd-at ch'al m faga? At sē drē a gnir-'m adòs, a t vój far-at piànśar cun al tò cûl malnét in frònt ad mè, tut al mè òdi al n pōl briśa èsar catâ, al n sarà minga fugâ da la tò furbìsia malpinsàda, alóra at pó tintàr ad butàr-um śò, śbat'r-um par tèra, a t vadrò sigàr. Girànd al paǵni dla mè fantaśìa, ad sōvar ad tè, a t rid in sima, néga, néga, néga, a vój masàr-at e viulentàr-at in dla stésa manéra ch't à druâ tè par viulentàr-um e a schisarò al grilét e tè at sē śò, śò, śò.»
(MUD)

Take a Look in the Mirror

Brian Welch dit "Head"

A 'l inìsi dal 2003 i Korn i pùblican cuma sìngul Did My Time, un braṅ ch'al cumparìva in dla culòna sunóra dal film Tomb Raider: La culla della vita cun l'Angelina Jolie ch'la cumparìs anc in dal vìddeo priumusiunàl.

'L ùltim lavōr fat cun tut i cumpunènt uriginài (e par la cà discugràfica Sony / Epic) 'l è Take a Look in the Mirror (Dà n'uciàda in dal spèć) dal Nuvémbar dal 2003. Al disc al vénd 98.000 còpi in dla prima stmana, tucànd la puśisiòṅ 9 in dal sò paéś. A s trata 'd un lavōr dimóndi grèś e rabî e pîṅ ad distursiòṅ, cuma quéi di inìsi e 'l è stâ prudót diretamènt par Jonathan Davis.

Cuma i aṅ dit anca lōr durànt di intervìsti, al disc 'l è stâ fat in présia par via dal vendìti dimóndi basi dal lavōr precedènt, cun al prubléma 'd èsar in gir p'r al Ozzfest tour in cal mèntar.

Al disc al gh'à dèntar quàtar sìngui: Did My Time, Right Now (cun un vìddeo rivultànt fat a cartòṅ animâ par Spike & Mike), Y'All Want A Single (braṅ ch'a tōś in gir al cà discugràfichi) e Everything I've Known. Cuma in “Follow the leader”, a s cata na canta (Play me) cun di pès rap fat par Nas. A la fiṅ dl'ultma cansòṅ, When Will This End, dòp soquànt minùt ad vōd, a gh'è un braṅ lugâ, One (cover di Metallica), sunâ dal viṿ in dal prugràma MTV Icon: Metallica in dal Maǵ dal 2003. Al fà finalmènt anc la sò cumpàrsa in s'n àlbum uficiàl al braṅ Alive, vèć demo dal grup.

«
Right now can't find a way to get across the hate when I see you, right now I'm feeling strange inside I wanna slash and beat you, right now I rip apart the things inside that excite you, right now I can't control myself I know hate you! I fucking hate you, shut up!»
(EN)(Right Now, 2003)
«
Pròpria adès a n cat minga la manéra par far-um pasàr 'l òdi ch'a gh'ò quànd a t véd, pròpria adès a m sènt straṅ ad dèntar e a vój far-at di siléf in fàcia e dar-'t-i, pròpria adès a t tir via i quèi ch'i t piàśan, pròpria adès a n pòs briśa tgnir stric 'l òdi ch'a gh'ò tèg! 'D un Dio, a t òdi, taśi!»
(MUD)

Greatest Hits, Volume 1

Reginald Arvizu tòlt śò a Purdenôṅ in dal Favràr dal 2008

Al 5 'd Utóbar dal 2004 a véd la luś la prima racòlta di Korn ciamàda Greatest Hits, Volume 1, cun dèntar i sìngui più cgnusû gnû fóra da 'l 1994 a 'l 2003, al remix ad Freak On A Leash e dū cover: Word Up di Cameo e Another Brick In The Wall di Pink Floyd, tirâ fóra cuma sìngui. In tut al disc al gh'à dèntar daśnóṿ pès.

