Videodrome

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Videodrome
Videodrome.png
James Woods in na figùra dal film
id.
1983
Regia: David Cronenberg
Scritùr: David Cronenberg
Atùr: James WoodsDeborah HarrySonja Smits
Leslie CarlsonJack CreleyPeter Dvorsky
Lynne GormanJulie KhanerReiner Schwarz
Müsica: Howard Shore
Lengua: Ingléś
Dürä dal film: 87 minüt
Nasiòṅ: Cànada


«
Prima 'l mét sóta cuntról la tò mènt pò al śbraga 'l tò còrp.»
(Tagline dal film)


Videodrome (id.) 'l è 'n film fantàstic e ad scarésa dal 1983 ad David Cronenberg.

Sunt

Max Renn (James Woods) al gh'à na televiśiòṅ via caṿ ciamàda Civic TV ch'la traśmét da spés di prugràma viulènt e anc pòran. Un dè al sò amìg Harlan (Peter Dvorsky) al gh diś ch'l à savû ch'un canàl vìddeo piràta al manda in ónda dal figùri ad turtùri e viulénsi ma sōl par pôc secónd e pò al sparìs. Max al gh dmanda ad registràr-ag na caséta. Soquànt dè dòp Max 'l è òspit 'd un talk show televiśìṿ in du a s dascór di mèdia. Sèg i gh'èṅ anc la cundutōra dla ràddio Nicki Brand (Deborah Harry) e 'l prufesōr Brian O'Blivion (Jack Creley), un persunàǵ fat a la sò manéra ch'al n in vōl savér ad far-as védar ad parsòna dònca al buta śò i sò pinsēr in sla televiśiòṅ in soquànt nàstar che pò al fà véd'r a 'l sò pòst.

Max al fà cōlp su la Nicky e i dū i dvènt'n amànt. Chi lē la cata gust in dal maśuchìśum e quànd la véd una dal caséti dal prugràma piràta, ciamâ Videodrome, la và fóra 'd tèsta dabòṅ. Max al gh và a fónd e al s persuàd ch'a gh sia O'Blivion in mèś e 'l è pròpria acsè anc se lò 'l è mòrt da bèla 'n an e l'è sò fiōla Bianca (Sonja Smits) a mandàr in ónda ad cuntìnuv al registrasiòṅ di sò dascōrs. La dóna la gh fà savér ch'al signàl ad Videodrome al fà crés'r al càncar a 'l sarvèl faghénd védar dal figùri e sintìr di quèi minga véra a la gint ch'la 'l guàrda. Anc Renn al taca a patìr cal mâl lè. Na vòlta a gh s vèra na sfésa in dla pansa ch'la gh tira dènt'r al bras e la pistòla ch'al tgniva in maṅ.

Culegamènt estéran