Il pasto nudo

Da Wikipedia.

C'l artìcul chè 'l è scrit in Miranduléś Emiliàn

Naked Lunch
Il pasto nudo

Peter Weller in na figùra dal film
Al past nûd
1991
Regìa: David Cronenberg
Scritōr: William S. Burroughs • David Cronenberg
Atōr: Peter WellerJudy DavisJulian Sands
Roy ScheiderNicholas CampbellYuval Daniel
Ian HolmMonique MercureMichael Zelniker
Joseph ScorenJohn FriesenSean McCann
Müsica: Howard Shore • Ornette Coleman
Léngua: IngléśÀrab
Dürä dal film: 115 minüt
Nasiōṅ: CànadaRégn UnîGiapòṅ


«
Sterminâ tut i pinsēr ch'i gh'aṅ dal critèri.»
(Tagline dal film)


Il pasto nudo (Al past nûd) 'l è 'n film fantàstic e dramàtic dal 1991 ad David Cronenberg trat in na manéra libra da 'l rumànś umònim ad William S. Burroughs.

'L è custâ quèl ad manc ad vint migliòṅ ad dòlar ma al 'n à fat sù sōl dū e siē.

Sunt

Al drugâ e sterminadōr ad scaravàś William Lee dit Bill (Peter Weller) al dascóva che sò mujér, la Joan (Judy Davis), la s dròga tulénd in véna la pólvra śala che lò al dróa par far fóra chi insèt là. Quànd 'l óm al vèṅ arestâ parchè i gh càtan di stupefacènt, al gh'à di alucinasiòṅ in dal méntar ch'l è in cumisariâ in du al véd 'n agìnt segrét cun la fórma 'd un scaravàś gigànt fat cuma na màchina par scrìvar. 'L insèt al gh dà na misiòṅ, qvéla 'd cupàr la Joan parchè la sarév na spia dl'urganiśasiòṅ Interzone Incorporated. Lee al n gh dà mia a mènt e 'l al śbraga pò al tórna a cà giùst par védar sò mujér a lèt gusàr c'n al sò amìg scritōr Hank (Nicholas Campbell) méntar 'n àtar sò amìg, Martin (Michael Zelniker), al lèś dal puesìi a vóś élta. Bill al dmanda a la sò spóśa ad śugàr a 'l Guglielmo Tell c'n un bicér e na pistòla ma pò sénsa vlér al gh tira 'n cōlp a la tèsta masànd-la.

Dòp avér fat, sénsa savēr ad far-al dabòṅ, qvél ch'al gh'iva dit 'l agìnt segrét, 'l óm al vèṅ mandâ in dl’Interśòna a Tangeri in Algerìa par scrìv'r un rapòrt su qvél ch'a fà l'urganiśasiòṅ nemìga. Sèmpar sóta 'l efèt di alucinasiòṅ da pólvra śala, Bill al véd na màchina par scrìvar dvintàr un scaravàś e dascórar p'r al buś dal cûl ch'al gh'à in sla schina e ch'a sarév pò la sò bóca. La bestia la gh diś ad pascàr un sèrt dutōr Benway (Roy Scheider) faghénd-as jutàr par la Joan Frost, na dóna ch'la sumìlia dimóndi a sò mujér e ch'l'è spuśàda cun Tom (Ian Holm). La còpia la s fà jutàr a far i fat in cà par la Fadela (Monique Mercure), na dóna ch'la gh'à sèmpar na scùria in maṅ.

Bill in cal mént'r al cgnós anc dū fnòć, Kiki (Joseph Scoren) e Yves Cloquet (Julian Sands) ch'al gusa 'l sò amìg par da drē tulénd la fórma 'd un scaravàś e inculànd-'s a lò inculànd-al, e pò al vèṅ a savēr che Benway 'l è a cap dn'urganiśasiòṅ ch'la fà na dròga ciamàda "carna négra" druànd di mila-pē gigànt. Al dutōr al n è minga fàcil da catàr parchè al s lóga sóta la pèl dla Fadela.

Culegamènt estéran