«
Hey, teacher, leave those kids alone! All in all it’s just another brick in the wall, all in all you’re just another brick in the wall. We don’t need no education, we don’t need no thought control.»
(EN)(Another Brick In The Wall, 2004)
«
Vê, profesōr, lasa in paś chi baghét lè! A pinsàr-ag bèṅ, 'l è sōl n'atra préda in dal mur, a pinsàr-ag bèṅ, a sîv n'atra préda in dal mur. A n gh'ém briśa biśógn 'd educasiòṅ, a n gh'ém briśa biśógn 'd èsar tgnû 'd òć.»
(MUD)

Al 22 ad Favràr dal 2005 al chitarìsta Brian Welch al mòla tut 'd un trat al grup dgénd: «A-j-ò sarnî al Sgnór Gesù Crist cum al mè salvadōr, e a gh tindarò a drē faghénd la mè mùśica». "Head" al s fà batśàr in dal fiùm Giurdâṅ dascurénd liberamènt dla sò cunversiòṅ, specialmènt in dal sò sit internet. Òṅ di mutìṿ ch'al gh'à fat mulàr lè la baràca 'l è stâ quél ch'al n s cumpatìva piò ad sintìr sò fiōla pìcula dir dal parulàsi cantànd al canti di Korn.

See You on the Other Side

I Korn impgnâ in un cuncèrt dal 2006

Pôc tèmp dòp che Welch 'l iva mulâ 'l grup, i Korn i fìrman un cuntràt da vint-sinc migliòṅ ad dòlar cun la EMI e Virgin Records.

Al 6 ad Dicémbar dal 2005 i faṅ catàr in di negòsi al prim lavōr fat da lōr par la nóva cà discugràfica, See You on the Other Side (A sa vdém da cl'atra banda), ch'al s piàsa a 'l pòst nùmar tri dla Billboard. Al prim sìngul Twisted Transistor al s cumpàgna cun un vìddeo dirèt par Dave Meyers, in dua i Korn i èṅ imitâ in na manéra da far rìdar da di rapper cuma Xzibit, Lil' Jon, Snoop Dogg e David Banner. Àtar dū sìngui i gnaràṅ fóra in séguit: Coming Undone e Politics, quést chè minga sustgnû da 'n vìddeo, ma fat giràr sōl a la ràddio.

Al grup al decìd cun cal lavōr chè ad cambiàr un pôc gènar, avśinànd-as da piò a la lerònica e a 'l stîl ad Marilyn Manson e di Nine Inch Nails ad Peter Steele.

Al disc, ch'al gh'à dū versiòṅ: quéla nurmàla, cun quatòrdas braṅ dèntar, e quéla deluxe cun un CD da piò cun dèntar tri braṅ inèdit, dū mix ad Twisted Transistor e dū vìddeo live, 'l à vindû da piò ad dū migliòṅ ad còpi in tut e al gh 'l à cavâ a rivàr a 'l disc ad plàtin in di Stat Unî, armanénd par 35 stmani in dla Top 200.

Al 13 ad Śnar dal 2006 i Korn i sònan a 'l Hollywood Forever Cemetery, dand vita a 'l See You on the Other Side World Tour cun 'l apòǵ 'd Axl Rose di Guns N' Roses, Chester Bennington e Joseph Hahn di Linkin Park e l'atōra Jessica Biel.

«
Hey you, hey you, Devil's little sister, listening to your Twisted Transistor, hold it between your legs, turn it up, turn it up, the wind is coming through, can't get enough.»
(EN)(Twisted Transistor, 2005)
«
Vê tè, vê tè surelìna dal Diàvul ch'at sē drē a scultàr al tò tranśìstor fóra ad tèsta, tîṅ-al bèṅ stric in mèś a 'l gambi, tirâ sù al vulùm, dà-gh sù, al vènt al vèṅ dèntar, a n gh 'n ém mia asè.»
(MUD)

Live & Rare e Unplugged MTV

Reginald "Fieldy" Arvizu in dal 2008

Al 9 ad Maǵ dal 2006 i Korn i faṅ gnir fóra na racòlta, ad pès dal viṿ e di àtar rar, ciamàda Live & Rare. Al disc al gh'à dèntar sèt canti 'd un cuncèrt dal Nuvémbar dal 2003 a New York e àtar quàtar live, cun in śònta dū pès in studi (Proud e Earache My Eye, quést chè braṅ lugâ dal disc Follow The Leader).

Sèmpar dal 2006 'l è la racòlta dal cuncèrt dal 29 ad Luj a Nashville, The Family Values Tour 2006, cun dèntar sinc braṅ dal grup califurgnàṅ (cun na Shoots and Ladders/Wicked cantàda insém a Chino Moreno) e soquànt di àtar grup cuma i Deftones e i Stone Sour.

Al 12 ad Śugn dal 2006, durànt al tour in dal nòstar cuntinènt, a Davis a gh vèṅ catàda na malatìa dal sangṿ, la Idiopathic Trombocitopenic Purpura, ch'la 'l tîṅ a 'l uśdàr par na stmana.

