Attrazione fatale

Da Wikipedia.
C'l artìcul chè 'l è scrit in Miranduléś Emiliàn
Video-x-generic.svg Fatal Attraction
Attrazione fatale
Attrazione fatale.png
Michael Douglas e la Glenn Close in na figùra dal film
Atrasiòṅ fatàla
1987
Regia: Adrian Lyne
Scritùr: James Dearden
Atùr: Michael DouglasGlenn CloseAnne Archer
Ellen Hamilton LatzenStuart PankinEllen Foley
Müsica: Maurice Jarre
Lengua: Ingléś
Dürä dal film: 115 minüt
Nasiòṅ: Stat Unî


«
N'uciàda ch'l'à purtâ a na sira insém. Un śbali ch'al s pintirà p'r al rèst dla sò vita!»
(Tagline dal film)


Attrazione fatale (Atrasiòṅ fatàla) 'l è 'n film dramàtic dal 1987 'd Adrian Lyne. In c'l an lè 'l è stâ al più grôs sucès a i budghèṅ di cìnema in tut al mónd e al secónd in di Stat Unî. 'L è anc stâ numinâ par vìnsar siē Prèmi Òscar ma al n à pò fat sù gnint.

Custâ quatórdas migliòṅ ad dòlar, al film al 'n à purtâ a cà da piò ad tarśènt-vint.

Sunt

Dan Gallagher (Michael Douglas) al gh'à quarànt'an e al fà 'l avucàt a New York. Al gh'à na mujér ch'a gh vōl bèṅ, la Beth (Anne Archer), e na putìna ad siē an, l’Ellen (Ellen Hamilton Latzen). Un dè al cgnós l’Alex Forrest (Glenn Close), avucàt anca lē, e dòp avér-ag pasâ na giurnàta insém, ad nòt al gh và anc a lèt méntar sò mujér la s cata in campàggna da i sò genitōr. Al dè dòp Dan al decìd ad turnàr a cà da i suo ma l’Alex la n vōl minga, la gh cuntàva dimóndi, la 'l vōl par lē e la n ś mét mia 'l cōr in paś. Al prim quèl ch'la fà dòp èsar stada mulàda, ma lò al vliva invéci sōl far na ciuladìna, 'l è qvél ad tajàr-'s al véni. Dan al la juta miténd-ag soquànti fasōli a i pōls e pò al s in và dabòṅ, sprand ad daśmindgàr-'s incòsa e in présia. Ma a n è minga acsè fàcil, la dóna la taca a ciamàr-al dapartùt, a cà e in ufìsi, a tuti gl'óri dal dè e dla nòt.

A n psénd-an piò ad lē, Dan al decìd ad véd'r-la par l'ultma vòlta par mét'r i quèi in ciàr. L’Alex la gh diś ch'la gh vōl bèṅ dimóndi, ch'la n pōl minga far sénsa 'd lò e ch'la spèta 'n putèṅ. Dan, ch'al gh'à bèla na famìja e 'l è sōl quàl lè ch'al vōl, al gh śibìs 'd aburtìr ma a n gh'è vèrs, l’Alex la dvénta incóra più pēśa sèg e, faghénd finta 'd ès'r interesàda a cumpàr la cà che lò 'l iva mis da véndar, la s fà dar al sò nùmar ad telèfun da sò mujér.

In cal méntar Dan al spatìna cun la sò famìja in na cà in campàggna ma l’Alex la n mòla briśa: prima la stramna d'l àcid insìma a la sò màchina e pò la gh fà catàr na caséta vìddeo in dua la gh dmanda par piaśēr ad turnàr sèg, ad far al pàd'r ad sò fiōl, a tgnir-'s in a mènt i mumènt bèi pasâ a lèt insém. Subìt però la sò vōś dólsa la càmbia in arlìa, la gh diś ch'la 'l òdia, che lò al s cumpòrta acsè sōl parchè al n vōl minga bèṅ a cal dóni. A s véd acsè ch'l’Alex la gh'à di prubléma in dla tèsta, ch'la gh'à 'n caràtar borderline, ch'la càmbia 'd umōr da spés. Dan al và da la pulisìa ma lōr i n pōlan far gnint parchè a n gh'è minga dal próvi cónt'r ad lē.

Un dè, mént'r i Gallagher i èṅ fóra, l’Alex la s insfìls' in cà e la cópa 'l cunèṅ dumèstic che Dan 'l iva rigalâ a sò fiōla. Cuma s'a n fus minga abàsta, la dóna la mét sù la pgnata cun la pòvra bèstia dèntar. Quànd l’Ellen la 'l véd aròst la siga e la piànś. Sōl in alóra Dan al s decìd ad cuntàr incòsa a sò mujér. Prima 'd andàr via 'd cà, lò al telèfuna a l’Alex par dir-ag che la Beth adès la sà tut. Prima che sò marè al méta śò la curnéta, lē la mét in s'l avìś l'amànta dgénd-ag che se sōl la próa a davśinàr-as da cla banda, lē la la cópa, ch'la gh pōl cuntàr-'g insìma.

L’Alex la decìd alóra ad dar séguit a 'n sò tragatèṅ, qvél ad purtàr via l’Ellen śibénd-ag 'd andàr a 'l luna park sèg.

Culegamènt estéran