Psycho III
|
C'l artìcul chè 'l è scrit in
Miranduléś |
 Psycho III
| ||
 Hugh Gillin e Anthony Perkins in na figùra dal film | ||
| id. 1986 | ||
|---|---|---|
| Regìa: Anthony Perkins | ||
| Scritōr: Charles Edward Pogue | ||
| Atōr: Anthony Perkins • Diana Scarwid • Jeff Fahey Roberta Maxwell • Hugh Gillin • Donovan Scott Lee Garlington • Robert Alan Browne • Gary Bayer Patience Cleveland • Karen Hensel • Kay Heberle | ||
| Müsica: Carter Burwell | ||
| Léngua: Ingléś | ||
| Dürä dal film: 93 minüt | ||
| Nasiōṅ: Stat Unî | ||
Psycho III (id.) 'l è 'n film ad scarésa dal 1986 'd Anthony Perkins, séguit dal capulavōr Psyco 'd Alfred Hitchcock dal 1960 e ad Psycho II dal 1983, girâ par Richard Franklin. Perkins 'l avrév vlû far al film in biànc e négar ma la Universal Pictures la n gh'à minga dâ al parmés.
La pelìcula l'à purtâ a cà quìndas migliòṅ ad dòlar a 'l incìrca.
Sunt
L'ex nuvìsia Maureen Coyle (Diana Scarwid), dòp avér bandunâ al cunvènt in du la stava p'r avér cauśâ la mòrt dla màdar superiōra durànt un tentatìṿ ad suicìdi p'r avér pardû la fēd, cun la sóra ch'la casca śò p'r al campanìl a 'l sò pòst, la dmanda un pasàǵ a Duane Duke (Jeff Fahey), 'n ex muśicìsta ch'al lavóra p'r al mutèl ad Norman Bates (Anthony Perkins). 'L óm al vrév imprufitàr-as dla cundisiòṅ dimóndi sò dla dóna par ciulàr-'s-la ma lē la s tira indrē e alóra la vèṅ dascargàda in sla strada, sóta la piōva. La Maureen la gh la cava listés a rivàr a 'l mutèl e la dvénta amìga, e anc quèl da piò, ad Norman anc parchè la sumìglia dimóndi a la Marion Crane, la dóna che lò 'l iva scurtlâ sóta la dócia più 'd vint an prima.
Norman al viṿ cun al cadàvar ad sò màdar, l’Emma Spoon, in cà dòp avér-ag tirâ na śbadilàda in tèsta, cupànd-la.
A riva in dal mutèl na giurnalìsta ad Los Angeles, la Tracy Venable (Roberta Maxwell), una ch'l'è parsuàśa che Bates al sia turnâ a masàr la gint. In cal méntar Norman, dòp avér tgnû 'd òć p'r un buś in dal mur la Maureen ch'la s cavàva śò, al s mét i pagn ad sò màdar p'r andàr a masàr ch'la spurcaciòna lè ma, quànd al riva là, al la cata in dla vasca da bagn cun i pōls tajâ. La dóna la créd ad védar la vìrgin Marìa, scambiànd al curtlàs ch'al tgniva sòdi in maṅ p'r un crucifìs 'd argìnt. Norman al gh salva la vita purtànd-la a 'l uśdàl.
In cal méntar Duane al cata sù in un bar na ragasōla ciamàda Red (Juliette Cummins) e al la pòrta in na cambra dal mutèl par far-'s-la ma quànd lē la gh dà dal nimàl parchè la vrév tacàr na relasiòṅ e minga na ciuladìna e pò basta, lò al la buta fóra da 'l us. La dóna la vèṅ pò cupàda in na cabìna dal telèfun da la sgnóra Bates pròpria méntar l'éra drē a prilàr da cl'atra banda la sò maja faghénd véd'r al téti.
In dal mutèl i riv'n anc un grup ad turìsta imbariàg ch'i gh'aṅ in prugràma ad védar 'n incóntar ad football americàṅ. La Mama la masa la Patsy Boyle (Katt Shea Ruben), la sōla ch'la n iva minga bvû, e la mét al còrp in na giasarōla. A riva lè anc al sierìf John Hunt (Hugh Gillin), ch'al pésca la dóna, ma al n cata gnint anc se la Tracy la và a drē parchè al faga dal dmandi a Norman.