In dal Dicémbar dal 2006 al baterìsta David Silveria, famóś anc p'r avér fat al mudèl par Calvin Kline e cgnusû p'r èsar al mémbar tìmid dal grup, al fà savér ch'al s turà na pàuśa e ch'al n sunarà briśa in di disc e in di cuncèrt a gnir.

Sénsa 'd lò, al 9 ad Dicémbar dal 2006 i Korn i sònan dal viṿ cun di strumènt acùstic par la traśmisiòṅ dal canàl televiśìṿ MTV insém a la Amy Lee di Evanescence (in dal braṅ Freak on a Leash, sarnî cuma sìngul) e Robert Smith di The Cure in dal braṅ Make Me Bad misćiâ par l'ucaśiòṅ cun In Between Days, vèć pès dal 1985 dal grup ingléś. Da nutàr anc la cover di Radiohead Creep, òṅ di ùndas dal pachét (tri i èṅ i pès tirâ via: No One's There, Thoughtless e Dirty), insém a na Throw Me Away sunàda cun sitar e di taiko giapunéś. L'eśibisiòṅ la vèṅ registràda p'r èsar misa in un disc selebratìṿ ch'al gnarà fóra al 6 ad Mars dal 2007 cun al tìtul MTV Unplugged. In dla prima stmana al lavōr al vénd 51.000 còpi e al finìs a 'l pòst nóṿ dla Billboard 200.

«
I thought it would be fun and games (It would be fun and games), instead it's all the same (It's all the same), I want something to do, need to feel the sickness in you. I feel the reason as it's leaving me, no, not again, it's quiet deceiving as I'm feeling the flesh made me bad, all I do is look for you and when I fix you, needed to, just to get some sort of attention.»
(EN)(Make Me Bad, 1999)
«
A pinsàva ch'al sarés stâ tògo (al sarés stâ tògo), invéci 'l è tut cumpàgn ('l è tut cumpàgn), a vój far quèl, a gh'ò biśógn ad sintìr al malèsar dèntar ad tè. A sènt ch'la ragiòṅ 'l è drē a mulàr-um lè, no, minga incóra, 'l è silensiōś inganàr mènt'r a sènt la carna ch'la m rénd catìṿ, tut quél ch'a fag 'l è pascàr-at e quànd a t tégn 'd òć, a gh'iva biśógn, sōl 'd avér na quàlc manéra 'd atensiòṅ.»
(MUD)

Al 7 ad Śnar dal 2007 i Korn i càtan in dal vèć amìg Terry Bozzio al baterìsta nóṿ.

Untitled

James "Munky" Shaffer impgnâ in dal Family Values Tour dal 2007

Al 31 ad Luj dal 2007 i Korn i véndan 'l utàṿ disc dla lōr caréra (sertificâ 'd òr dal mumènt ch'l à vindû da piò 'd un migliòṅ ad còpi in tut al mónd), un lavōr sénsa tìtul cgnusû in gènar cuma Untitled o anc The Ominous Root (da 'l nóm dl'òpra ad Richard Kirk ch'la figùra in cupertìna). Al cantànt Jonathan Davis 'l à dit in prupóśit: „A n vlìvan briśa dar n'etichéta a c'l àlbum chè. Al n gh'à minga di cunfìṅ e gnanc di lìmit. Parchè a n dar mia l'ucaśiòṅ a i nòstar sustenidōr ad ciamàr-al cuma i vólan?“.

I sìngui tirâ fóra i èṅ tri: Evolution (Maǵ 2007), Hold On (Utóbar 2007) e Kiss (Avrìl 2008).

«
And why do I deserve to die, I'm dominated by this animal thats locked up inside, close up to get a real good view, I'm betting that the species will survive, hold tight, I'm getting inside you evolution and when we're gonna find these bones, they're gonna want to keep them in a jar, the number one virus caused by procreation. And the planet may go astray, in a million years I say, those motherfuckers were all deranged, it's evolution.»
(EN)(Evolution, 2007)
«
E parchè gh'arév-j-a da meritàr-um la mòrt? A sòṅ tgnû stric da cla bèstia chè ch'a gh'ò ad dèntar, a m davśèṅ par véd'r-ag méj, a gh scumét ch'al spèci i scamparàṅ, tîṅ bòta, a sòṅ drē a gnir-at dèntar evulusiòṅ e quand a-j-arém catâ chi òs lè, i vuràṅ met'r-i via in na pruéta, al più grôs di vìrus fat sù da la prucreasiòṅ. E al mónd al prév perd'r-as, in un migliòṅ 'd an a dig, chi fiōi lè dna putàna i éran tut di fóra ad tèsta, l'è l'evulusiòṅ.»
(MUD)

Sénsa Silveria da drē da la baterìa par la prima vòlta, in cal disc chè i sònan al sò pòst Terry Bozzio (ch'al vliva dvintàr a tut i cóst òṅ di Korn ciapànd la sò part dal 25% e par cal mutìṿ lè 'l è stâ mandâ via), Brooks Wackerman ma anc Davis stés. I Korn i ciàman anc Zac Baird par sunàr al tastéri.

