Adriana Serra Zanetti
|
C'l artìcul chè 'l è scrit in
Miranduléś |
L’Adriana Serra Zanetti (Mòdna, 5 ad Mars dal 1976, a s lèś [adri'ana 'sɛrra d͡za'netti] in Itagliàn) l'è stada na tenìsta itagliàna emigliàna prufesiunìsta da 'l 1992. L'à śmis ad śugàr in dal Nuvémbar dal 2006.
L'è élta 160 cm e la péśa 56 chilo. La dróa al bras dèstar e la tira 'l arvèrs a dū maṅ. 'L 11 'd Favràr dal 2002 l'è rivàda a èsar la nùmar trént'òt dal mónd e l'è stada la prima itagliàna a rivàr in di quàrt di Australian Open in dal 2002.
L'è la surèla più granda 'd Antonella Serra Zanetti, anca lē śugadōra ad tènis ad mistēr. Sò pàdar al fà al bachér, sò màdar la mistra ad stòria.
In dla sò caréra l'à purtâ a cà tri tìtui WTA in dópi. I cantànt ch'i gh piàśan da piò i èṅ la Whitney Houston e al grup di U2.
Caréra
In dal 1994, pasànd p'r al qualificasiòṅ, la riva in di quàrt a Róma, baténd anc l'Anke Huber, par pò pèrdar da la Karina Habšudová 3-6 2-6. 'L an dòp la pèrd par dū vòlti da la Conchita Martínez, nùmar quàtar dal mónd, prima a 'l secónd tùr'n ad Róma 2-6 6-1 1-6 e pò a 'l quàrt tùran dal Roland Garros par 0-6 1-6. A Mósca l'è bòna ad mandàr a cà par la secónda vòlta in d'l an l'Helena Suková 6-3 6-2 e la riva in semifinàl in dua la pèrd da l'Elena Makarova par 1-6 1-6.
In dal 1996 la pèrd nét a 'l secónd tùran ad Miami paténd un 6-1 6-1 da la Sandrine Testud. La cumbàt sèg anc a Róma ma l'è sèmpar la francéśa a pasàr par 6-4 4-6 6-4. 'L an dòp la vins 'l ITF ad Ramat Hasharon in Iśraēl dand la paga a la Katarina Srebotnik par 6-4 6-2. La gh và mâl invéci 'l an dòp in qvél ad Bugutà in dua la céd in finàl a la Fabiola Zuluaga.
Dòp di brut 1999 e 2000, la tórna a śugàr na finàl IFT in dal Favràr dal 2001 a Rockford in di Stat Unî ma la gh'à da pigàr-as a la Jill Craybas par 4-6 3-6. In Avrìl la pasa 'l qualificasiòṅ a Charleston, rivànd pò a 'l secónd tùran; stés quèl anc a Birmingham in dua la pèrd da la rusa Anastasija Myskina par 6-1 6-7 3-6. Dòp un secónd tùran anc a Wimbledon, la riva in semifinàl a Bratiślàva (7-5 1-6 1-6 da la Martina Suchá).
Da nùmar utanta-tri dal mónd la śōga gl'Australian Open in dal Śnar dal 2002 e chè la pòrta a cà i quàrt baténd via via la Virginia Ruano Pascual 6-2 2-6 7-5, l'Amy Frazier 6-3 7-6, la Silvia Farina Elia (nùmar ùndas dal tablòṅ) 6-2 4-6 6-4 e la Martina Suchá 6-1 7-5. La pèrd pò da la śvisra Martina Hingis 2-6 3-6. A Parì a 'l quèrt la céd a 'l secónd tùran a la Monica Seles 5-7 2-6 mént'r a Memphis la riva invéci in di quàrt (0-6 4-6 da l'Ai Sugiyama). La mudnéśa la s davśìna a 'l quarantéśum pòst in clasìfica cun al tèrs tùran 'd Indian Wells pardû da la Justine Henin ma pò la fà sù sōl di prim e secónd tùran in fiṅ in Setémbar in dua baténd sò surèla Antonella a Shanghai la riva a 'l tèrs tùran par pò cédar a la giapunéśa Ai Sugiyama 1-6 3-6.
'L an dòp la pèrd a 'l secónd tùran a gl'Australian Open p'r òpra dla Daniela Hantuchová cun al puntéǵ ad 6-7 6-7. In Agóst la pasa 'l qualificasiòṅ di US Open mandànd a cà la Samantha Stosur e la Marija Kirilenko ma pò la s férma subìt anca lē pardénd in tri sét da la Denisa Chládková. A Tashkent la pasa dū tùran (dand anc un 6-4 7-5 a la Flavia Pennetta).
In dal 2005 la s cava la sudisfasiòṅ ad tōr part a 'l turnèo WTA ad cà sua a Mòdna ma la pèrd subìt da l'Anna Smashnova che pò la vinsrà al tìtul. Dòp na sfilaràda ad prim tùran in soquànt turnèo IFT, la gh dà a muć in dal Nuvémbar dal 2006.