Glenn Close

Da Wikipedia.
C'l artìcul chè 'l è scrit in Miranduléś Emiliàn
La Glenn Close tòlta śò in dal 2014


La Glenn Close (Greenwich, 19 ad Mars dal 1947, a s lèś /ɡlɛn kloʊz/ in ingléś) l'è n'atōra, ardupiadōra e prudutōra americàna.

In dla sò caréra l'è stada bòna 'd vìnsar dū Grammy Awards e tri Emmy Awards ma minga 'l Prèmi Òscar anc s'la gh'è andàda davśèṅ dimóndi esénd stada candidàda par siē vòlti p'r al pelìculi Il mondo secondo Garp, Il grande freddo, Il migliore, Attrazione fatale e Le relazioni pericolose.

Sustenidōra di dirìt dal bèsti, specialmènt di caṅ, e dal partî demucràtic, l'à dâ 'l sò apòǵ a i presidènt Bill Clinton e Barack Obama. A gh piàś tgnir dacàt i vistî e i custùm druâ in di sò film.

Biugrafìa

Uriginària dal Connecticut, la Glenn dal pìcula la tîṅ adrē a sò pàdar cirùśìg in gir p'r al mónd, andànd a star prima in dal Cóng Bèlg e pò in Európa in du la s iscrìv a 'n culéǵ śvìsar. In dal 1974 la s làurea in Virgìgna, pò la và a star a New York in du la taca a recitàr a teàt'r a Broadway.

A la fiṅ di an Stanta la tōś part a soquànt film par la televiśiòṅ pò in dal 1982 la fà sèntar cun la sò prima pelìcula giràda p'r al cìnema fata insém a Robin Williams, Il mondo secondo Garp, ch'la gh fruta na nomination a 'l Prèmi Òscar cuma atōra minga prutagunìsta. 'L an dòp l'è prutagunìsta, insém a Tom Berenger, Jeff Goldblum, William Hurt e Kevin Kline, dal film dramàtic Il grande freddo e par lē a riva n'atra candidadùra a i Òscar ma l'armàgn a bèc sut, stés quèl anc 'l an dòp p'r al film ad Barry Levinson Il migliore.

In dal 1985 e in dal 1987 la gira dū thriller, prima Doppio taglio e pò Attrazione fatale in du la fà la part dl’Alex, na dóna puta ch'la dvènta la stalker ad Michael Douglas parchè la n gh la cavàva pròpria minga a mandàr śò 'l fat che lò al l'is mulàda dòp na gusàda sèg dna nòt. Par cla pelìcula chè la ciàpa incóra na nomination a i Prèmi Òscar ma la n pòrta a cà gnint. La prév arfàr-as cun Le relazioni pericolose dal 1988 ma anc 'sta vòlta la gh và mâł par la quìnta vòlta 'd fila.

La Glenn la vèra i an Nuànta girànd al śal Il mistero Von Bulow ad Barbet Schroeder e 'l Amleto dal fiurintèṅ Franco Zeffirelli in du la fà la Gertrude. In dal 1993 la fà la Férula Trueba in La casa degli spiriti, film trat da 'n rumànś dl'Isabel Allende. A 'l sò fiànc i gh'èṅ anc la Meryl Streep, Jeremy Irons, la Winona Ryder, la Vanessa Redgrave e Antonio Banderas.

In dal 1996 la tōś part a 'l film dramàtic Mary Reilly cun la Julia Roberts e pò a La carica dei 101 - Questa volta la magia è vera, arfacimènt cun atōr véra dna pelìcula dla Walt Disney a cartòṅ animâ dal 1961 intitulàda La carica dei cento e uno, in du la fà Crudelia De Mon. Sèmp'r in c'l an lè l'è prutagunìsta dla cumèdia négra 'd Tim Burton Mars Attacks! in du la fà la mujér dal presidènt di Stat Unî Jack Nicholson. In dal 1997 la lavóra cun Harrison Ford in dal film Air Force One e cun Matt Dillon e Kevin Kline in In & Out in dū la gh'à 'n camèo.

In dal 1999 la dà la sò vóś a la pelìcula 'd Walt Disney Tarzan e la gira anc la cumèdia 'd Robert Altman La fortuna di Cookie insém a la Julianne Moore, a Chris O'Donnell, a la Julianne Moore e a la Liv Tyler.

Filmugrafìa

La Close a Venèsia in dal 1992
L'atōra a i Prèmi Òscar dal 2012
La Glenn a Cannes in dal 2010
Un surìś dla Glenn Close

Culegamènt estéran

Àtar prugèt