Il coltello nella piaga
|
C'l artìcul chè 'l è scrit in
Miranduléś |
 Le Couteau dans la plaie
| ||
| Il coltello nella piaga | ||
 La Sophia Loren e Anthony Perkins in na figùra dal film | ||
| Al curtèl in dla piàga 1962 | ||
|---|---|---|
| Regìa: Anatole Litvak | ||
| Scritōr: Anatole Litvak • André Versini Peter Viertel • Hugh Wheeler • Maurice Druon | ||
| Atōr: Anthony Perkins • Sophia Loren • Gig Young Jean-Pierre Aumont • Yolande Turner • Tommy Norden | ||
| Müsica: Mikis Theodorakis Jacques Loussier • Giuseppe Mengozzi | ||
| Léngua: Ingléś • Francéś | ||
| Dürä dal film: 110 minüt | ||
| Nasiōṅ: Frància • Itàglia • Stat Unî | ||
Il coltello nella piaga (Al curtèl in dla piàga) 'l è 'n śal in biànc e négar dal 1962 dal regìsta americàṅ Anatole Litvak. In Itàglia soquànt nóm di persunàǵ i èṅ stâ itaglianiśâ cuma 'l amànt dla Loren ch'l è dvintâ Aldo Stagni.
Sunt
La Lisa (Sophia Loren) la viṿ in Frància insém a sò marè, 'l americàṅ Robert Macklin (Anthony Perkins), che lē l'à cgnusû par caś quànd incóra la stava a Nàpuli e lò 'l éra là par na vacànsa. Purtròp c'n al pasàr dal tèmp la n è più cunténta sèg parchè lò 'l è sōl un giandòṅ ch'al s cumpòrta cuma 'n putèṅ e lē la gh fà praticamènt da màdar. Dòp ès'r-as fata 'n amànt in Alan Stewart (Jean-Pierre Aumont), prima che sò marè al tóga 'n aparéć par Caśablànca, a 'l aeropòrt lē la gh diś ch'la gh vōl dar un taj. Al dè dòp la vèṅ a savēr lśénd al giurnàł che 'l aparéć al gh'à abû 'n incidènt e che qvéi ch'i ér'n a bōrd i èṅ tut mòrt. Inóltar a gh riva anc na létra da na cumpagnìa 'd asicurasiòṅ parchè Robert, ch'al gh'iva paùra a vulàr, al s éra asicurâ prima 'd partìr.
Durànt la nòt i gh sònan a la pòrta e la Lisa la và a vèrar: 'l è Robert ch'l è turnâ da lē. 'L è frî ma viṿ par miràcul e adès al vrév tiràr i bèsi dl'asicurasiòṅ anc parchè in cal méntar 'l è stâ lasâ a cà da 'l sò padròṅ parchè al 'n iva fati tròp in ufìsi e in Maròc al n gh'iva minga 'd andàr-ag par lavōr ma par catàr lavōr. La Lisa la n è minga 'd acòrd ad far cal tragatèṅ chè e la gh cònta che quànd lò 'l è partî c'l àtar dè lē l'arév vlû che lò al n turnìs piò. Robert al gh dmanda alóra 'n ùltim rigàl: chi bèsi lè i gh farésan dimóndi còmad, pò lò al gh prumét ch'l andrà a star a 'l èstar lasànd-la finalmènt libra ad vìvar la sò vita anc s'in cal mént'r al sò amànt 'l è turnâ in di Stat Unî. Lē la 'l à sabû quànd l'è andàda a catàr-al; adès in dal sò apartamènt a gh astà un sèrt David Barnes (Gig Young), culéga giurnalìsta 'd Alan e òṅ ch'al mét al naś dapartùt.