Anthony Perkins

Da Wikipedia.
C'l artìcul chè 'l è scrit in Miranduléś Emiliàn
Perkins tòlt śò in dal 1983

Anthony Perkins (New York, 4 'd Avrìl dal 1932 – Los Angeles, 12 ad Setémbar dal 1992) 'l è stâ 'n atōr, regìsta e senegiadōr americàṅ, candidâ a 'l Prèmi Òscar in dal 1957 cuma atōr minga prutagunìsta p'r al rōl ad Josh Birdwell in dal film La legge del Signore ad William Wyler mént'r a 'l Fèstival ad Cannes 'l è stâ bòṅ ad vìnsar par la pelìcula Le piace Brahms?.

'L è cgnusû p'r avér dâ la sò ghigna a 'l persunàǵ ad Norman Bates in dal film Psyco 'd Alfred Hitchcock, rōl ch'l à pò cuntinuâ a far in àtar tri film: Psycho II (1983), Psycho III (1986) e Psycho IV (1990).

Bisesuàl in dal vita privàda, 'l è mòrt a ssant'an par na pulmunît cauśàda da 'l AIDS méntar sò mujér, l'atōra e mudèla Berry Berenson, l'à pardû la vita in di atintâ d'l 11 Setémbar 2001 esénd lē insìma a 'l aparéć vōl American Airlines 11 fat stablìr da i terurìsta atàc a 'l Tóri Śmèli 'd New York. La còpia la gh'iva dū fiōi nâ in di an Stanta, Oz e Elvis.

Biugrafìa

Perkins al taca la sò caréra a 'l cìnema in di an Sinquànta e 'l fà sèntar bèla c'n al sò secónd film, La legge del Signore, ch'al gh fruta 'n Golden Globe e na nomination a i Prèmi Òscar. In chi an lè al fà vgnir fóra anc di disc, firmâ Tony Perkins, e 'n sò sìngul dal 1957, Moon-Light Swim, al gh la cava anc a finìr a 'l 24śum pòst dla Billboard americàna.

In dal 1960 al cata 'l sucès faghénd al prutagunìsta in dal thriller Psyco 'd Alfred Hitchcock. Cla part chè la ségna par sèmpar la sò caréra, specialmènt in di ùtim an. In di an a vgnir al lavóra cun di regìsta impurtànt cuma Orson Welles, ch'l al vōl in Il processo trat da 'l rumànś umònim ad Franz Kafka, René Clément (Parigi brucia?), Claude Chabrol (Le scandale - Delitti e champagne e Dieci incredibili giorni) e Mike Nichols (Comma 22).

In di an Stanta al gira 'l thriller Qualcuno dietro la porta e 'l śal Assassinio sull'Orient Express, lavōr ad Sidney Lumet trat da 'l rumànś dl'Agatha Christie, mént'r in di an Utànta e Nuànta al tōś part a soquànt lavōr par la televiśiòṅ e a soquànt pelìculi 'd scarésa o dal śgriśōr in du 'l fà da spés di persunàǵ disturbâ o ciucâ in dla suca cuma in China Blue o Dr. Jekyll e Mr. Hyde: sull'orlo della follia.

Filmugrafìa

cuma Regìsta

Culegamènt estéran

Àtar prugèt