Vanessa Redgrave

Da Wikipedia.

C'l artìcul chè 'l è scrit in Miranduléś Emiliàn

La Redgrave tòlta śò in 1972


La Vanessa Redgrave (Lóndra, 30 ad Śnar dal 1937, a s lèś [vəˈnɛsə ˈɹɛdɡɹeɪv] in ingléś), l'è n'atōra ingléśa, ad cìnema e 'd teàtar, Dama 'd Cuménda d'l Órdan d'l Impēr Britànic.

In dla sò lunga caréra l'è stada bòna ad ciapàr dimóndi arcgnusimènt prestigióś cuma 'n Prèmi Òscar in dal 1978 p'r al film Giulia cuma atōra minga prutagunìsta, ólt'r a atri sinc candidadùri, dū Golden Globe, un BAFTA, dū Emmy Awards, dū Prix a 'l Fèstival ad Cannes e na Cópa Volpi a 'l Fèstival ad Venèsia.

La Redgrave l'è stada prima spuśàda c'n al regìsta Tony Richardson, ch'al l'à mulàda pò par la Jeanne Moreau, e pò cun 'l atōr emigliàṅ Franco Nero. L'è na dóna 'd sinìstra, sustenidōra dal partî laburìsta.

Biugrafìa

Fiōla di atōr Michael Redgrave e Rachel Kempson, la Vanessa la fà 'l sò debùt a 'l cinéma recitànd insém a sò pàd'r in dal film dramàtic dal 1958 Behind the Mask, pò in séguit la lavóra faghénd dal parti su di tèst ad William Shakespeare, Anton Čechov, Henrik Ibsen e Bertolt Brecht.

Al sucès internasiunàł par lē al riva in dal 1966 cun Blow-Up dal regìsta fraréś Michelangelo Antonioni mo anc c'n Un uomo per tutte le stagioni ad Fred Zinnemann e Morgan matto da legare ad Karel Reisz ch'al gh fruta un prèmi a Cannes. A la fiṅ di an Ssanta la lavóra insém a Franco Nero in Un tranquillo posto di campagna.

La Vanessa insém a Franco Nero
In di pagn dla Mary, regìna 'd Scòsia
Franco Nero, la Redgrave e 'l pìcul Carlo Gabriel in na fóto dal 1979 'd Alan Light
La Vanessa Redgrave in di an Nuànta
L'atōra in na fóto dal 2007
La Redgrave a Cannes in dal 2016

In dal 1971 la gira par Ken Russell la pelìcula I diavoli mént'r in dal 1974 l'è in dal cast dal śal Assassinio sull'Orient Express ad Sidney Lumet ch'al l'iva bèla dirèta in Il gabbiano siē an prima. In dal 1977 la vins al Prèmi Òscar par la part dla Giulia in Giulia in du la rècita insém a la Jane Fonda e a la Meryl Streep.

In di an Utànta la lavóra cun James Ivory in I bostoniani e Stephen Frears in Prick Up - L'importanza di essere Joe mént'r in di an Nuànta la gira Storia di una capinera, da 'l rumànś ad Giovanni Verga, e i thriller La notte della verità cun la Jamie Lee Curtis, Il senso di Smilla per la neve e Mission: Impossible ad Brian De Palma. La Redgrave la fà in tèmp anc a tōr part a dū pelìculi ad sò fiōl Carlo Gabriel Nero.

In dal 2018, insém a 'l regìsta David Cronenberg, a gh vîṅ dâ al Lèòṅ 'd Òr a la caréra a 'l 75śum Fèstival ad Venèsia.

Filmugrafìa

Culegamènt estéran