Anna Smashnova

Da Wikipedia.

C'l artìcul chè 'l è scrit in Miranduléś Emiliàn


L'Anna Smashnova tòlta śò in dal Śugn dal 2006


L’Anna Smashnova (Minsk, 16 ad Luj dal 1976, ciamàda in Rus Анна Смашнова, אנה סמשנובה‎ in Iśraeliàṅ) l'è stada na tenìsta iśraeliàna ch'la daśvgnìva da l'Ugnòn Suviètica. La sò famìja la s è stablìda in Iśraēl in dal Setémbar dal 1990.

La druàva al bras dèstar cun 'l arvèrs tirâ cun na maṅ sōla. L'è élta 157 cm e la péśa 53 chilo. In dla sò caréra, tacàda fra i prufesiunìsta in dal 1991, l'è rivàda a èsar la nùmar quìndas dal mónd al 3 ad Favràr dal 2003. In tut l'à mis in bisàca da piò ad dū migliòṅ ad dòlar, vinsénd dódas tìtui WTA e sèt ad qvéi ITF.

L'à śmis ad śugàr in dal 2007.

A gh piàś magnàr la ciuculàta, guardàr di film e scultàr dla mùśica. Al 7 ad Dicémbar dal 2002 l'à spuśâ al tenìsta itagliàṅ Claudio Pistolesi ma pò i aṅ divursiâ.

Caréra

La Smashnova la taca a pistàr i camp dal sircùit WTA stabilmènt in dal 1994. A gl'US Open la riva a 'l tèrs tùran in dua la pèrd da l'Iva Majoli par 2-6 3-6. 'L an dòp la riva a 'l tèrs tùran a gl'Australian Open (2-6 2-6 da la Brenda Schultz) e a Miami (chè la dà la paga a la Silvia Farina Elia prima ad cédar a la Rachel McQuillan). A 'l Roland Garros la pèrd in di utàṿ da l'Arantxa Sánchez Vicario par 4-6 0-6.

In dal 1996 la pèrd a 'l prim tùran a Róma da la Sandra Cecchini e la cuntìnua in manéra cumpàgna par tut al rèst d'l an, a part un secónd tùran a Berlîṅ. Par via dla clasìfica da schiva l'è custréta in dal 1997 a śugàr in dal sircùit ITF.

In dal 1998, dòp soquànti finàli ITF, la s fà strada a 'l Roland Garros rivànd incóra in di utàṿ in dua la pèrd da la Martina Hingis, nùmar òṅ dal mónd. Fra Luj e Agóst la tōś part a i turnèo ad Sopot (semifinàl cun l'Elena Wagner) e 'd Ìstambul (quàrt cun la Laura Golarsa ch'la la bat par 3-6 6-4 6-4).

In dal 1999 la bat subìt la Nataša Zvereva a Róma e pò anc la Tara Snyder prima ad cédar a la Sandrine Testud par 5-7 1-6. La riva a 'l tèrs tùran anc a Madrid (1-6 3-6 da la Lindsay Davenport) e a 'l Roland Garros (2-6 5-7 da la Conchita Martínez). In Śugn la vins al sò prim tìtul WTA a Tashkent baténd la Laurence Courtois par 6-3 6-3.

In dal 2000 la s férma in di quàrt a Hannover ad òpra dl'Amélie Mauresmo par 2-6 1-6. A Amelia Island la bat subìt l'Iva Majoli 6-3 6-1 ma pò la pèrd da la Monica Seles par 6-7 0-6. Dòp na semifinàl a Straśbûrg, la riva a 'l tèrs tùran a gl'US Open pardénd da la Sabine Appelmans 3-6 4-6. In Luj la pòrta a cà na semifinàl a Palèrum e al tìtul ad Knokke-Heist in dua la mòla un 6-2 7-5 a la Dominique Monami.