Al disc al fà al sò debùt diretamènt a 'l secónd pòst dla Billboard 200, un quèl ch'al n capitàva briśa da Untouchables dal 2002, ma in dal gir dna stmana al taca a véndar sémpar méno (un quàrt dal còpi), sparénd dal tut da la clasìfica dòp dódas stmani.

Mémbar

Quéi 'd adès

  • Jonathan Davis - vóś e curnamùśa (1993 - incō)
  • James "Munky" Shaffer chitàra (1993 - incō)
  • Reginald "Fieldy" Arvizu bas (1993 - incō)
  • Ray Luzier - baterìa (2007 - incō)

Ex cumpunènt

  • Brian "Head" Welch - chitàra (1993 - 2005)
  • David Silveria - baterìa (1993 - 2006)

Discugrafìa

Àlbum

  • 1994 - Korn
  • 1996 - Life Is Peachy
  • 1998 - Follow the Leader
  • 1999 - Issues
  • 2002 - Untouchables
  • 2003 - Take a Look in the Mirror
  • 2005 - See You on the Other Side
  • 2007 - Untitled album
  • 2010 - Korn III: Remember Who You Are
  • 2011 - The Path to Totality
  • 2012 - The Paradigm Shift
  • 2016 - The Serenity of Suffering
  • 2019 - The Nothing
  • 2022 - Requiem

Racòlti

  • 2004 - Greatest Hits, Vol. 1

Dal Viṿ

  • 2006 - Live & Rare
  • 2007 - MTV Unplugged: Korn

Demo

  • 1993 - Neidermeyer's Mind

EP

  • 1997 - Live at the Palace
  • 2001 - All Mixed Up
  • 2005 - The Other Side
  • 2005 - The Other Side, Part 2
  • 2006 - Politics Election EP
  • 2009 - Korn Digital EP#1
  • 2010 - Korn Digital EP#2
  • 2010 - Korn Digital EP#3

Sìngui

  • 1993 - Christmas Song
  • 1994 - Blind
  • 1995 - Need To
  • 1995 - Shoots and Ladders
  • 1996 - Clown
  • 1996 - No Place to Hide
  • 1997 - A.D.I.D.A.S.
  • 1997 - Good God
  • 1998 - All in the Family (insém a Fred Durst)
  • 1998 - Got the Life
  • 1998 - Children of the Korn (insém a Ice Cube)
  • 1998 - B.B.K.
  • 1999 - Freak on a Leash
  • 1999 - Falling Away from Me
  • 2000 - Make Me Bad
  • 2000 - Somebody Someone
  • 2002 - Here to Stay
  • 2002 - Thoughtless
  • 2002 - Alone I Break
  • 2003 - Did My Time
  • 2003 - Right Now
  • 2004 - Y'All Want a Single
  • 2004 - Everything I've Known
  • 2004 - Word Up!
  • 2004 - Another Brick in the Wall
  • 2005 - Twisted Transistor
  • 2006 - Coming Undone
  • 2006 - Coming Undone wit It (insém a Dem Franchize Boyz)
  • 2006 - Politics
  • 2006 - Hypocrites
  • 2007 - Freak on a Leash (unplugged, insém a Amy Lee)
  • 2007 - Evolution
  • 2007 - Hold On
  • 2008 - Kiss
  • 2008 - Haze
  • 2010 - Oildale (Leave Me Alone)
  • 2010 - Let the Guilt Go
  • 2011 - Get Up! (insém a Skrillex)

Videugrafìa

  • 1997 - Who Then Now? Vhs
  • 2002 - Deuce Vhs e Dvd
  • 2002 - Korn Live Dvd
  • 2006 - Live on the Other Side Dvd e Blu-ray
  • 2006 - Chopped, Screwed, Live and Unglued Dvd e Cd
  • 2008 - Live at Montreux 2004 Dvd e Blu-ray

Culegamènt estéran