In dal 2001 la riva in di quàrt a Bol, Antwerp e a Viéna e in semifinàl a Baśilèa. La sèra 'l an cun dū finàli ITF pardùdi. La taca invéci a la granda al 2002 purtànd-'s a cà i turnèo 'd Auckland (6-2 6-2 a la Tat'jana Panova) e ad Canberra (7-5 7-6 a la Tamarine Tanasugarn). A Indian Wells la riva in di quàrt baténd la nùmar trédas dal mónd Meghann Shaughnessy ma pò la céd 2-6 1-6 a la śvisra Emmanuelle Gagliardi. A Miami la bat la Justine Henin par 6-7 6-3 6-4 prima ad lasàr strada a 'l tèrs tùran a la Tat'jana Panova. Stés riśultâ anc a Charleston cun l’Anna ch'la fà fóra la Jelena Dokić e pò la pèrd da l'Iva Majoli cun al puntéǵ ad 1-6 6-3 2-6. A Berlîṅ la manda a cà la nùmar tri dal mónd Kim Clijsters e la nùmar quatórdas Daniela Hantuchová prima ad pèrdar in semifinàl da la Serena Williams. A Madrid la riva in di quàrt (3-6 2-6 da la Monica Seles) mént'r a Parì la và fóra subìt sóta i cólp dla Francesca Schiavone. In Śugn la fà suo al turnèo ad Viéna in finàl su l'Iroda Tulyaganova. In Luj la patìs dū sunfìti da l'Anna Kurnikova ma pò la la bat in dla finàla ad Shanghai par 6-2 6-3. La finìs 'l an a 'l nùmar sédas dal mónd.

In dal 2003 a Auckland l'è custréta a bandunàr durànt la semifinàl cun la Yoon Jeong Cho. Dòp la scunfìta in dal prim tùran patìda a Tokyo da l'Elena Bovina la s férma subìt anc a Parì (3-6 2-6 da la Stéphanie Cohen-Aloro). A Miami la pèrd in di utàṿ da la Kim Clijsters par 1-6 1-6. A Varsàvia, Berlîṅ e Róma la pèrd par tri vòlti a 'l tèrs tùran da l'Amélie Mauresmo. In Luj la Smashnova la vins al tìtul ad Sopot: in finàl la sćianca 6-2 6-0 la céca Klára Zakopalová. La stmana dòp l'ardópia 'l tìtul vinsénd cun la Jelena Kostanić Tošić anc a Helsinki. A New Haven la bat al rusi Anastasija Myskina e Vera Zvonarëva prima ad pèrdar da la Jennifer Capriati par 2-6 7-5 1-6. A Mósca la tenìsta ad Minsk la fà fóra atri tri rusi: la Nadia Petrova 6-3 6-3, la Svetlana Kuznecova 7-6 6-0 e l'Elena Bovina 6-4 6-4 ma pò la quàrta Anastasija Myskina la la bat in semifinàl par 2-6 0-6. La finìs 'l an pardénd in di quàrt ad Linz da la Vera Zvonarëva.

La Smashnova la mùcia sù in dal 2004 dū scunfìti a 'l tèrs tùran ad fila da la Vera Zvonarëva a Charleston e a Varsàvia. A Róma la fà piànśar gl'itagliàni Maria Elena Camerin e Flavia Pennetta prima 'd andàr a cà par cólpa dla Jennifer Capriati. La stmana dòp però l′Anna la vins 'n àtar tìtul a Viéna in finàl cóntar l'Alicia Molik par 6-2 3-6 6-2. La finìs mâl la stagiòṅ śliciànd śò a 'l 32śum pòst in clasìfica.

In dal 2005 la riva in semifinàl a Ìstanbul (6-4 1-6 0-6 da la Nicole Vaidišová) e pò la vins al turnèo WTA ad Mòdna baténd subìt la śugadōra ad cà Adriana Serra Zanetti e pò anc la Flavia Pennetta in semifinàl. In dl'ultma partìda la gh'à 'n cōlp ad furtùna quànd la Tathiana Garbin l'è custréta a bandunàr su 'l siē para in dal prim sét. La Smashnova la và pò anc a vìnsar a Bùdapest baténd la Catalina Castano par 6-2 6-2. 'L ardópia cal tìtul lè anc 'l an dòp, dand un 6-1 6-3 in finàl a la Lourdes Domínguez Lino. In Agóst la śōga n'atra finàl a Forest Hills ma la la pèrd 6-1 0-6 4-6 da la Meghann Shaughnessy. I èṅ i sò ùltim cōlp ad sćiòp parchè in dal 2007 la śōga sōl in tri turnèo, pardénd sèmp'r a 'l prim tùran.

Culegamènt estéran